AKIKIHI 21 - Sumi Naga CL (Re-edited) Bible (BSI)

Arad shou Tokulu

¹ Kughou Canaanmi kükau Arad no Israelmi ye Atharim laghi küdau no cheni pikeu chilu keno, pa no panoqo lewu eno khami küghaluve.

² Tileno Israelmi no Ampeu lau ishi ashoqhi lakhi shi: “Tsala Nono ni pelo timi hipaqo leluvepe aye nino pano phughiqo ikhiphepe O tsükeu shi kümtsü kütsave tsüni.”

³ Ampeu no panongu shoqhi chiluve no panongu pelo Canaanmi shou toluvepe, eno Israelmi no timi tipaqo eno pano phughiqo kütsave tsü. Ikehu tipa-a pesü Hormah ipi kuvetsü.

Alazayi Pighi

⁴ Israelmi no Hor Toghi qhive püzü Edom ghakhu homxasü wuniye Akuhu Züghi küdau cheve. Ikemu ala lo chekelo timiqo ye kutuu khamlave.

⁵ Eno Alhou ngo Moses pama lachile pi, “Nokujo ye kushiye Egypt lono ningu saipe hi asayeqha lono pithive niye ani kea? Kughengu hilau ye achuqupu momu azü mu küha eno ningu ye achuqupu lhoksa hipau chumlae.”

⁶ Tileno Ampeu no timiqo gholo tüghükupu pighi puwu no Israelmi kutomo mighi pithivepe.

⁷ Ikehu timiqo no Moses lau ighi no pi, “Ningu no Ampeu shou eno o shou axine shivae. Itehi ye Ampeu vilo inikhu tsüno apighi hipaqo süwuve tsüpelo.” Ikehu Moses no timiqo ghenguno inikhu.

⁸ Eno Ampeu no Moses vilo pi, “Apighi julho mlape aqhedu shou qhilo, eno khukhumu apighi no mighi püakeu ye ti jukelo viluve nani.”

⁹ Moses no alazayi pesü apighi julho mlape aqhedu shou qhi, eno khukhumu apighi no mighi püaghi keu ye tipau jukelo viluve.

Azükikhe lo Le

¹⁰ Israelmi no iqesü wuve eno Oboth lo aghazü shive.

¹¹ Eno Oboth lono chesü Moab ghüngüu kipela küdau asayeqha, Iye-abarim lo aghazü shive.

¹² Tithiu panongu no chesü Zered khila lo aghazü shi.

¹³ Tilauno panongu ye itaghi iqesü wuve no Arnon ghoki kukuu, Amorimi lughi lono huthu no asayeqha lo aghazü shive, Arnon ye Moabmi ngo Amorimi dolo aghuthu ke.

¹⁴ Tighenguno AMPEUw Aghükishi Kaku lo ishi yepüani, “Suphah lo Waheb, eno Arnon khila,

¹⁵ eno akhila lono aqhe shi iqi tino Ar ghüna kutolo iqi akeu, eno Moab lughi sasü küxape akeu.”

¹⁶ Panongu no tileno iqesü Beer lo wu; Beer zükikhe lono Ampeu no Moses vilo pi ke, “I no azü tsünike timiqo hekütsü lo.”

¹⁷ Tileno Israelmi no ale hipau phe: “O Azükikhe, azü ipeghilo, tipau lau ale phelo!

¹⁸ Sakiphemi no chhukeu zükikhe, Gihuküzümi no pano kükaküsü ngo aküsü pesü chhuphe ke.” Panongu no asayeqha lono Mattanah lo chesü wuve,

¹⁹ Mattanah lono Nahaliel lo wuve, eno tileno Bamoth lo wuve,

²⁰ Bamoth lono Moabmi ghakhu lo akeu khila lo wuve, ti ye Pisgah Toghi phivilo eno tileno asayeqha küdau jupiqi cheni.

Akükau Sihon shou Toluve

²¹ Tithiu Israelmi no Amorimi kükau Sihon lau aghinimi puwu no pipe,

²² “Ningu pelo o yeghi katha wulu pelo. Ningu ye alu momu atsailu lo ilomo eno azükikhe lo azü yetsü moe, ikemu o lughi heche moke kutolo akükau ghüzüla lo likhi no wunie.”

²³ Ikemu Sihon no Israelmi pelo pa ghakhu katha pemoe. Pa no paw ghüshimi hekütsüpe asayeqha lo wuno Jahaz lono Israelmi sasü aghüshi.

²⁴ Ikemu Israelmi no azütakikihi pesü pa theqhive eno aghümi kutomo heqhive tsü eno panoqo yeghi Arnon ghoki lono ahuu Jabbok kutolo qhasü luve, ti ye Ammonmi lughi kutolo, kughengu Ammon lughi ye akumto shi khepe ae.

²⁵ Israelmi no Amorimi phughi kümtsü leluve no tipaqo lo xüsüve eno Heshbon ngo tipau sükümxa lo aphu akeqo kümtsü lo acheuve.

²⁶ Heshbon ye Amorimi kükau Sihonw mishighüna ke, eno ti ye pa no Moab kükau sasü aghü shino Arnon ghoki kutolo pa yeghi kümtsü leluve tsüke.

²⁷ Tighenguno leshemi no ishi phe, “Heshbon lo ighi no ti shiqhelo; Sihonw mishighüna shiqhelo.

²⁸ Heshbon lono ami ipeghi, Sihon phughi lono ami mili ipeghi, Tipau no Moab lo Ar pitileve, eno Arnon lo naghuto munove.

²⁹ O Moab, no ye ahasapuae! O Chemosh, nongu ye kütsavae! No lhou no nopuqo pelo kupokichemi shive peae, eno nongaqo pelo Amorimi kükau Sihon kughumi shive peae.

³⁰ Ikehu nino panoqo kütsavae; Heshbon lono Dibon kutolo; nino Nophah kutolo püghavae; Medeba kutolo ami süve tsüae.”

Akükau Og theqhive

³¹ Hitoi Israelmi ye Amorimi yeghi lo ngoluve.

³² Moses no Jazer eno ti sükümxa lo aphuqo lo pukujumi puwu eno panongu no ti leluve eno Amorimi tile küghüna aghi keqo hapupove.

³³ Tithiu Israelmi ye Bashan lo wuve. Ikelo Bashan lo akükau Og no paw ghüshimi sasü ighi no Edrei lono panoqo lenikeu shi.

³⁴ Ikemu Ampeu no Moses vilo pi, “Pa msa kevilo kughengu I no pa ngo paw timi eno pa yeghi kümtsü o tsüvae eno nono Heshbon lo achekeu Amorimi kükau Sihon lau shike toi pa lau ghi shinani.”

³⁵ Kuchono Israelmi no Og ngo pa nuli eno paw timi lakhimu ghümono pithive eno panongu no pa yeghi qhasü luve.