AKIKIHI 10 - Sumi Naga CL (Re-edited) Bible (BSI)

Ghükayi Fuko

¹ Ampeu no Moses vilo pi,

² “Aqoaho kukumqoni kelo eno aghazü xaveni kelo peitha kepushi ayihesü no ghükayi hephape afuko kini mlalo.

³ Eno kughou afuko küma küighani keno, aqoaho kümtsü no o zülo Kuposhukulu Phiki kulaghi lo hekütsüpe ngoni.

⁴ Ikemu afuko lakhi likhi küigha aye, atomi, alagha lo akütsüqo likhino o zülo kumqoni.

⁵ Kughou afuko ikhonhei ighani keno kipelau akeu ghazüqo no alacheni.

⁶ Eno kughou afuko akiniu ighani keno apeu akeu ghazüqo no alacheni. Kugho kughomu aghazü xakiqheni kelo afuko ikhonhei küighani.

⁷ Ikemu aqoaho hekütsüni keloye afuko kushuo küighani.

⁸ Afuko ye Aaron nuli achinemi no küighani. Hi ye pülhapuju ghenguno pimheye shi nongu no tiqheli kümtsü lo pekishe woni.

⁹ No yeghi lo aghümi khunono nongu qhasü cheni keno, nongu no tipaqo sasü aghü küpüghüni kelo afuko ikhonhei igha no kütüghüni, tishianguno Ampeu nongu Lhou no nongu kümsülu eno no ghümi launo xalu nani.

¹⁰ Itaghi alhoaye lo tiqhetini eno aqhi kithe tiqhetini, nongu lokivi tsala hipaqo lo nongu no akipti kümllagho eno külakishi kümllagho tsükeu gholono afukoqo ighani. Tileno nongu Lhou no nongu kümsülu nani: Ni ye Ampeu nongu Lhou ke.”

Israelmi no Sinai Qhive

¹¹ Egypt qhiveke mpe akiniu, aqhi akiniu, atsala amkuu lo Aphiki shou khüngküsü akeu huno taikuve,

¹² eno Israelmi no Sinai sayeqha lono chesü wuve. Tithiu khüngküsü no Paran sayeqha lo iqighive.

¹³ Ampeu no Moses vecheo azah tsükeu kiqi lono hi no atüghüu shi panongu no chewuke.

¹⁴ Judah ghazü no atüghüshi panow michipu pesü aloji kiqi lono chewu, Judah loji tou no Amminadab nu Nahshon.

¹⁵ Issachar loji tou no Zuar nu Nethanel.

¹⁶ Eno Zebulun loji tou no Helon nu Eliab. Hipaqo no Judah ghazü qholo ae.

¹⁷ Kughou Aphiki xaqhi keno akümla kikije kiqi lono Gershon ngo Merari limi no tipau xapusü wuve.

¹⁸ Tithiu Reuben ghazü no pano loji michipu pesü aloji kiqi lono chewu, Reuben loji tou no Shedeur nu Elizur.

¹⁹ Simeon loji tou no Zurishaddai nu Shelumiel.

²⁰ Gad loji tou no Deuel nu Eliasaph. Hipaqo no Reuben ghazü qholo ae.

²¹ Tishino Kohath limi no akimthe thimeqo xapusü wuve, panongu no aghazü-a kithe tomphi lono Aphiki ye shiqheve aghi.

²² Tipa shelo Ephraim ghazü no pano loji michipu pesü aloji kiqi lono chewu, Ephraim loji tou no Ammihud nu Elishama.

²³ Manasseh loji tou no Pedahzur nu Gamaliel.

²⁴ Benjamin loji tou no Gideoni nu Abidan. Hipaqo no Kohath ghazü qholo ae.

²⁵ Dan ghazü no ashekhau shi pano loji michipu pesü chewu, Dan loji tou no Ammishaddai nu Ahiezer.

²⁶ Asher loji tou no Ochran nu Pagiel.

²⁷ Naphtali loji tou no Enan nu Ahira. Hipaqo no Dan loji qholo ae.

²⁸ Kughou Israelmi no chewu keno, aloji kikithi hipau kiqi lono wucheke.

²⁹ Moses no pangu Reuel nu Hobab, Midian noghami, vilo pi, “Ningu ye Ampeu no ayeghi khikhi, ‘I no nongu tsüni’ ipi püa keno, tilau wucheni. Nino akivishi o tucho nanike ni gholo ighilo, kughengu Ampeu no Israelmi lau akivi mlani keu piqhive ake.”

³⁰ Hobab no pi, “Ni ye wumoe, ni ye ni ghakhu lo ni bolomi lau woniae.”

³¹ Ikemu Moses no pi, “Kimiyeno ningu qhive kevilo, kughengu asayeqha khileno ningu ghazü shikepu keno nono ithi ani, eno ni laghi kiche tsülu nani.

³² Nono ni gholo wu aye, Ampeu no akivi kiu kiumu ni lau mlatsü keu nino athoshi o lau shini.”

³³ Tithiu panongu no akimthe toghi lono atsala küthü ghüzüla lo wuve. Eno AMPEUw Puloshoqhi Bohu no atsala küthü panongu züuno aghazü-a phunike wuve.

³⁴ Kugho kughomu panongu no chewu kelo AMPEUw khüngküsü no puchou thaqhü panongu sawuche.

³⁵ Puloshoqhi Bohu pesü wuni kelo Moses no piche. “Ithulo, O Ampeu, O ghümi hapupove tsülo, eno O mithi chekemi pelo O zülono pove pelo.”

³⁶ Eno tipau pewo qhike lono ishi piche, “O Ampeu, Israelmi qhethonhe no qhethonhe akeu lau ideighi tsülo.”