AKIKIHI 23 - Sumi Naga CL (Re-edited) Bible (BSI)

Balaamw Tungputsa Atüghüu

¹ Balaam no Balak vilo pi, “I ghenguno hilehi akiptia tsüni mla tsülo eno amshitsü tsüni, ambetsü tsüni saghilo.”

² Balak no Balaam no pike toi shive. Eno Balaam ngo Balak pama no akiptia lakhikhi lono amshitsü lakhi eno ambetsü lakhi pesü mllave.

³ Tithiu Balaam no Balak vilo pi, “O kipti kümllagho phivilo puthugholo, eno I no wuno Ampeu ye I sasü kusho nani kemo keno juni. Pa no kiu kiumu I piyesü keu I no o vilo pitsüni.” Tishino pa ye atoghi kütsüqa lakhi lo ikuve,

⁴ Alhou no Balaam sasü kusholu eno Balaam no pi, “I no akiptia tsüni mlave no lakhikhi lono amshitsü lakhi ambetsü lakhi pesü mllavae.”

⁵ Ampeu no kiu pikepu keno Balaam vilo pive eno ishi azah tsü, “Balak lau idewo no hitoi pilo.”

⁶ Pa no ideighi, eno Balak ye Moab sakiphemi kümtsü sasü paw akiptia phivilo puthugho aghi.

⁷ Balaam no tungkuptsa hipau pitsü: “Balak no Aram lono I sasü ighi, kipela naghuto küdau Moab kükau: ‘Ighilo, I ghenguno Jacob ghusho lo, ighilo, Israelmi müsüinive lo!’

⁸ Ni ye kishino Alhou no ghushomo kemi ghushoni kea? Ni ye kishino Alhou no müsüinimo kemi müsüinini kea?

⁹ Kughengu qhemghai keu tuqu lono I no panoqo ithulu ani, atoghiqo lono I no panoqo ju ani; julo, hipa shiaye ye lomoshi xü ani, eno shiyeqo gholo kihisü amoe!

¹⁰ Khuu no Jacob yeghimkhu kihilu momu kikije abidiu kihi luni kea? I pelo amikuchomi kithi thilu pelo, eno I shekuho ye pano toilu pelo!”

¹¹ Tile Balak no Balaam vilo pi, “No ye kiu shive akea? I ghümi müsüini peniye o sasü ighi kelaye julo, no ye kiumu shimono panoqo kümghave tsüae”

¹² Ikehu pa no khochile, “Ampeu no I vilo kiu pilo pi keno ni ye ti pimoni keshea?”

Tungputsa Akiniu

¹³ Tithiu Balak no Balaam vilo pi, “Kimiyeno Israelmi jukepushi I gholo a-a lakhi lo ighilo. Panongu kümtsü kumono amqo hami likhi ithulu nani. Tileno I ghenguno panongu ghushove tsülo.”

¹⁴ Pa no Zophim luza lo Pisgah Toghi kütsüqa lo pa sasü ikuno tile akiptia tsüni mlape qhi, eno lakhikhi lo amshitsü lakhi ambetsü lakhi pesü mllave.

¹⁵ Balaam no Balak vilo pi, “O kiptia phivilo puthugholo, eno I no wuno Ampeu pütsani.”

¹⁶ Ampeu no Balaam sasü kusho no kiu pikepu keno pive no ishi pi, “Balak lau idewo no hitoi pilo.”

¹⁷ Ikehu pa no ideighi kelo Balak ye Moab sakiphemi sasü paw akiptia phivilo puthugho aghi. Eno Balak no iniju, “Ampeu ye kiu pi kea?”

¹⁸ Tileno Balaam no tungkuptsa hipau pitsü: “Ithulo Balak, inilo, O Zippor nu, o kini I lau kugho puwolo:

¹⁹ Alhou ye timi kumo keke Pa ye mikiveni chemo; momu Pa ye timi nu kumo keke Pa kükümsü kilini chemoe. Pa ye piqhive no shimoveni keshea? Momu Pa ye pive no shikupu moveni keshea?

²⁰ Julo, ni ye kümghatsü peni keu za ithulue: Pa no kümghave tsüake ni ye ti xachile lumlae.

²¹ Pa ye Jacob hasapu ithulu amoe, momu Israel lo aküküpna ithulu amoe. Ampeu panongu Lhou ye pano gholo ani, akükau sütsa ye pano gholo anie.

²² Alhou no Egypt lono panoqo saipeghi Pa ye panoqo ghenguno aghalo mishitsü kibo toike.

²³ Kughengu Jacob shou pipütha keu kiumu kühae, momu atumu kiumu kühae; itehi ye Jacob ngo Israel vilo pi nani, ‘Alhou no kiu shitsü keno julo!’

²⁴ Hipa shiaye julo! Abongshuu toi ithughi ani abongshuu no ithughi akeshi ani; pa no tsüqhi keu lhoxü chukhave eno aji tsüyeve moke kutolo, pa ye ihozü chemoe.”

²⁵ Tileno Balak no Balaam vilo pi, “Panongu müsüini keumu shikevi eno kümghatsü keumu shikevilo.”

²⁶ Ikemu Balaam no khochile, “Ampeu no I vilo pilo pikeu kümtsü shini kepi ni ye o vilo pike kumo keshea?”

²⁷ Balak no Balaam vilo pi, “Itehi I gholo a-a lakhi lo ighilo. Tilau nomu Alhou pulou shi aghi no o pelo I ghenguno panongu müsüini tsü penie.”

²⁸ Tighenguno Balak no Balaam sasü asayeqha juchholu chekeu Peor Toghi kütsüqa lo ikuve.

²⁹ Eno Balaam no pa vilo pi, “I ghenguno hile akiptia tsüni mla tsülo eno amshitsü tsüni, ambetsü tsüni tsülo.”

³⁰ Balaam no pike toi Balak no shivetsü, eno akiptia lakhikhi lono amshitsü ngo ambetsü lakhikhi pesü mllave.