AKIKIHI 13 - Sumi Naga CL (Re-edited) Bible (BSI)

Canaan lo Pukujumi Puwu

¹ Ampeu no Moses vilo pi,

² “Canaan yeghi khikhi I no Israelmi tsüniye ani keno ti puju kepushi no ye alagha lakhikhi lo alitomi puwulo.”

³ Ikehu Ampeu no azah tsüke toi Moses no Paran sayeqha lono Israelmi khunoqo alitomi keno panongu puwu.

⁴ Panongu je ye: Reuben shiaye lono Zaccur nu Shammua;

⁵ Simeon lono Hori nu Shaphat;

⁶ Judah lono Jephunneh nu Caleb;

⁷ Issachar lono Joseph nu Igal;

⁸ Ephraim lono Nun nu Hoshea;

⁹ Benjamin lono Raphu nu Palti;

¹⁰ Zebulun lono Sodi nu Gaddiel;

¹¹ Joseph lono (ti ye Manasseh shiaye), Susi nu Gaddi;

¹² Dan lono Gemalli nu Ammiel;

¹³ Asher lono Michael nu Sethur;

¹⁴ Naphtali lono Vophsi nu Nahbi;

¹⁵ Gad lono Machi nu Geuel.

¹⁶ Moses no ayeghi puju penike puwu kemi ye hipaqo ke. Pa no Nun nu Hoshea je pesü Joshua kukideve tsü.

¹⁷ Canaan yeghi puju penike Moses no panongu puwu no ishi pi, “Hileno Negeb lo iqho no itaghi ato yeghi lo wulo,

¹⁸ eno ayeghi ye kiu toi, tilau timi küghüna akemi ye akumto keo miqemlei, aghulo likhi keo kutomo ani keno julo,

¹⁹ pano ghüna-a ye alo kemo keno, eno aphughiqo ye aliwo kumto no putukha püani kemo keno,

²⁰ momu ayeghi ye kinikülü keo athokha, eno asüboqo ani kemo keno julo. Amlo kumto shino tilau xathi hami xope ighilo.” Hi ye atsaithi pithi tüghüu ghuloki shi ake.

²¹ Ikehu panoqo no ahuu iqhove no Zin sayeqha lono Lebo-hamath phivilo Rehob kutolo puju.

²² Tipa züuno panongu no Negeb lo iqhove no Hebron lo ighi. Tile Anak kughukomi Ahiman, Sheshai eno Talmai laghami no küghüna acheghi. (Hebron ye Egypt lo Zoan nguno ampe tsüni züuno aphughi shiveke,)

²³ Panongu no Eshcol Khila lo ighi no tile atsaithi pho lakhi akeu loka michepe asü chuxusü no mikini no kuhope; eno khaghatu ngo mubuthi ghi hami xope ighi.

²⁴ A-a tipau pesü Eshcol Khila kuvetsü, kughengu tileno Israelmi no atsaipho michelu ke.

Pukujumi Sütsa

²⁵ Atsala lhobidi thiu ayeghi pujuwu kemi no idechile ighi.

²⁶ Eno Israelmi no Paran sayeqha lo Kadesh lo akelono pukujumi no Moses ngo Aaron eno aqoaho lau ighi. Panongu no ithulu keu sütsa pewo aqoaho vilo pi, eno tilau xathi pesü panongu piye.

²⁷ Eno Moses vilo pi, “Nono ayeghi khile ningu puwu keno nino wujuke. Tile ye akichhizü ngo akhingozü no qowu ani, eno tilau xathi hi anie.

²⁸ Tishimu tilau küghüna akemi ye choshiyi, eno aphughiqo ye kijeje eno putukhape ani. Tipau gholo Anak kughukomi tilau akeu nino ithulue.

²⁹ Negeb yeghi lo Amalekmi no ani. Hittimi, Jebusimi, eno Amorimi no ato yeghi lo ani. Canaanmi no azüghi phivilo eno Jordan ghoki sükümxa lo anie.”

³⁰ Tile Caleb no Moses zülono timiqo ghasüve no pi, “Ningu itehi no wu püzü khasü luveni nolo, kughengu ningu ye ti theqhi luve nani.”

³¹ Ikemu pa sasü wu kemi no pi, “Ningu ye tipaqo sasü küpüghü mlae, kughengu panongu ye ningu nguno akumtoue.”

³² Ikehu panongu no ayeghi pujuwu keu lo akumou sütsa pewo Israelmi lau külhave ghi pi, “Ayeghi khikhi nino puju niye wu keno, tipau ye tile xüküami munove cheni, eno tile xüküami nino ithulu kemi kümtsü shishe chuqumghaie.

³³ Tinguno alau nino Anak laghami shishe sübosüghimi ghi ithulu, ikelo ningu ye panongu zülo tülhaqu qhemi toive, panongu ghi titoi ningu ithuluni cheke.”