AKIKIHI 22 - Sumi Naga CL (Re-edited) Bible (BSI)

Balak no Balaam Kupuwu

¹ Tithiu Israelmi ye iqesü wuve no Jordan kipelau Jericho ghüngü lo Moab qhalo aghazü shipe ngove.

² Moab kükau Zippor nu Balak no Israelmi no Amorimi shou kiu shive keno chilu kelo,

³ Moabmi ye Israelmi kutomo chekeu jupe shishe msave.

⁴ Eno Moabmi no Midian sakiphemi vilo pi, “Timi kütsasa hipaqo ye amshitsü no aluza lo atsaneghu mzachu akeshi ningu sümxape akeu qhoi kütsave tsüni cheni.” Tighenguno Moab kükau Balak no

⁵ aghinimi hape Aghoki kupunu lo Amawmi yeghi, Pethor lo Beor nu Balaam ake pa vilo pi puwu, “Julo, Egypt lono ashiaye lakhi ighi ani. Panongu no ayeghi küzü luvae eno ni ghakhu kukuu aghazü shi ani.

⁶ Ikehu ighi no timi hipaqo müsüinive tsülo. Kughengu panongu ye I nguno akumtou shi ani. Ishiake I no panongu theqhive no aghakhu lono haleve luvi, kughengu nono khuu kümghatsü cheni keno pa ye mügha cheni, eno nono müsüinive keu ye angusüpu shive chenie.”

⁷ Tighenguno Moabmi ngo Midian sakiphemi no asakiqhi jume pesü wuve no Balaam lau Balak sütsa süghi.

⁸ Balaam no panoqo vilo pi, “Itiji ye hilau ngove lo eno Ampeu no pikeu tsa I no nongu vilo pichileni.” Ikehu Moab lo sakiphemi no Balaam gholo ngove.

⁹ Alhou no Balaam lau ighi no iniju, “Timi o gholo ngo akeqo ye khuno kea?”

¹⁰ Pa no khochile, “Moab kükau Balak no panoqo launo pi puwu ani,

¹¹ ‘Julo, Egypt lono ashiaye lakhi ighi no ayeghi küzü luvae. Itehi ighi no panoqo müsüinive tsülo. Ishiake I no panongu sasü küpüghü no haleve luvike.’”

¹² Alhou no Balaam vilo pi, “Timi hipaqo gholo wu kevilo eno no ye timi hupaqo müsüini kevilo kughengu panongu ye kükümgha timiqo ke.”

¹³ Ikehu Balaam no thanau Balak ghinimi vilo pi, “No ghakhu lo idewove lo kughengu Ampeu no I pelo nongu gholo wupemo nikeu shivae.”

¹⁴ Tighenguno sakiphemi no Balak lau ighi no pi, “Balaam ye ighimo pi anie.”

¹⁵ Itaghi Balak no sakiphemi püzüu puwu keu nguno gihuküzümi alau Balaam lau puwu.

¹⁶ Panongu no Balaam lau ighi no pi, “Zippor nu Balak no pi ani: ‘I lau ighini ke kiunomu o lakhape kevilo,

¹⁷ kughengu I no akiqheu sükümsa o tsüni eno nono pikeu kiu kiumu shitsüni. Ighilo, I ghenguno timi hipaqo müsüinive tsülo.’”

¹⁸ Ikemu Balaam no khochile, “Balak no pa kükaki lo ameshoyi ngo ghükayi akeu kümtsü I tsüveni pinamu, ni ye Ampeu I Lhou no azah tsükeu nguno alau, momu tomove keu mu shimlae.

¹⁹ Ikemu I no qhüiniju anike nongu ye itiji ghi hilau ngovelo, tishianguno Ampeu no I vilo kütau kiuala pikepu ani kemo keno I no ithini.”

²⁰ Tipaji Alhou no Balaam lau ighi no pi, “Timi hipaqo no o sasü wunike ighi aghi aye, ithu no wulo ikemu I no o vilo kiu pini keno ti likhi shilo.”

