AHOLE 8 - Sumi Naga CL (Re-edited) Bible (BSI)

Alokütsü Kükümgha

¹ Alokütsü no ku anike kumo? Vethakulupu kighithi no asütsa süqhe igha anike kumo?

² Li no alaphe lo akuchuqu-a, ala shoküba ke-a lo puthugho ani;

³ mishiphu gizüu khagho phivilo puthughope li no ighamku ani:

⁴ “O nongu timiqo, ni ye nongu lau ighamku ani, I sütsa ye kümtsü ghenguno ke.

⁵ O itikütüpa chekemi, mtsüqhei kiqikutolu keu shikalu lo; O mbomzümiqo, pütsüpuloyi keu shikalu lo.

⁶ Inilo, kughengu ni ye ajilo kiyighi tsa pini cheni, eno kiu no achipi keno I kichi lono pini cheni,

⁷ kughengu I kichi lo kuchou tsa pi nani; kixikila tsa ye I ghenguno aphikümqhüpu ke.

⁸ I kichi lo tsa ye amikucho likhi eno kiumu tuchighive momu sabideve keu kühae.

⁹ Khuu no vethaluni keno, pa ghengu ye hi kümtsü thebei ani, eno kighithimi ghenguno hi ye achipi ke.

¹⁰ Ghükayi züqhulo I kükütsü lulo, eno ameshoyi akiviu nguno akighithiu kishelu lo,

¹¹ kughengu alokütsü ye achiku nguno akiviu eno nono mine chekeu kiunomu li sasü kimhe mlae.”

¹² “Ni, alokütsü ye mtsüqhei kiqikutolu keu sasü acheni, eno ni ye akighithi ngo kimchikulupu lokütsü ani.

¹³ Ampeu sükümsa kiqi ye alhoksa mithini keu ke. Ni ye aqheküza, akülaki, eno alhoksa laghi ngo sabideve keu tsapi mithi cheni.

¹⁴ Ni ye mtsümishei keu lokütsü pesü ala kichetsü cheni; ni ye kuthoküzü kighithi ani; ni ye akumto ani.

¹⁵ I vecheo kükami no ayepe cheni, eno yepemi no achipiu xaküthaza tsülu cheni;

¹⁶ sakiphemi eno xaküthami achipi lono ayepe chekemi kümtsü I vecheo tishilu cheni.

¹⁷ Khunono I kimiye cheni keno I no tipaqo kimiye, khunono aghüiloqhiyi I phuni keno pano no I phulu nani.

¹⁸ Küakini eno agigihupu, pepushu kulupu eno kighishe kulupu kini ye I gholo acheni.

¹⁹ I xathi no thakimtheve keu meshoyi nguno akiviu, eno I lu lo ghile no ghükayi nguno akiviu ke.

²⁰ Ni ye amikucho eno achipiu xakütha laghi püla cheni,

²¹ khunono I kimiye cheni keno I no küakini pesü tsü cheni, eno pano kinibo pichhitsü cheni.”

²² “Ampeu no khaghi wovekeu lo Pa kümla hukuthu lono I lhoke.

²³ Mulhou ayeghi lhophe mphilo, abothu lono ni ghüpe qhike.

²⁴ Azüghi eno azüpuki no qoipeghi mphi lono ayeghi lo I puwuvae.

²⁵ Naghuto ngo atoghi kogheküghü mla mphi lono I puwuvae,

²⁶ Pa no aluza eno ayeghimkhu lhomphi lono I puwuvae.

²⁷ Kughou Pa no atsütsü kughuphe, azüghi bothasü keno ni ye tile ae.

²⁸ Pa no atsütsü lo khüngküsü mla, azüghi züpuki mlaphe akelo,

²⁹ Pa zakütsü veche azüghi no qole nosa kehu Pa no kothatsü akelo, Pa no ayeghi boqha ghüpe qhi akelo ni ye tilehi ake.

³⁰ Kütshakügha kümlau toi ni ye Pa gholo ae, tsalakipe Pa no I jupe alovi, eno I no Pa zülo alovi che,

³¹ Pa yeghiqha lo küxümi kümtsü gholono amlokiqi shiche.”

³² “Ikehu I tsa inilo, O anuliqo: khunono I laghi lo checheni keno tipano kümghapue.

³³ Akükütsütsa chilu no alotsü lo, eno ti kughucho kevilo.

³⁴ Khuu no I tsa chilu no tsalakipe Iw khagho lono I jukuto, I kikha lono kheni keno akümghapue.

³⁵ Kughengu khunono I phuluni keno aküxüpu phuluvae eno Ampeu mlokiqipu shivae,

³⁶ ikemu khuu no I phumoni keno pa likhi pa ghüzavae; I mithi chekemi kümtsü akithi kimiye cheni.”