AKIKIHI 12 - Sumi Naga CL (Re-edited) Bible (BSI)

Miriam ngo Aaron no Moses Lachile

¹ Moses no Cush ghalimi sasü külave kehu Miriam ngo Aaron pama no pa lachile thuve.

² Pama no pi, “Ampeu ye kuchou no Moses vecheo likhino pütsa cheni keshea? Pa ye ni vecheo ghi pütsa chenike kumo?” Eno Ampeu no ti chiluve.

³ Moses ye ayeghi lo timi kümtsü nguno mtshaivü kemie.

⁴ Paikhavi Ampeu no Moses eno Aaron ngo Miriam vilo pi, “Khalau ipeghilo, no küthü, eno Kuposhukulu Phiki lo ighilo.” Pano küthü no aghazü lono ipeghi.

⁵ Ikelo Ampeu no khüngküsü tsükucho lono iqi Aphiki kulaghi lo puthughove no Aaron ngo Miriam pama ku kelo pama no azüu ighi.

⁶ Ampeu no pi, “I tsa inilo: Nongu gholo tungkupmi aghi kelo Ni Ampeu no I pesü kungunhetsü lono pa lau kilethitsü, eno asamou no pütsa cheni.

⁷ Ikemu I qeu Moses lau ye tishimoe. Pa ye pükhübekulupu shi Iw timi kümtsü jukuto cheni.

⁸ Ni ye aholeu no kumono pa sasü agi no agi thepe küptsa cheni, eno pa no mtsümishei I koghe ithulu cheni. Imaye kishino nokujo ye I qeu Moses shou lakichile tsa pini keu msa move kea?”

⁹ Ampeu ye pama jupe amlo ideve no wuve.

¹⁰ Kughou khüngküsü no Aphiki lono ikuve keno, Miriam yiko lo mürasü toi apügha ipeghive. Aaron no li küdau jupuwo kelo julo, li ye apügha pu aghive.

¹¹ Pa no Moses vilo pi, “O, I mpeu, nino mbomzü shi axine shiveke ghenguno ni ghime kevilo.

¹² Li pelo aza po lono aphi tüxa tsüitave no akithi punuqhi keu toivepe kevilo.”

¹³ Ikehu Moses no Ampeu lau ighamku pi, “O Alhou, kimiyeno li shipivi tsülo, kimiye tsülo.”

¹⁴ Ikemu Ampeu no pa vilo pi, “Li papu no li gilo müsüte pukutsü aye, li ye atsala tsüni akukujo lo amasake kumo? Li pesü atsala tsüni aghazü lono khatha pheve no tithiu no sachile iloghilo.”

¹⁵ Tighenguno Miriam ye atsala tsüni aghazü lono khatha pheve, eno li sachile iloghi moke kutolo timiqo ye kape move.

¹⁶ Eno tithiu panongu no Hazeroth lono chesüwo Paran sayeqha lo aghazü shive.