AKIKIHI 11 - Sumi Naga CL (Re-edited) Bible (BSI)

Timiqo Kumchho

¹ Timiqo no pano veküsa pesü Ampeu no chikulupushi muchho thuve kehu Ampeu no chilupe shishe amloideve, eno Pa miküqü no panoqo dolo iqü ipeghi püzü tino aghazü khalau a-a hami pitive tsü.

² Tileno timiqo no Moses lau ighamku, eno pa no Ampeu lau inikhu kelo ami inheilove.

³ Ikehu tipa-a pesü Taberah kuvetsü, kughengu Ampeu miküqü no panoqo dolo iqü ipeghike.

⁴ Tithiu Israelmi gholo xukütshüve kemi chekeqo no achuqupu mine kütüve, eno Israelmiu ghi muchho thuve no pi: “O ningu no ashi chukepu kitilamu aghi keaye lae!

⁵ Egypt lo nino kümsano akha chu chekeu, akuka, azühengu, bobotsüna, alhatsüna, eno anhetsüna kümsülu anie.

⁶ Ikemu itehi ye ni kughoki qhaighoivae, eno manna hipau kumo aye kütau kiumu chukepu kühavae.”

⁷ Manna ye asüolothi toi, eno alabe ye aune gholo akimiye kite keu mihie.

⁸ Timiqo no hokümxa lo itsü kichewu no atuqu lono tsüghü momu apikhi lono kubove no tipau pesü asho shi bechu che. Tipau micheju kelo olive thazü pesü kiteve keu sho toike.

⁹ Putho lo kughou no aghazü lo atsüzü qini keno, manna ghi tipa mtsa ikiqighi cheke.

¹⁰ Moses no alagha kümtsü pütüta phiki kulaghi lono ighaqa akeu chiluve. Tino shishe Ampeu mlo shikighideve tsü, eno Moses ye amlo shimove.

¹¹ Pa no Ampeu vilo pi, “No ye kushiye O qeu peitha püsa ani kea? Ni ye O mlokiqipu shimlave kesheno kushiye No ye timi hipaqo makho pesü I xapipe ani kea?

¹² Timi hipaqo ye I no mishipu no punu kesheno kushiye I vilo anga küsami no anga kughunu xapu keshi panongu xapusü Nono pano puasü tsünie pi tushoqhi keu yeghi lo wulo pi kea?

¹³ Timi hijeje tsü kepu ni ye khileno ashi ithuluni kea? Kughengu panongu no I zülono ighamku, ‘Nino chukepu ashi tsülo’ ipi khu ani.

¹⁴ I likhino timi hipaqo makho pumlavae; ti ye I ghenguno mishilo kütüvae.

¹⁵ Nono hitoi I peitha kepushi aye, itehi no I pithivelo, ikemu I no O mlokiqipu shilu aye, I pelo I lhoksa ithulupe kevilo.”

Moses Kukuphumi Layemi Süsü

¹⁶ Tishino Ampeu no Moses vilo pi, “Israelmi dolo layemi nono khunoqo ithi ani keno, timi saphelu chekemi pano lhotsüni hekütsüpe Kuposhukulu Phiki lo ighi no o gholo puthugho pelo.

¹⁷ I no iqighi no tileno o sasü küptsani, eno o tsüpüakeu nguagha hami pesü panoqo shou puku tsüni, tishianguno o likhino kumono panongu ghi o gholono timiqo makho pupeni.

¹⁸ Itehi timiqo vilo pilo, ‘Thoghiu ghenguno nongu ampi shikimthe lulo, nongu ye ashi chuniae, kughengu Ampeu no chikulupushi nongu no ishi muchho auve, “Khuu no ashi chukepu ni tsüni kea? Kughengu ningu ye Egypt lo akeu pavi ake.” Ikehu nongu ye Ampeu no ashi tsükeu chuniae.

¹⁹ Nongu ye atsala lakhi kini, momu pungu, chighi momu muku likhi chunike kumoe,

²⁰ ikemu aqhi kupuju nongu nigipe lono ipeghiuve no alole moke kutolo chuniae, kughengu nongu no Ampeu Khuu nongu gholo ani keno Pa milive no Pa zülono, “Kushiye ningu ye Egypt lono ipeghive kea?” ipi ighamku auveke.’”

²¹ Ikemu Moses no pi, “I gholo timi pano lakh tsügho checheni püzü No ye, ‘Panongu pelo aqhi kupuju ashi chu penike I tsüni,’ ipi ani nolae!

²² Panoqo ghenguno ambe ngo amishi heqhi kelo lukümkha shi nanio? Momu azüghi lo akha kümtsü khaluve kelo lukümkha shinani keshea?”

²³ Ampeu no khochile, “Ampeu u ye ikholove akeshea? I tsa ye o ghenguno kuchou shinani kemo keno nono ithi nani.”

²⁴ Ikehu Moses no khalau ipe Ampeu tsa pesü timiqo vilo pi. Pa no layemi pano lhotsüni hekütsü sasü Aphiki homxape qhi.

²⁵ Tithiu Ampeu no khüngküsü lono iqighi no Moses pütsa, eno pa tsüpüakeu nguagha hami pesü layemi lhotsüni shou betsü. Tino panongu shou ikughi kemtsa panongu no tungkupu tsa piuve. Ikemu panongu no ti pekibe move.

²⁶ Panongu gholo mikini, Eldad ngo Medad, ye Aphiki lo wumono aghazü lo ngoa, ikemu aghungu no pama shou akehu pama no aghazü lono tungkupu tsa pia.

²⁷ Apumi lakhino powo Moses vilo pi, “Eldad ngo Medad pama ye aghazü lono tungkupu tsa pi anie.”

²⁸ Tile Nun nu Joshua, alhothe lono Moses kukuphuu shichekeu no pi, “I mpeu Moses, pama lakhavelo.”

²⁹ Ikemu Moses no pa khochile, “I ghenguno nono alomsü ani keshea? Ampeu no Paw timi kümtsü shou Pa ghungu puku tsüno panongu pelo tungkupmi shi aghi penishi nolae!”

³⁰ Tishino Moses ngo layemiqo ye aghazü lo idewove.

Atsüngü eno Püsa

³¹ Tithiu Ampeu launo amülhü ighi, eno tino azüghi lono atsüngü süghi no aghazü hokümxa lo a-a qhakuchho puchopuju lache qhemishi nhakhape ikiqighive, eno ayeghi lono auxakuchho lakhi qhau qheiku ngove.

³² Ikelo timiqo no tipa tsala puchopuju puthotsü eno thoghiu kutolo ti küghalu khave. Tile khurha ape chighi qhalo küghalu kemi no akimkheue. Kümtsü no pütüta müzülo tipaqo pikipe aghazü hokümxa lo qhiwove.

³³ Ashi chupusü panongu hu lo tsapiyepe chukha mphi lono Ampeu ghakighide no timiqo shou ikughive, eno Pa no püsa kije puwu no timi kutomo ghave.

³⁴ Ikehu tipa-a pesü Kibroth-hattaavah kuvetsü, kughengu panongu no pitipüza mine chekemi tile shiqhoveke.

³⁵ Panongu no Kibroth-hattaavah lono chesü Hazeroth lo wuve eno tile aghazü shive.