AKIKIHI 14 - Sumi Naga CL (Re-edited) Bible (BSI)

Timiqo no Hebide

¹ Tile aqoaho kümtsü no asütsa süqhepe puthotsü mloqa.

² Eno Israelmi kümtsü no Moses ngo Aaron shou muchho eno pi, “Ningu ye Egypt lou no thiveke pavini chekeghi lae! Momu hipau sayeqha lono thiveke pavini chekeghi lae!

³ Ghüyi lono woveni keghi kushiye Ampeu ye hipau yeghi lo ningu saighi ani kea? Ningu nipu anuliqo ye küghape wuve niae. Ningu ye Egypt lo idewove keu pavi moni keshea?”

⁴ Eno panongu dolo ishi pikile, “Ningu sakipheu lakhi kisheve no Egypt lo idewoveni nolo.”

⁵ Ikelo Moses ngo Aaron pama no Israelmi qoaho kümtsü zülono iqi agi no ayeghi daluve.

⁶ Eno ayeghi pujuwu kemi gholo Nun nu Joshua ngo Jephunneh nu Caleb pama no pama phimini süxüve

⁷ eno aqoaho vilo pi, “Ayeghi khikhi nino pujuwu keno ti ye akighiche ke.

⁸ Ampeu mlokiqi ningu lau aghi aye, Pa no akichhizü ngo akhingozü qowu akeu yeghi tile ni sawu no ningu tsüve nani.

⁹ Ampeu hebide keu likhi shikevilo. Eno tilau xüküami msa kevilo, kughengu nino asho chu akeshi mlalei pano munove nani. Ampeu no ni gholo ani, eno panow sükusho ye ikhipe wuvae; panongu msa kevilo.”

¹⁰ Ikelaye aqoaho kümtsü no atu pesü panoqo veqhi niye shiuve, ikemu Ampeu juküvü no Aphiki lo timi kümtsü zülo ipeghive.

¹¹ Ampeu no Moses vilo pi, “Timi hipaqo ye khitohi I jukünatha anani kea? Eno I no panongu gholo amchipu kümtsü mlave pülaghi panongu ye khitohi I pülü mono anani kea?

¹² I no püsa pesü panoqo shou puwuni eno pano mheghi luve tsüni, ikemu I no panongu nguno akuloghiu eno akumtou shiye lakhi o launo ipeghilu penie.”

Moses no Qhüiniju

¹³ Ikemu Moses no Ampeu vilo pi, “Tishiaye Egyptmi no ti chilu niae, kughengu Nono O kükakumto pesü panongu gholono timi hipaqo saipeghi püani kehu

¹⁴ panongu no hile xüküami vilo piveni ake. O Ampeu, hile xüküami ghi Nono timi hipaqo gholo akeu chiluvae; puchou no khüngküsü tsükucho eno putho lono ami tsükucho shino Ow khüngküsü no timiqo khonhape pano züu wukeu, eno agi no agi kithepe No Ampeu ithulu chekeu ithi ani.

¹⁵ Ikehu Nono milakhi mu ghümono qhoi pithive aye O juaje chiluve keu shiyeqo no ishi pi nani,

¹⁶ ‘Ampeu ye timi hipaqo sasü Pa no tsünie pi tushoqhi keu yeghi lo ilomlave kehu asayeqha lono pithivae.’

¹⁷ Tighenguno kimiyeno Nono ishi piqhi püake toi O küka pephe piye tsülo,

¹⁸ ‘Ampeu ye asheshino amloide cheni eno iqemokeu kikimiye no kupukuno, akipimi eno axine qhivetsü cheni, ikemu pimive keu xine ye khilemu nuxatsü mono atianuli tiqheli aküthüu abidiu kutolo pekishe nani.’

¹⁹ Nono Egypt lono hi kutolo timi hipaqo kipimi qhivetsü ketoi kimiyeno Ow iqemokeu kikimiye kije lono timi hipaqo kutokumo peve tsülo.”

Alhouw Küghakütha Tsa

²⁰ Tishino Ampeu no pi, “O tsa kiqi lono I no akipimi qhive tsüae.

