AKIKIHI 18 - Sumi Naga CL (Re-edited) Bible (BSI)

Achinemi ngo Levimi Kümlapu

¹ Ampeu no Aaron vilo pi, “Akimthe-a lo shipimive kelo no eno o nuli eno o limi no amakho pu nani, eno achine kümlapu lo shipimilu kelo no eno o nuliqo no amakho pu nani.

² Eno o gholo no bolomi, Levi laghami pelo no eno o nuli no aphiki lo mla akelo kuphu penike saghilo.

³ Panongu no o kibolomi ngo aphiki shou aghukhemi shipelo ikemu panongu ye akimthe-a lo abohu ngo akiptia phivilo ighipe kevilo, kughengu tishi aye, panongu eno nongu ghi thive nani.

⁴ Aphiki lo kümlapu kümtsü panongu no o sasü mlani ikemu ashoumi ye khumu o phivilo ighi moni.

⁵ No eno o nuliqo likhi no Akimthe-a ngo akümlla-khache khekutoni tishianguno Israelmi shou aloghu ighimo nani.

⁶ Julo, Israelmi gholono I no o lagha Levimi kishephe pesü agho lakhi shi o tsü ani. Panongu ye aphiki lo hukuthu kümla shi penike Ampeu lau ikhiphepe tsüvae.

⁷ Ikemu no eno o nuliqo no akümlla-khache eno shishe Akimthe-a lo hukuthu kümla shini. Achine kümlapu ye agho lakhi shi I no o tsü ani, eno ashoumi khukhumu aphivilo ighi keu ye pithive nani.”

⁸ Tishino Ampeu no Aaron vilo pi, “Julo, Israelmi no kishekimthepe akümllagho shi I tsükeu kümtsü shou jukütsü penike I no o pichetsü ani. Tipaqo pesü I no alholo ghenguno no eno o nuliqo saje shitsü ani.

⁹ Hi shishe akimthe thimeqo ye o saje ke: timi no akümllagho tsükeu kümtsü, athi kümllagho, axine kümllagho, eno pimive keu kümllagho, hi kümtsü no eno o nuliqo saje ke.

¹⁰ Nongu ye akimthe-a lono hipaqo chulu nani. Kiptimi thaqhü no chuni; ti ye akimthe kepi ithilo.

¹¹ Thime hipaqo ghi nonguw shini: timiqow agho, akimchi kümllagho jeli. Hipaqo ye I no alholo ghenguno, no eno o tianuliqo saje shi tsüve ani. O lagha lo achineye lo mithe aghi kemi no chuni.

¹² Thazü, atsaizü, eno athi akiviu, ti ye ipeghi tüghüu kiu Ampeu tsü cheni keno I no o tsüve ani.

¹³ Ayeghi lo axathi pithi tüghüu Ampeu lau süghi keu kümtsü nongu saje shi nani. O lagha lo achineye lo mithe aghi kemi no chuni.

¹⁴ Israel lo thime ikhiphepe Ampeu tsüve keu thaqhü ye o saje shini.

¹⁵ Timi na lhoxü namu punu tüghüu Ampeu tsükeu ye nonguw ke. Tishinamu, timi na lhoxü punu tüghüu mithemo keu ye nongu no qhüchile luveni.

¹⁶ Eno ti qhüchile luni keu ye (aqhi lakhi shiake lono shini) eno ame ye akimthe-a lo shekel kiqi lono shekel pungu, ti ye ghükayi kikihi, gram 50 qhemi.

¹⁷ Ikemu amishi, ambe eno ane piti tüghüu ye qhüchile moni; tipaqo ye akimthe ke. Nongu no tipaqo ji pesü akiptia shou lepukuni eno atha no achuqupu kümllagho shi pitiveni, tino Ampeu lopushi tsüngqüi keu shilo.

¹⁸ Ikemu tipaqo shi ye nongu saje ke, ti ye amlashi ngo aluko ajeu.

¹⁹ Israelmi no Ampeu lau akimthe shi ikhithape tsükeu kümtsü I no no eno o nuliqo saje shi alholo ghenguno tsüve ani. Hi ye I no Ampeu zülono no eno o laghaqo sasü, alholo ghenguno amti puloshoqhi shi anike.”

²⁰ Ampeu no Aaron vilo pi, “No ye panongu yeghi lo o mheghi kühae eno pano mheghi lo o saje khu kevilo. Ikemu Israelmi gholo o mheghi ye Ni Ampeu ke.”

²¹ “Israelmi no chighi saje tsükeu pesü I no Levi laghami mheghi shitsü ani. Hi ye kuposhukulu phiki lo hukuthu kümla shikeu jume ke,

²² tishianguno Israelmi kütami ye kuposhukulu phiki kupunu ighipe moniye ke, tikumo aye panongu ye axine shive no thive nosae.

²³ Levimi no kuposhukulu phiki lo hukuthu kümla shini eno panongu ye panow shikipimi xine punani. Ithamo keu pimheye hi ye ighini keu tiqheli kutolo peni eno Israelmi gholo panongu ye khilemu amheghi ighi moni.

²⁴ Kughengu Israelmiw chighi saje Ampeu tsükeu pesü I no Levi laghami mheghi shi tsüvae. Ikehu panongu ye Israel lo amheghi ighimo nani kepi I no pivae.”

²⁵ Ampeu no Moses vilo pi,

²⁶ “Itaghi Levimi vilo pilo; ‘Nongu no Israelmi launo chighi saje khikhi now shi penike Ampeu no nongu tsükeu ithuluni keno, ti chighi saje lono chighi saje Ampeu tsülo.

²⁷ Nongu no ti tsükeu ye aniqa lo athi hutoi momu atsaizü kütsüghü-a lo atsaizü qole aketoi kihitsü nani.

²⁸ Hipa gholau no nongu no Israelmi launo chighi saje ithulu keu kümtsü lono Ampeu saje shi akümllagho tsülo eno tipau lono Ampeu kümllagho shi achineu Aaron saje tsülo.

²⁹ Nongu no ithulukeu lono küqhaphepe Ampeu tsülo; thokha ithukulu lo saje akiviu ye pesü akümllagho shi tsülo.’

³⁰ Tighenguno Levimi vilo pilo, ‘Nongu no saje akiviu tsüve kethiuno nongu no kütauqo qhilulo eno ti ye aniqa lono ipeghi keu momu atsaizü kütsüghü-a lono tsüghüphelu ketoi kihilo.

³¹ Nongu eno no kibolomi no khile khileno mu chulu nani, kughengu ti ye nongu no kuposhukulu phiki lo hukuthu kümla shikeu jume ke.

³² Nongu no tipau lono akiviu pesü Ampeu lau tsüve aghi aye nongu ye chukelo kiumu akipimi shimo nani. Ikemu Israelmiw akimthe thimeqo shipixi kevilo, tikumo aye nongu ye thive nani.’”