AKIKIHI 20 - Sumi Naga CL (Re-edited) Bible (BSI)

Miriam Kithi

¹ Aqhi atüghüu lo Israelmi kümtsü Zin sayeqha lo ighi, eno Kadesh lo aghazü shilu. Miriam ye tileno thive eno tilau qhove.

Meribah Zü

² Ikelo aqoaho ghenguno azü kühave kehu timiqo no kumqope Moses ngo Aaron pama mjochile thuve.

³ Panongu no Moses sasü kighe ghi pi, “Ningu ghi ni thiküzümi gholo Ampeu zülono thive keu pavini chekena!

⁴ No ye kushiye Ampeu timiqo sasü asayeqha hileno ningu eno niw pichepighi ghi thive peniye shi ani kea?

⁵ Nokujo ye kushiye Egypt lono ni sasü hi küsakügha yeghi lo ighi ani kea? Hile ye athi, mubuthi, atsaithi, momu khaghatu mu kühae. Eno azü yekepu ghi kühae.”

⁶ Tileno Moses ngo Aaron pama no timiqo launo wuve eno kuposhukulu phiki kulaghi lo puthughove no pama gi pishiqhope ayeghi lo ngove. Ikelo Ampeu juküvü no pama lau ipeghi,

⁷ eno Ampeu no Moses vilo pi,

⁸ “Aküsü ikhilulo eno Aaron nokujo no aqoaho kukumqo lo, tishino panoqo zülo atuqu akeu vilo azü ipeghi penike azah tsülo. Hitoi shipüzü aqoaho eno panow lhoxüqo pelo atuqu lono azü yelu pelo.”

⁹ Ikehu Ampeu no azah tsü ketoi Moses no aküsü ikhiluve.

Moses no Atuqu lo Hepuku

¹⁰ Tishino Moses ngo Aaron pama no atuqu zülo aqoaho kukumqo no Moses no pi, “Inilo nongu hekibidemi: ni pelo nongu ghenguno atuqu hipau lono azü pipetsü penishi ani keshea?”

¹¹ Moses no aküsü peqhe no atuqu shou ghuthu kini ghapuku kelo azü no kupukuno shi ipeghi, eno timi ngo lhoxü kümtsü azü yelu.

¹² Ikemu Ampeu no Moses ngo Aaron pama vilo pi, “Nokujo no I pülümo eno Israelmi zülo Ni ye akimthe kepi ikhilumoe, tighenguno I no tsünie pikeu yeghi lo nokujo ye panoqo sailo moae.”

¹³ Hi no Meribah zü, hileno Israelmi no Ampeu sasü mtomshu eno hipaqo vecheo Pa ye akimthe kepi Pa no piye ke.

Edom Kükau no Lakha

¹⁴ Moses no Kadesh lono Edom kükau lau aghinimi puwu no pipe, “O thiküzüu Israelmi no ishi pi ani: Ningu no akijiksa ghime sholu keu nono ithi ani:

¹⁵ ni puasüqo ye Egypt lo wuno tilau ado kushuo ache eno Egyptmi no ni puasü eno ningu peitha püsae.

¹⁶ Tileno ningu no Ampeu lau ighamku eno Pa no ningu küqa chilutsü püzü kungumi puwu no Egypt lono ningu saipeghi. Eno itehi ningu ye o ghakhu lughi Kadesh lo ani.

¹⁷ Kimiyeno ni pelo o ghakhu veche wulu pelo. Ningu ye alu momu atsailu kathamo, momu azükikhe lono azü yemoe. Ikemu akükau ghüzüla lono wunie. O lughi heche moke kutolo ningu ye ajeu mu piyiu mu wumo nani.”

¹⁸ Ikemu Edommi no khochile, “Nongu ye ni ghakhu kathasü wumlae, tikumo aye nino azütakikihi pesü nongu le nani.”

¹⁹ Tile Israelmi no pa vilo pi, “Nino aghüzümi la lono wuni eno tsala ningu momu niw lhoxüqo no now azü yevetsü aye ame tsüveni. Ni pelo apukhu lono kathaluke likhi shipelo.”

²⁰ Ikemu akükau no pi, “Nongu ye kathamlae.” Eno panongu no Israelmi leniye ghüshimi kumtomi sasü ighi.

²¹ Hitoi Edommi no Israelmi pelo pano ghakhu katha pemoke ghenguno Israelmi ye tileno idechilesü wuve.

Aaron Kithi

²² Israelmi no Kadesh lono izüsü Hor Toghi lo ighive.

²³ Ti ye Edom lughi loke, eno Ampeu no Moses ngo Aaron pama vilo pi,

²⁴ “Aaron ye I no Israelmi tsükeu yeghi lo iloni chemo ke ghenguno pa pelo paw timiqo kukumqo pelo, kughengu nokujo no Meribah lo I zakütsü hebideve ke.

²⁵ Aaron ngo pa nu Eleazar pama sasü Hor Toghi lo iqholo.

²⁶ Tilau no Aaron phiküzü xape Eleazar puuve lo. Eno Aaron ye tilano thive nani.”

²⁷ Ampeu no azah tsüke toi Moses no tishie. Panongu no aqoaho nhethe lono Hor Toghi lo iqhove.

²⁸ Moses no Aaron phiküzü xape Eleazar puuve. Eno tilau naghuto kütsüqa lono Aaron ye thive. Tishino Moses ngo Eleazar pama ye iqighive.

²⁹ Kughou aqoaho no Aaron thivekeu ithive keno, kümtsü no atsala shighi kutolo pa ghenguno mloqa.