AKIKIHI 15 - Sumi Naga CL (Re-edited) Bible (BSI)

Aghakishi Yezah

¹ Ampeu no Moses vilo pi,

² “Israelmi pütsa no pilo, Kughou I no nongu tsükeu yeghi lo nongu no ighini,

³ eno ashoqhi shikupu keu momu pulokini kümllagho momu tiqhetini ghulhu ghenguno now lhoxü loji lono achuqupu kümllagho, akipti kümllagho, aghakishi kümllagho pesü Ampeu lopushi tsüngqüi tsüni keno,

⁴ khuu no akümllagho pesü ighi ani keno, pa no ashomkhu akiviu ahu kini, thazü ahu lakhi gholo kiteve keu pesü Ampeu tsüni;

⁵ eno ambe lakhi pesü akipti kümllagho momu aghakishi kümllagho shi atsaizü ahu kini gholono tsüni.

⁶ Kughou ambetsü lakhi pesü mllani keno ashomkhu akiviu ahu bidi pesü thazü ahu lakhi-tüxa lo kunuve no mllani.

⁷ Atsaizü kümllagho ghenguno thazü ahu lakhi-tüxa pesü Ampeu lopushi tsüngqüi mlla lo.

⁸ Kughou nono amshitsü pesü akipti kümllagho momu ashoqhi shikupu keu ghakishi momu külakishi kümllagho shini keno,

⁹ amshitsü gholo ashomkhu akiviu ahu tsügho pesü thazü ahu kini lo kunuve no mlla lo.

¹⁰ Tishino thazü ahu kini pesü atsaizü kümllagho Ampeu lopushi tsüngqüi tsülo.

¹¹ “Amshitsü, ambetsü, ambeti, momu ane pesü hitoi shi mlla lo.

¹² Nongu no lhoxü khije pesü mlla namu, nongu ye hipau kiqi lono shilo.

¹³ Israelmi kümtsü no achuqupu kümllagho pesü Ampeu lopushi tsüngqüi mlla kelo, hipau kiqi lono shini.

¹⁴ Tsala inaghami nongu gholo ado ikhonhei akemi momu akütsa shi ngove kemi namu, Ampeu lopushi tsüngqüi achuqupu kümllagho pesü mllanishi aye, pa ghi nongu toi shipelo.

¹⁵ Tiqheli kümtsü lo nongu eno inaghami nongu gholo akemi kümtsü ghenguno akhuaye lakhishi pechelo. Ampeu zülo nongu eno inaghami kümtsü aphiphie.

¹⁶ Nongu eno no gholo inaghami akemi ghenguno ayezah ngo pimheye aphiphi shini.”

¹⁷ Ampeu no Moses vilo pi,

¹⁸ “Israelmi vilo pilo, Kughou I no nongu sasü iloche keu yeghi lo ighini,

¹⁹ eno nongu no tilehi achuqupu ipeghi keu chuni keno, nongu ye Ampeu lau agho ikhithape tsülo.

²⁰ Ashomkhu kunu kelo ashopa atüghüu ye ikhiphe tsülo; ti ye aniqa lono athi ikhiphe tsüke toi shilo.

²¹ Tiqheli kümtsü lo nongu ye ashomkhu kunu kelo ashopa atüghüu ye ikhiphepe Ampeu tsülo.

Mthakeu Kipimi Yezah

²² “Tsala nongu no püthapütsano kumono Ampeu no Moses tsükeu zakütsü hipaqo pemlave no pimive aye,

²³ ti ye Ampeu no Moses vecheo azah nongu tsüke tsalani no huthusü tiqheli kupuju lo,

²⁴ aqoaho no mthano nongu no shipimive aye, aqoaho kümtsü no lhoxü loji lono amshitsü lakhi pesü Ampeu lopushi tsüngqüi keu kipti kümllagho tsüni, ti ye ayezah kiqi lono athi kümllagho eno atsaizü kümllagho, eno tipau gholono axine kümllagho shi anetsü lakhi tsüni.

²⁵ Achineu no Israelmi qoaho kümtsü ghenguno lokichile ghakishi shini eno tithiu no panongu kipimi qhive tsüni, kughengu ti ye pimive keu kehu panongu no pano kipimi ghenguno achuqupu kümllagho ngo axine kümllagho pesü Ampeu lau süghive ake.

²⁶ Tileno Israelmi qoaho eno inaghami pano gholo akemi kümtsü kipimi qhivetsü nani, kughengu kümtsü no akipimi shive ake.

²⁷ “Tsala milakhi no mthano axine shive aye, pa ye ane ali ampe lakhi shi akeu pesü axine kümllagho shini.

²⁸ Eno achineu no Ampeu zülo timi püthapütsano kumono pimive keu ghenguno lochile tsüni, eno pa kipimi ye pevetsü nani.

²⁹ Israelmi na, inaghami no gholo akemi namu hipa vehu loye ayezah aphiphi shini.

³⁰ Ikemu khuu no püthapütsano axine shiveni keno Israelmi na inaghami namu, pa ye Ampeu hebidevae, tighenguno timi tipau ye aqo gholono kileve lo.

³¹ Kughengu pa ye Ampeu no kiu pi keno milivae eno püthapütsano Pa yezah hephovae, pa ye aqo gholono kileveni eno pa kipimi ye pa shou ikuve peni.”

Sabbath Heküxami

³² Israelmi no asayeqha lo chekelo, timi lakhi no Sabbath tsala lono asü kiche cheghikeu ithulu.

³³ Pa ithulu keqo no pa küghape Moses ngo Aaron eno aqoaho lau saghi.

³⁴ Pa shou kiu shikepu keno mtsümishei mono akehu panongu no pa khathave.

³⁵ Tile Ampeu no Moses vilo pi, “Timi hu pithivelo; aqoaho kümtsü no aghazü khalau no atu pesü pa veqhive lo.”

³⁶ Ikehu aqoaho kümtsü no Ampeu no azah tsüke toi timi hu saipe aghazü khalau no atu pesü veqhive.

Aphimini lo Akighikipili

³⁷ Ampeu no Moses vilo pi,

³⁸ “Israelmi vilo tiqheli kupuju lo pano phimini she lo sükepu akighikipili mla eno atsüla kighikipili pesü aphishe lo tshülo pilo.

³⁹ Ti no nongu pelo Ampeu zakütsü kümtsü kümsüchile luno pelupe nani, tishikeu lono nongu ye I launo tsüghüsü wuve no kütüqhami shiuve monani.

⁴⁰ Nongu no hitoi I zakütsü kümtsü kümsülu no pape eno Ampeu lau akimthe shinani.

⁴¹ Ni ye Ampeu nongu Lhou, nongu Lhou shiniye Egypt lono nongu saipeghi: Ni ye Ampeu nongu Lhou ke.”