AHOLE 9 - Sumi Naga CL (Re-edited) Bible (BSI)

Alokütsü Laghi

¹ Alokütsü no li ki shiqhe; li no atsükucho tsüni mlae.

² Li no aghulhu sala lhoxü heqhi, akivishi atsaizü lekite, eno aghulhu lüpa ghi kutope qhi.

³ Li no aphughi lo atoghiqo lono timiqo ku penike li qelimi puwu,

⁴ “Khuu no itikütüpa cheni keno hilau tsüghü ighilo!” Kümsükümlau vilo li no picheni,

⁵ “Ighilo, I no kuto püakeu libe chu eno I tsaizü sholo.

⁶ Itikütüpa keu la qhive no xülulo, kuthoküzü kighithi la pülalo.”

⁷ Alikhi apülüpivi kemi shikümzü aye thaigha keu ithulu nani, eno kixikilami sakiyi keu ye aghüzapu ithulu nani.

⁸ Alikhi apülüpivi kemi shikümzü kevilo, pa ye o mithi nani; alokütsümi shikümzü tsülo eno pa no o kimiye nani.

⁹ Akükütsütsa pesü alokütsümi tsülo, pa ye alotsü kithe nani; amikuchomi shikalo, pa ye alau ithiküphave nani.

¹⁰ Ampeu sükümsa no alokütsü hukuthu ke, eno Akimtheu ghili ithikeu huno kuthoküzü kighithi ke.

¹¹ Nongu küxü mpe ye I vecheo küghüsülu eno küphalu nani.

¹² Nono alotsü aye o likhi o ghenguno ameküapu, nono küthakügha shi aye o likhi o makhoae.

Mbomzümi Laghi

¹³ Mbomzü totimi ye aghügha kuloghi, timi müsü luveni keu kumo aye kiumu ithi chemoe.

¹⁴ Li no li hukikha lo momu aphughi lo akuchuqu-a lo iqa no

¹⁵ khunono pütüta kümlapu ghenguno hu-wo cheghini keno tipaqo kukishe no picheni,

¹⁶ “Khuu no itikütüpa cheni keno hilau tsüghü ighilo!” Kümsükümlau vilo li no picheni,

¹⁷ “Aküpka zü no ngonyi eno küzükugho shi asho chukeu no jumghai ke.”

¹⁸ Ikemu li papewu kemi ye tile kithimi akeu ithi chemo, eno li no kusü kemi ye Kithigha lo anie pi ithi chemoe.