AKIKIHI 25 - Sumi Naga CL (Re-edited) Bible (BSI)

Peor lo Baal Kümlla

¹ Israelmi no Shittim lo aghazü shipe akelo, panongu ye Moablimi sasü xüpimiuve.

² Totimi hipaqo no pano lhouqo mlla cheke-a lo Israelmi kusü no kümtsa kuchu-kusho shi eno pano lhouqo mllauve.

³ Israelmi no hitoi Peor lo Baal mllauve kehu Ampeu ye panongu shou amloideve.

⁴ Eno Ampeu no Moses vilo pi, “Timiqo shou atomi kümtsü kügha sawo puchou Ampeu nhethe lono tshüqhive lo tishianguno Ampeu xukighide Israel launo tsüghülu nani.”

⁵ Moses no Israel lo xaküthami vilo pi, “Nongu pütüta mqo lo timi khunoqo no Peor lo Baal mllauve akeno heqhi khavelo.”

⁶ Ikelo Moses ngo aqoaho no kuposhukulu phiki kulaghi lo mloqa akelono Israelmi lakhi no Midianmi totimi lakhi sasü panongu nhethe lono pa phiki lo sailove.

⁷ Kughou Aaron nu Eleazar nu achineu Phinehas no ti ithulu keno, pa no aqoaho qhive no ithu angupa ikhipe

⁸ aphiki lo akiptiu ngo atotiu pama pape ilo no pama chheda küqhave, eno atotiu ye akive lono jipilive. Hipau lono Israelmi shou püsa akeu ye tave.

⁹ Tishimu püsa lono pano qhethonhe muku bidi thive.

Phinehas no Müamzü

¹⁰ Ampeu no Moses vilo pi,

¹¹ “Phinehas no kiu shikeno tipau ghenguno Ni ye Israelmi shou aloghu idemovae. Pa ghi I no amlo kilimo no timiqo lau müamzü keu ithi ani, eno tino Israelmi kütsani keu lono I süchile luve.

¹² Tighenguno ishi pilo, ‘Julo, I no Iw aloino keu puloshoqhi pa tsü ani,

¹³ tino pa eno pa limi pesü pülhapuju lo achinemi shiche peni keu puloshoqhi shivae, kughengu pa ye pa lhou ghenguno müamzü shi, eno Israelmi ghenguno lochile tsüke.’”

¹⁴ Israelmi khuu Midianmi totimi gholono pithive keno pa je ye Zimri, pa ye Simeon lagha lo atou Salu nu ke.

¹⁵ Eno atotiu je no Cozbi, li ye Midian lo ashiaye lakhi tou Zur ngake.

¹⁶ Ampeu no Moses vilo pi,

¹⁷ “Midianmi lewu no panoqo ghiqhi khavelo,

¹⁸ kughengu panongu no Peor lo, eno Midian tou nga Cozbi khuu püsa tsalani pithive keno, li vehulo nongu mqüqhive ke.”