AKIKIHI 19 - Sumi Naga CL (Re-edited) Bible (BSI)

Shikimthe keu Yezah

¹ Ampeu no Moses ngo Aaron pama vilo pi,

² “Ampeu no pimheye hi tsü ani: Israelmi vilo amshiti hughai tukutiye kühakeu eno khilemu sasü akümla shimphi keu süghilo pilo.

³ Eno nokujo no tipau pesü achineu Eleazar tsüno ti sasü aghazü khalau ipe püzü pa zülono heqhi pelo.

⁴ Eleazar no aji hami pesü pa uloti no kuposhukulu phiki zülo ghuthu tsüni küzüteni.

⁵ Tishino amshiti yiko, ashicho, aji eno kighinoli kümtsü pesü achineu nhethe lono pitiveni.

⁶ Eno achineu no cedar sü, ayilobo eno huchuyi keu kighikipili ikhipe amshiti piti akeu mi lo vesüni.

⁷ Tishino pa ye pa phimini ishiveni eno azü kuchhuve no aghazü lo ide iloni; ikemu pa ye avelau kutolo mithemo no ani aphi.

⁸ Timi khuu no amshiti piti keno pa phimini ishive eno azü kuchhuveni eno pa ye avelau kutolo mithemo no ani aphike.

⁹ Timi khuu no mithe ani keno pa no amishi kipti yevu xukumqo pesü aghazü khalau akimthe-a lo qhini. Ti ye Israelmiw mithekumo qhukimthe chekeu zü gholo peitha kepushi qhivelo. Hi ye axine kümllagho ke.

¹⁰ Timi khuu no ayevu xukumqo süghi keno pa ye pa phimini ishiveni eno avelau kutolo mithemo no anani. Pimheye hipau ye Israelmi eno pano gholo inaghami akeqo ghenguno ithamo no acheni keu ke.

¹¹ “Khukhumu akithi kumo diluve keu ye atsala tsüni ghenguno achinepu lo mithe move nani.

¹² Pa ye atsala aküthüni eno atsala akütsüniuni, pa ampi qhukimtheni eno tithiu no mithelu nani. Ikemu pa no atsala aküthüni eno akütsüniuni pa ampi qhukimthe mo aye pa ye mithelu monani.

¹³ Khukhumu akithi kumo dilu no pa ampi qhukimthe mo aye, pa ye Ampeu kungo phiki shikitiqe ani, ikehu Israelmi gholono hapheveni; kughengu qhukimthe kepu zü pa shou lepuku mphi kehu pa ye mithelu mphi, eno mithekumo ye pa shou aphi ke.

¹⁴ “Milakhi no aphiki lono thive aye, aphiki tipau lo ilo kemi eno aphiki alou akemi kümtsü atsala tsüni kutolo achinepu lo mithe movae.

¹⁵ Eno aphiki lo abohu khijeno akünha küha keno tipaqo ghi mithe movae.

¹⁶ Khukhumu azütakikihi no ghiqhive keu kumo, momu alhoaye kithi thipüaghi keu kumo, momu timi saghi, momu akumoki buve aye, pa ye atsala tsüni kutolo mithe movae.

¹⁷ Mithekumo ikhive nike ghenguno, axine kipti kümllagho yevu pesü abohu lakhi lo süno azü kütsüghü lesülo.

¹⁸ Tithiu mithe akeu timi no ayilobo pesü azü lo tipau chosü no aphiki shou, tinhemghaqo shou, timi tile akeqo shou, eno khuu no asaghi buve, momu akumo eno akumoki buve keno pa shou küzüte pukulo.

¹⁹ Atsala aküthüni eno akütsüniuni mithe akeu timi huno azü pesü mithekumou shou küzüte pukulo. Tishino akütsüniuni ye pa ye mithe luve nani, pa no aphimini ishive eno azü kuchhuve kethiu avelau ye mithe luve nani.

²⁰ “Tsala mithekumou no pa ampi qhukimthe mo aye, pa ye Ampeu kungo phiki shikitiqe ani kehu Israelmi gholono hapheveni. Qhukimthe kepu zü huno pa shou lepuku mphi kehu pa ye mithelu mphi ke.

²¹ Pimheye hipau ye alholo ghenguno Israelmi sala ke. Timi khuu no qhukimthe keu zü küzüteni keno pa phimini ishiveni, eno khuu no azü tipau diluni keno pa ye avela kutolo mithemo no anani.

²² Kiu kiumu mithekumou no buve keu ye mithe movae, eno khuana no tipau dilu aye avela kutolo pa ye mithe move nani.”