²¹ Ikemu I juküvü no ayeghi kümtsü yepüvü anani ke Ni Xüküau no hi piqhi ani,

²² Egypt lo eno asayeqha lo khunono Iw amchipu jeli eno I juküvü ithulu keghi ghuthu chighi piqi I peju eno I hebide keno, tipaqo lakhimu

²³ I no pano puasü tsünie pi tushoqhi keu yeghi ithulumo nani. I jukünatha kemi khumu ti ithulumo nani.

²⁴ Ikemu I qeu Caleb ye pa mlo küta eno kuchocho I pape kehu pa no ayeghi khile wu püani keno tile I no pa sawuni, eno pa polo kughukomi mheghi shive tsüni.

²⁵ Itehi ye ishilo, Amalekmi ngo Canaanmi no akhila lo küghüna ani kehu thoghiu nongu ye tsüghüsü Akuhu Züghi la küdau no asayeqha lo wuvelo.”

²⁶ Ampeu no Moses ngo Aaron vilo pi,

²⁷ “I no hi kixikila qoaho kumchho chiluve ake panongu ye khitohi I shou muchho anani kea?

²⁸ Panoqo vilo pilo, ‘Ni Xüküau Ampeu no shuphe ani, nongu no kiu I shou pipukuve akeno I no nongu lau shitsüni:

²⁹ nongu gholo ampe muku nguno kunguu kihiküsü lo akemi khunoqo no I shou muchho keno, kümtsü hipau sayeqha lono ikiqi thive nani,

³⁰ I no nongu pelo khile küghüna penike tushoqhi keno, tipau yeghi lo Jephunneh nu Caleb ngo Nun nu Joshua pama kumo aye khunomu ilolu moae.

³¹ No tianuli hakho luvetsü nanie pi nongu no pi kemu I no panoqou sailo nani, eno panongu no akütsashi nongu no milive keu yeghi lo ngove nani.

³² Eno nonguu ye hipau sayeqha lono thive nani.

³³ No tianuliqo no asayeqha lo ampe lhobidi itsüche nani, eno no mikuchokumo ghenguno nongu kümtsü asayeqha lono thikhave moke kutolo panonguu no ime anani.

³⁴ Nongu no atsala lhobidi lono ayeghi puju ketoi atsala lakhi no ampe lakhi kiqi shino nongu ye ampe lhobidi no xine makho xapu niae, tileno nongu no I mlokiqi kumo ithi nani.’

³⁵ Ni Ampeu no pivae. Kixikila qoahomi khunoqo no küqhape I mjochile keno kümtsü lau I no kuchou no ishi nani: panongu ye asayeqha hipau lono kishekha no thive nani.”

³⁶ Tileno Moses no ayeghi puju wupe kemi khunoqo no akimki shepe shino aqoaho pelo Moses lau muchho thuvepe keno,

³⁷ akimki shepe shisü ighi keqo ye püsa vecheo Ampeu zülono thive.

³⁸ Eno tipaqo dolo Nun nu Joshua ngo Jephunneh nu Caleb pama likhi ghülue.

Israelmi Theqhive

³⁹ Kughou Moses no hipa tsa pesü Israelmi vilo pi keno, kümtsü no shishe mloqauve.

⁴⁰ Panongu no thanau inaqhe itheno ithu ato yeghi lewuni ke ishi pi, “Ningu ye Ampeu no piqhi keu yeghi lo iqho nike hi cheae, kughengu nino axine shiveke.”

⁴¹ Ikemu Moses no pi, “Nongu ye tomoni keghi kushiye Ampeu zakütsü hexa ani kea?

⁴² Ampeu ye nongu gholo kühake iqho kevilo, tikumo aye no ghümi zülo ikiqive nanie.

⁴³ Kughengu Amalekmi ngo Canaanmi no nongu sasü küpüghü no nongu ye ghüyi lono wove nani. Nongu no Ampeu papemo no tsüghüve kehu Pa ye nongu gholo wumo nanie.”

⁴⁴ AMPEUw Puloshoqhi Bohu pina Moses pinamu aghazü qhimo keghi panonguu no tsüikhomo ato yeghi lo iqho nike pulo auve.

⁴⁵ Ikehu Amalekmi ngo Canaanmi tilau küghüna akemi no hale iqighi no panoqo theqhive, eno Hormah kutolo hasü wuve.