²¹ Tighenguno thanau inaqhe Balaam no paw khurha shou iku püzü Moabmi sakiphemi gholono wuve.

Balaamw Khurha eno Kungumi

²² Ikemu Balaam no wuche kelo Alhou ye amloideve, eno Balaam no paw khurha shou iku püzü pa qemi kini no pa gholo pa pape chekelo AMPEUw kungumi no pa la khepe ngove.

²³ Ampeuw kungumi no azüta süjope puthugho akeu khurha no ithuluve no alaghi qhive no alu küdau tsüghüsü wuve. Balaam no khurha alaghi lo saideghi nike ghaqhi.

²⁴ Ikelo kungumi huno atsailu kini akeu dolo atu no hula hila putu püakeu lo laghi müghüghüi keu lo puthugho luve.

²⁵ Khurha no kungumi ithulu kehu akupuwu kiyisü wuche kelono Balaam pukhu kiyive tsü. Ikehu Balaam no itaghi khurha ghaqhi.

²⁶ Itaghi kungumi no azüu wuno alaghi kibikhoi keu lo puthugho luve.

²⁷ Khurha no kungumi ithulu püzü iqi ihozüve. Balaam ye amloideve no pa küsü pesü khurha ghaqhi thuve.

²⁸ Tileno Ampeu no khurha kichi khaqhi tsüno tino Balaam vilo pi, “Ni ye o shou kiu shivepi no ye ghuthu küthü I ghaqhi ani kea?”

²⁹ Balaam no pi, “Kughengu nono mbomzümi toi I peitha ani. I u lo azütakikihi aghike aye ni ye o ghiqiveni cheke.”

³⁰ Khurha no Balaam khochile, “Ni ye nono o küxü kupuju lo iku chekeu khurha ke kumo? Ni ye hitoi o peitha cheni keshea?” “Moe” ipi pa no khochileve.

³¹ Tileno Ampeu no Balaam nhethi xükhotsü, eno pa no AMPEUw kungumi azütakikihi pesü alaghi lo puthugho aghikeu ithulu. Balaam no pa gi pishiqhope ayeghi lo ikiqive.

³² AMPEUw kungumi no pa vilo pi, “No ye kushiye ghuthu küthü kutolo ow khurha ghaqhi kea? Julo, ni ye o mjonike ighi ani kughengu o laghi hipau ye I zülo hekibide ke.

³³ Khurha no ni ithulu no ghuthu küthü kutolo tsüghüve, tishi moke aye ni ye o ghiqhive no khurha likhi püxüveni cheke.”

³⁴ Tileno Balaam no AMPEUw kungumi vilo pi, “I no pimivae eno ni ye nono I hachileni ye alaghi lo puthugho akeu mthaveke. Tighenguno itehi, hino o zülo akumou shi aghi aye ni ye idechile woniae.”

³⁵ Ikemu kungumi no ishi pi, “Timi hipaqo sasü wulo, ikemu I no o vilo pilo pikeu likhi pilo.” Ikehu Balaam no panoqo gholo wuve.

³⁶ Balaam ighivae pi Balak no chilu kelo pa no Arnon lughi phivilo Ar phughi lo pa sasü kushoni ye wu, ti ye Moabmi lughi shekhau ke.

³⁷ Balak no Balaam vilo pi, “Ni ye o kupuwu ke kumo kesheno kushiye ighimo kea? Ni ye agho kivi o tsü kümlapu keshea?”

³⁸ Balaam no pi, “Julo, ni ye ighivae! Itehi ni ye pikulupu küka anima? Alhou no I vilo kiu pilo pi keno ni ye tipau pini.”

³⁹ Tishino Balaam no Balak gholono Kiriath-huzoth lo wuve.

⁴⁰ Tile Balak no amshitsü eno ambe ghiqhi no Balaam ngo sakiphemi kukütsü.

⁴¹ Eno thanau Balak no Balaam sasü Bamoth-baal lo iqho, tilauno pa no timi amqo lakhi ithulu.