AKIKIHI 16 - Sumi Naga CL (Re-edited) Bible (BSI)

Korah Hekibide

¹ Tipa ghuloki lo, Levi nu Kohath nu Izhar nu Korah, eno Reuben laghami Eliab nu Dathan ngo Abiram, eno Peleth nu On ishi,

² hipaqo no Israelmi hoho lo akivishi ithi chekemi saphetomi pano 250 hekütsü no Moses hebide thuve,

³ Panongu no Moses ngo Aaron zülo kumqo luve püzü pama vilo pi, “Nokujo ye ihulovae! Kughengu ahohomi kümtsü no akimthemi ke eno Ampeu ye ningu kümtsü gholo anie. Tighenguno nokujo ye kushiye nokujo likhi nokujo pesü AMPEUw ahohomi kütamiqo nguno akiqheu kepi pükha ani kea?”

⁴ Moses no hi chilu kelo, pa ye ayeghi lo iluqi pishiqhope inikhu auve.

⁵ Tishino pa no Korah ngo pa gholo chekemi vilo pi; “Ampeu no thanau no khuu no Paw keno piye nani; khuu no akimthe keno, Pa no Pa phivilo saghi nani. Pa no khuu kisheluni keno, Pa phivilo saghi nani.

⁶ Korah eno o gholo kichemi; Nongu ye amikhu ikhilu lo,

⁷ eno thoghiu, Ampeu zülono tile ami küiqü pukulo eno tileno Ampeu no khuu kisheni keno, Pa no Pa phivilo saghi nani. Levi nuli! Nongu ye ihulovae!”

⁸ Moses no Korah vilo ishi pikibe, “Hi inilo nongu Levi laghaqo!

⁹ Nongu ye Israel Lhou no Israelmi kümtsü dolono nongu kütashi qhikeu hu jukuloti ani keshea? Ampeu no nongu Pa phivilo saighi keu, Pa phiki lo hukuthu kümla shipe keu eno ahohomi zülono Pa lau akümlla kümla shipe keu jukuloti ani keshea?

¹⁰ Pa no nongu eno no thiküzümi Levi laghami kümtsü Pa phivilo kishepe saighi keu jukulotive püzü itehi nongu ye achinemi kümla ghi luve nike pükapütsa ani kena lae!

¹¹ Tighenguno nongu eno nongu papemi no kumqo akeu ye Ampeu shou hebidevae. Aaron ye khu keno pa lau muchho ani kea?”

¹² Tithiu Moses no Eliab nu Dathan ngo Abiram pama kupuwu ikemu pama no ishi pi, “Nikujo ye ighimoe!

¹³ Nono akichhizü ngo akhingozü qowu akeu yeghi lono ningu sasü ipeghi püzü asayeqha lono ni pithive niye akeu likhi kumono ni shou sakipheu shiniye ani keshea?

¹⁴ Ti likhi kumono no ye akichhizü ngo akhingozü no qowu akeu yeghi lo ningu sailoghi mphie momu ni mheghi shipenike aluza ngo atsailu ni tsümphie. No ye timi hipaqo nhethi kiyikhave tsüni keshea? Nikujo ye ighimoe.”

¹⁵ Moses ye agha ideve eno Ampeu vilo pi, “Timi hipaqo kümllagho ikhilutsü kevilo. Ni ye panoqow khurha lakhimu lumphie momu lakhimu ghüza mphie.”

¹⁶ Moses no Korah vilo pi, “Thoghi tsala lo, no eno o papemi kümtsü Ampeu zülo hekütsülo, eno Aaron ghi tilehi ighi peni.

¹⁷ Panongu kümtsü pütüta mikhu eno axokütsüngü Ampeu zülo peighi pelo, ti ye pano 250 kümtsü; eno Aaron nokujo ghi peighilo.”

¹⁸ Ikehu kümtsü pütüta mikhu lo ami küiqü no axokütsüngü süpe ighi eno Moses ngo Aaron pama gholono kuposhukulu phiki kulaghi lo puthughope ngove.

¹⁹ Eno Korah no ahohomi kümtsü hekütsü pesü aphiki kulaghi lo Moses ngo Aaron pama lau jupuwo ghi puthugho luve. Ikelo Ampeu juküvü no ahohomi kümtsü lau ipeghi.

²⁰ Ampeu no Moses ngo Aaron pama vilo pi,

²¹ “Timi hipaqo launo kütüta shi ngove lo tishianguno I no panoqo kütsaveni ke.”

²² Ikemu pama no ayeghi lo pishiqho ghi itsaqi no pi, “O Alhou, timi ghungu kümtsü shou Alhou, timi lakhi xine ghenguno no ye ahohomi kuchopu shou agha ideni keshea?”

²³ Ampeu no Moses vilo pi,

²⁴ “Ahohomiqo vilo pilo, Korah, Dathan eno Abiram noqo ghazü lono wuvelo pilo.”

²⁵ Moses no Dathan ngo Abiram pama lau wue eno Israelmi sakiphemi ghi pa papesü wue.

