AHOLE 4 - Sumi Naga CL (Re-edited) Bible (BSI)

Apu Lokütsü Kükütsütsa

¹ O anuliqo, apu kükütsütsa inilo, eno vethalu kepushi amlo tsülo,

² kughengu ni ye mtsümishei keu kighithi nongu tsü cheni; I no shika keu pheve kevilo.

³ Kughou I no itimi shi I pu ngo I za gholo I likhi ache keno,

⁴ I pu no I shika eno I vilo piche, “O mlo lo I tsaqo tsatsai süpulo; I zakütsü pape no aküxüpu qelulo.

⁵ Alokütsü; kuthoküzü kighithi phulo, I kichi lo tsaqo kümsüma momu kughucho kevilo.

⁶ Alokütsü no o sache nani ke li pheve kevilo, li no o khe ananike li kimiyelo.

⁷ Alokütsü hukuthu ye hike: alokütsü paghi phulo, nono kiukiu ithulu namu kuthoküzü kighithi phulo.

⁸ Amekusho shi alokütsü ikhilulo, eno li no o xaqhe nani; nono li mtupe luve aye li no o gihu nani.

⁹ Li no aküzüqhiyi keu eno jukivi kütsükuqho pesü o pipe nani.”

¹⁰ I nu, o küxü mpe kutomo shilu kepushi I tsa ini eno ikhilulo.

¹¹ Ni ye alokütsü laghi o piyevae, ni ye akümzü la lo o sawuvae.

¹² Kughou nono chewuni keno no ye shokukho monani, eno nono pokelo küpxamo nani.

¹³ Phekevi no akükütsütsa pelulo; li süsholo, kughengu li no o küxüe.

¹⁴ Kixikilami laghi lo ilo kevilo, eno alhoksami laghi püla kevilo.

¹⁵ Tilau chewu kevino putosüve lo; tipau lono tsüghüsü chevelo.

¹⁶ Kixikilami ye alhoksa shimo kelo zühulu chemoe; panongu ye timi küpxa moke kutolo pano küzü kihi acheni.

¹⁷ Kughengu panongu ye kixikila sho chu cheni eno shiküpsa tsaiji sho cheni.

¹⁸ Ikemu amikuchomi laghi ye tsükutho küvü ipeche ketoi, puchomghü shimoke kutolo vüqai eno vüqai kithe acheni.

¹⁹ Kixikilami laghi ye aküzü kutho toi, pano ye kiu küpxalu ani keno ithi chemoe.

²⁰ I nu, I tsa lo amlo tsüqhiyi lo; o kini kughope I kipitsa inilo.

²¹ Ti ye o launo povepe kevilo; ikemu o mlo alou qhilulo.

²² Kughengu ti phulu kemi ghengu ye aküxüpu ithuluvae, eno pano phimpi lo shikipivi ghi ithuluvae.

²³ O kükümsü kütsü kiyipe jukuto alo, kughengu tipau lono aküxü züpuki ipeghi cheni.

²⁴ Tuchighive keu tsa o kichi lono ikhivelo eno pishikiqhi tsa o launo putosüvelo.

²⁵ Agizüu müzüchoi jupuwo lo eno kinheqhe kileni thono pishiqhove kevilo.

²⁶ O pukhune sükiqhe chhejulo; tishiaye o laghi kümtsü mtsüqhei luve nani.

²⁷ Ajeu na piyiu namu tsüghü wuve kevilo; alhoksa laghi lono o pukhu süchile luvelo.