AHOLE 5 - Sumi Naga CL (Re-edited) Bible (BSI)

Shupu-salha nosake Ghutu

¹ I nu, I lokütsü tsalo amlo tsülo; o kini puxolei Iw vethakulu tsa inilo,

² tishianguno no ye kimchikulupu kighithi pelu nani, eno o kichi lono akighithi tsa pilu nani.

³ Kughengu ghaghulimi mütsü loye akhingozü ijiqi cheni, eno li tsapi ye thazü nguno akümtshau ke,

⁴ ikemu ashekha lo li ye kukhukimji sübo toi, putoputo zütakikihi toi aghi nani.

⁵ Li pukhu ye akithipu lo ilocheni; Kithigha lo wukeu la püla cheni;

⁶ li ye aküxüpu lalo wunike kümsü chemo eno akumou lalo cheche pülaghi ithi chemoe.

⁷ O anuliqo, itehi ye I tsa inilo, eno I kichi lono piqhikeu tsaqo kümsüma kevilo.

⁸ Totimi hitoi kemi launo putosüveni thono li hukikha phivilo mu wu kevilo,

⁹ tikumo aye o juaje no kütami sala shive no axeküsümi no o küxü kughukhove tsü nosa,

¹⁰ inaghami no o küakini luvetsü eno o tsünhizü lo pekighi huno inaghamiw shive nosae.

¹¹ O küxü shekha lo o phiashi chupühave kelo nono muchho

¹² eno ishi pi nosa, “Ni ye kishita akükütsütsa milive eno sakiyi keu jukünathave kelae!

¹³ I no Iw shikükami tsa ini move eno I kükütsümi tsa chilu move.

¹⁴ Ni ye aqoaho zülono qhoi kütsa pinyiveni keu lo auvae.”

¹⁵ No ampi no khepucho keu zü, o züpuki lono qoipeghi keu zü likhi yelo.

¹⁶ O züpuki lono qoipeghi keu zü pesü inapügha aqha kümtsü lo kuthole kepu keshea?

¹⁷ Ti ye o likhi o sala shini thono inaghami ghenguno tishi kevilo.

¹⁸ O züpuki ye akümghapu shilo, eno amlokiqi shi o lhothe lo nipu sasü alopivilo,

¹⁹ li ye ashe ali toi juvike. Li kichhi no ado kümtsü lo o lopiqitsü eno o vehope apelo.

²⁰ I nu, no ye kushiye ghaghulimi lau o mlo xükho, eno küsalhalimi vapeni kea?

²¹ Kughengu timi küxü ye Ampeu zülo ithulu püqai, pa laghi kümtsü Pa no jukuto acheni.

²² Kixikilami ye pa xine no meluve cheni, eno pa xine kighi no tsatsai pa tsüghave cheni.

²³ Pa ye alikhi aghasükulu kühakeu lono thive cheni, eno pa ghüzü kije ghenguno pa ye ala vepimive cheni.