AHOLE 7 - Sumi Naga CL (Re-edited) Bible (BSI)

Küsalhami Launo Putosülo

¹ I nu, I no pikeu tsa pelulo eno I zakütsüqo kütsüpe o gholo qhilo;

² I zakütsü pape no aküxüpu qelulo; I kükütsütsa pesü o nhethi lo ijukeu thime toi qhilo;

³ o uloti lo anguthi toi khapulo; eno o mlo tulupha lo yepukulo.

⁴ Alokütsü vilo pilo, “No ye I chepu,” eno kuthoküzü kighithi pesü o poshuu kepi kulo,

⁵ hi shikeu lono no ye küsalhami eno ghaghulimi tsapi kümtsha lono putosülu nani.

⁶ Ghuthu lakhi lo I no I ki lashe lono khalau jupipe akelo

⁷ itikütüpa puju shijumo kemi eno kümsükümlami lakhi aqo gholo aghi keu ithulu,

⁸ pa ye ghaghuliu kilo ilo chekeu la züsü wuve,

⁹ ti ye avelau züghüive no aküzü no nhaluve keu ghuloki lonoke.

¹⁰ Atotiu no kütüqhalimi phimini pepusü izüghoi pa sasü kusho.

¹¹ Li ye mtomshu hebide chekemi aki lo ichiqhoi ngochemo kemi;

¹² itehi alaghila lo cheghiju, alhikishi-a lo aghiju, timi züluveni ye acheku lono ngokhe chekemie.

¹³ Li no apumi hu tsüqü luve no pa müma eno kujomo püzü teqhitelei pa vilo pi,

¹⁴ “Ni ye aghakishi kümllagho tsünikeu shi ake ishi no tsüve no tipau shi pewo püani;

¹⁵ ikehu itehi ni ye o phuniye ipeghi kelono o sholuvae.

¹⁶ Ni ye Egyptmiw phepheike phi alabe jeli no aye shisükeu pesü I züa qhapüani;

¹⁷ Ni ye müsüghüta, aloe, eno aküsa pesü I züa kümna püanie.

¹⁸ Ighilo, nikujo puthotsü ashiaji ghakiqipu shi alopivini nolo.

¹⁹ Kughengu I kimi ye ala kushuo lo izüwuvae eno aki lo kühae;

²⁰ pa ye süqhu chhitoi pisa pewuve ake apinedo kini thiuno ighiniae.”

²¹ Li no müsü kutho keu tsa pesü apumi hu züluve; li tsa kümtsha no pa kitimeve.

^22-23 Amshitsü ghiqhini ye sawuche keshi momu alichhe lo ashu no jiqhiveni ye akeghi aqhu no ilhe ilove keshi, eno aghau no alichhe lo mtazü yeilove keshi apumi huye pa küxü pükave tsüniye akeu ithi mono paikhavi lono li pape wuve.

²⁴ Ikehu anuliqo, itehi I tsa inilo, eno I tsa lo amlo tsüqhiyi shilo.

²⁵ Totimi tikithipu küdau nongu mlo kughopuwo kevilo; ala vepimipe li la lo wuve kevilo,

²⁶ kughengu li no timi kutomo sünhe kuchuni qhivae, panongu kütsasa pithive tsüae.

²⁷ Li ki ye Kithigha lo kuwu la, akithipu chebo lo ilove cheni.