AKIKIHI 17 - Sumi Naga CL (Re-edited) Bible (BSI)

Aaron Qheküsü

¹ Ampeu no Moses vilo pi,

² “Israelmi vilo ali lakhi lo atou lakhikhi no aküsü lakhikhi pesü ighilo pilo, ti ye aküsü chighikini. Tipaqo lo pütüta je yepuku pelo,

³ Eno Levi lagha küsü loye Aaron je yepuku lo. Kughengu ali lo atou ghenguno aküsü lakhi shinani.

⁴ Tishino kuposhukulu phiki lo puloshoqhi bohu zülo I no o pütsa cheke-a lo qhivelo.

⁵ Tileno I no khuu kisheni keno, pa küsü huno mini ipeghive nani. Tishikeu lono Israelmi no o shou muchho chekeu I no lakhave tsüni.”

⁶ Moses no Israelmi pütsa eno atomi kümtsü pütüta li kiqi lono aküsü lakhikhi, aqolo chighikini pa tsü. Eno Aaron küsü ghi tipaqo gholo qhie.

⁷ Tithiu Moses no aküsüqo pewo puloshoqhi phiki lo Ampeu zülo qhive.

⁸ Thoghiu Moses no aphiki lo iloghi kelo Levi lagha züqhushi akeu Aaron küsü huye mini ipeghi no puile aghi eno almond xathi nive ghi pithi akeu ithulu.

⁹ Ikehu Moses no aküsü kümtsü ikhipe Ampeu zülono Israelmi piye. Panongu no juve no pütüta küsü ikhichile luve.

¹⁰ Ampeu no Moses vilo pi, “Hekibidemi ghenguno amchipu shi ghi Aaron küsü ikhichile süwo Puloshoqhi bohu zülo qhilo, tishianguno panongu kümchho tave peni, tikumo aye panongu ye thive nani.”

¹¹ Ampeu no azah tsüke toi Moses no shive.

¹² Eno Israelmi no Moses vilo pi, “Julo, ningu ye püghave niae, ningu ye thive niae, ningu ye thive niae.

¹³ Khukhumu Ampeu phiki kupunu ighi keu ye thive nanie. Ningu kümtsü thiveni akeshea?”