AHOLE 6 - Sumi Naga CL (Re-edited) Bible (BSI)

Alaushi Ghutu

¹ I nu, tsala inaghami momu o küsau no apiagha puve kelo nono love tsünie pi püaghi aye,

² tsala o kichi lono pikeu tsa no o meluve eno o küghaluve aye,

³ hi shilo, I nu, no ampi xalulo, kughengu no ye o küsau u bokhu lo auve ake: mtazü o küsau lau wuno mlominyi pa qhüiniju lo.

⁴ No ye züni keu eno akulhoqhini keumu kümsü kevino aghilo,

⁵ ashe momu aghau no ashihami u lono polu keshi o xaphelu lo.

⁶ O akipichiu, alhache lau wuno li ye kiu toi xücheni keno kümsü jupüzü alotsü lulo.

⁷ Atou, hiyampeu, momu yepeu küha keghi

⁸ li ye mütsü tusho ghile lono achuqupu kutope qhive cheni.

⁹ O akipichiu, no ye khitohi tile ihozü anani kea? No ye kughou no o küzü lono ithughi nani kea?

¹⁰ Kitila züveni, kitila inguveni, au kumshope akulhoqhini ipi

¹¹ akelo aqüagha no küpkami toi eno athokha no aghünanu kupumi toi o shou ikughive nani.

¹² Ameküküha, kixikilami no kühakügha tsa pikülha wucheni,

¹³ pa nhethi kütsüpe tsü, apukhu au pesü kichebide pishiqhi cheni,

¹⁴ chighichilai keu mlo xapu alhoksa kuchughu, tamomithe aküküpna xusü cheni;

¹⁵ ikehu anhekütsü khavino pa shou amhekiqi ikughi no shipivi kümlapushi ghüzave nani.

¹⁶ Ampeu no mithi chekeu thime tsügho ani, Pa ghenguno aphikümqhüpu tsüni ani:

¹⁷ Aqheküza nhethi, pighizü mili, eno pimimo kemi ji pele keu phiau kupumi,

¹⁸ kixikila kuchughu chekeu mlo, alhoksa lo poilo chekeu pukhu,

¹⁹ atuthukishe kümtsü alatsa piqhi chekeu kichile thopiu, eno shompami dolo aküküpna xusü chekemi.

Shupu-salha nosake Ghutu

²⁰ I nu, o pu zakütsü pelulo eno o za kükütsü kümsüma kevilo.

²¹ O mlo lo tipaqo tsatsai qhilulo; eno o kuo lo tsügha pulo.

²² Nono o küxü ghüzüla lo chewu kelo tipaqo no o sache nani, putho lo o jukuto nani eno puchou o kütsüpiye nani.

²³ Kughengu azakütsü ye akulu lakhi, shiküka ye aküvü, eno shikümzü niye sakiyi keu no aküxü laghi ke.

²⁴ Tipaqo no totimi lhoksa eno ghaghulimi tsapi kümtsha launo o püxülu nani.

²⁵ Khilemu o mlo lo liw jukivi mine kevi eno liw ghaghu nhethi no o müsü luvepe kevilo;

²⁶ kughengu kütüqhalimi ye ashopa lakhi me qhemie, ikemu anipu küsalhami ye aküxü ghi luvetsü cheni.

²⁷ Milakhi ye pa phimini pitimo no ami hipe pa mla lo pukulu nanio?

²⁸ Momu khuana no pa pukhu pitimo no amibalu iqü akeu shou no ala chelu nani keshea?

²⁹ Tihutoi timi khuu no kütami nipu sasü züveni keno, li shipüthave ke lame pa ye aghime pumove mlae.

³⁰ Milakhi no müzüthi kelauno amzü vetha niye pükave kelo khunomu pa thaigha chemoe,

³¹ ikemu pa küghaluve aye, pa ye tsüni no küghüsü no lonani, pa kilo aghikeu qhoi tsüve nani.

³² Khuu no shupu-salha cheni keno, pa ye kümsükulu küha; eno pa likhi pa kütsave cheni.

³³ Pa ye küghape ghaqhi eno shikukujo nani, eno pa kukujo ye hauvemo nani.

³⁴ Kughengu akimi ye anheshu kelauno axuideve akehu kughou pa no amkhü luni keno, pa ye süchile moake.

³⁵ Pa ye tha-lo keu lumo nani; nono tughotili küghüsüpe tsü namu pa ye milive nani.