²⁶ Eno Moses no timiqo vilo pi, “Kimiyeno timi kixikilami hipaqo launo putou ngove lo eno hipaqo nhemgha kiumu bu kevilo, tikumo aye nongu ghi panoqo xine gholono joleve nosake.”

²⁷ Tighenguno panongu no Korah, Dathan eno Abiram ghazüqo launo wuve ke. Ikelo Dathan ngo Abiram pama ye pama phiki lono khalacheu ipeghi püzü pama nipu nuliqo sasü akulaghi lo puthugho ake.

²⁸ Moses no ishi pi, “Hipau lono nongu no ithi nanike Ampeu no hipaqo kümtsü shipeniye I puwuke eno I likhi I no kishelu keu lono hipaqo shi anike kumoe.

²⁹ Tsala timi hipaqo no timi kümtsü no thiche ketoi thi aye momu alhoaye kithi thi aye, Ampeu ye I puwu püamoe.

³⁰ Ikemu tsala Ampeu no paküta keu kiuala shino, ayeghi no ikothape muku luve no panongu gholono panow pichepighi kümtsü munove aye, eno tishikeu lono panongu ye aküxü no kithimi yeghi lo iqive aye, tileno timi hipaqo ye Ampeu milive keqo kepi nongu no ithilo.”

³¹ Pa no atsa pive kemtsa panongu qhou ayeghi no mpakhove.

³² Eno ayeghi mpakho keu lono Korah ngo pa gholo kichemi ngo tinhemgha kümtsü munosüve.

³³ Tishino panongu ye aküxü no kithimi yeghi lo iqive eno ayeghi no panongu shou nhaluve eno panongu ye aqo-aho zülono hauve.

³⁴ Eno tilehi Israelmi akeqo no tipaqo küqa chilu kemtsa kuha khave eno panongu no ishi pi, “ayeghi no ningu ghi munove nosae!”

³⁵ Tithiu Ampeu launo ami ipeghi püzü timi pano 250 axokütsüngü piti akeqo piti khave.

³⁶ Tithiu Ampeu no Moses vilo pi,

³⁷ “Aaron nu Eleazar achineu vilo pi püzü ami lono amikhuqo ikhiphevepe lo. Tishino amibalu pesü aqha kümtsü aghacheu kutolo pevelo kughengu ti ye akimthe shivae.

³⁸ Eno hi khunoqo pano xine vecheo thive ake keno, panow amikhuqo ye hephape akümlla-khache küküzüpu mlave lo kughengu panongu no tipaqo pesü Ampeu zülo qhivetsü kehu tipaqo ye akimthe shivae. Tino Israelmi ghenguno amchipu shiniae.”

³⁹ Ikehu achineu Eleazar no amikhuqo ikhilu püzü tipaqo hepha pesü ipumhei shino akümlla-khache küküzüpu shi mlave,

⁴⁰ eno tino Israelmi lau amchipu shiche pelo; ti ye Aaron kughuko kumo aye, ashoumi ye khumu axokütsüngü piti nike Ampeu zülo ighimlae ipikeu kiqi shipelo tikumo aye, Korah ngo paw timiqo toi kütsave nani, hi ye Ampeu no Moses vecheo Eleazar vilo pi keu ke.

⁴¹ Ikemu tishiwo thoghiu ye aqoaho kümtsü no Moses ngo Aaron pama shou muchho ghi pi, “Nokujo ye AMPEUw timi pithive tsüae.”

⁴² Kughou panongu no Moses ngo Aaron pama ghechile ghi kumqo luve keno, panongu no kuposhukulu phiki küdau ighi kelo khüngküsü no tipau küzüpho luve eno Ampeu juküvü no panongu lau ipeghi.

⁴³ Moses ngo Aaron pama no kuposhukulu phiki zülo puthugho luve,

⁴⁴ eno Ampeu no Moses vilo pi,

⁴⁵ “Timi hipaqo launo putosü luvelo tishianguno I no paikhavi panoqo kütsaveni!” Ikemu Pama no ayeghi lo agi pishiqhope itsaqive,

⁴⁶ Eno Moses no Aaron vilo pi, “O mikhu ikhilu püzü akümlla-khache lono ami küqüpe süluve lo eno axokütsüngü tipau shou bepüzü mtazü tipau pesü timiqo lau wulo eno panoqo ghenguno aghakishi kümlla tsüve lo kughengu Ampeu loghu ipeghive no püsa huthuvae.”

⁴⁷ Ikehu Moses no pi keu kiqi lono Aaron no amikhu ikhipesü timi kumqo ake mta lo poilo ke ikelo kuchono püsa huthuve aghi. Pa no axokütsüngü pesü timiqo ghenguno aghakishi kümlla tsüve.

⁴⁸ Eno pa no küxümi ngo kithimi dolo puthughope ngoluve no püsa lakhave.

⁴⁹ Timi thive keqo kihiju kelo 14,700 aghi, ti ye Korah no hebide keu lono thive kemi ye kihisü amoe.

⁵⁰ Kughou püsa huno tave keno Aaron no xaidesü kuposhukulu phiki kulaghi lo Moses lau wuve.