AKIKIHI 24 - Sumi Naga CL (Re-edited) Bible (BSI)

Balaamw Tungputsa Aküthüu

¹ Kughou Balaam no Israelmi kümghatsü keu lo Ampeu mlokiqi akeu ithive keno, pa ye azüu toi amchipu jumove, ikemu asayeqha küdau pa gi jupuwove.

² Pa no Israelmi no ashiaye kiqi lono aghazü shipe akeu ithulu, eno Alhou ghungu no pa shou ikughive,

³ eno pa no tungkuptsa hipau pi, “Beor nu Balaamw tungkuptsa, timi khuu nhethi xükhotsü keno paw tungkuptsa,

⁴ Alhou tsa chikuluu no pikeu tsa, pa no Akughushuuw kungunhetsü anhethi süküqü mono ithulue:

⁵ O Jacob, o phikiqo ye kishi juvi, O Israel, o ghazü ye kiutoi jukighilepu kelae!

⁶ Amsabo no kujope aketoi, aghoki phivilo aghutu toi, Ampeu no aloebo shosü ketoi, momu azü phivilo cedarbo toi.

⁷ Azü no pano bohu lono qonani, eno pano piti no azü-a lo anani; pano kükau ye Agag nguno akiqheu shi nani, pano kükaqha ye ajekipi shi nani.

⁸ Alhou no Egypt lono saipeghi ke Pa ghenguno panongu ye aghalo mishitsü kibo toike; panongu no aghümi shiye tsüqhive eno tipaqo saghi kubove tsü nani eno apiji pesü panoqo jiqhi nani.

⁹ Panongu no abongshuu toi ipu itsaqi ngo nani khuu no küdaputhu nani kea? Khunono o kümgha tsüni keno akümghapue, eno khunono o müsüinini keno angusüpue.”

¹⁰ Balak ye Balaam ju amloideve eno pa u kumsho luve. Pa no Balaam vilo pi, “I no o kukeu ye I ghümi müsüini peniye kelaye no ye hi ghuthu küthü panongu kümghave tsüae.

¹¹ Tighenguno itehi o ghakhu lo wovelo! I no ishi pipüae, ‘I no agho kivi o tsü nani,’ ikemu o gihuni keu Ampeu no lakhavae.”

¹² Balaam no khochile, “Ni ye nono aghinimi I lau puwu keqo vilo pivae,

¹³ ‘Balak no pa kükaki lo ameshoyi ngo ghükayi akeu kümtsü I tsüveni pimu ni ye Ampeu I Lhou tsape nguno alau ye akivi mu alhoksa mu I ghoshi pimla nani. Ampeu no kiu pilopi keno ti likhi pi nani.’

¹⁴ Itehi ni ye niw timiqo lau woniae, ikemu timi hipaqo no hithiu now timi lau kiu shinani keno I no o kütüghüve tsüni.”

Balaamw Ashekhau Tungputsa

¹⁵ Tishino pa no tungkuptsa hipau pi, “Beor nu Balaamw tungkuptsa, timi khuu nhethi xükhotsü keno paw tungkuptsa ke,

¹⁶ Alhou tsa chikuluu no pikeu tsa, pa ye Shishe Akiqheuw akighithi tsa ithi ani, pa no Akughushuuw kungunhetsü, anhethi süküqü mono ithulue:

¹⁷ ni ye Pa ithulu kemu itehi ye ithumlavae, I no Pa ju kemu aphivilo kühavae. Jacob launo ayepu lakhi ipeghi nani, Israel lono kükaküsü ipeghi nani; Pa no Moab kishe hephovetsü eno Sheth nuli kümtsü kütsave nani.

¹⁸ Edom ye haleve nani; pa ghümi Seir ghi haleve nani. Israel ye akumto shikibe nani.

¹⁹ Jacob launo ighikeu no qhasü nani eno ghükulumi kütsavetsü nani!”

²⁰ Tishino pa no Amalekmi küdau juno tungkuptsa hitoi pi, “Amalek ye shiyeqo dolo atüghüu, ikemu kütsakungo keu no pa shekuho shinani.”

²¹ Eno pa no pishi puwo Kenimi juno tungkuptsa hitoi pi, “O kungo-a ye süshokulu ani, eno o püsü ye atuqu lo shipüani.

²² Tishimu Kainmi ye Asshur no akughumi shi sawuve eno aghakhu ye pitileve nani.”

²³ Pa no paw tungkuptsa highi pitsü, “Oishe, Alhou no hi shikelo khuu no xülu nani kea?

²⁴ Ikemu Kittim lono zükilu ighi no Asshur ngo Eber le nani; eno pa ghi kütsakungove nani.”

²⁵ Tishino Balaam no ithu pa kilo idewove. Eno Balak ghi pa shelo wuve.