AHOLE 31 - Sumi Naga CL (Re-edited) Bible (BSI)

Akükau Lemuel Tsa

¹ Akükau Lemuel tsaqo. Pa za no pa shika keu müzüküsü tsa:

² I nu, no ye kiu shi ania? No ye kiu shi ania, I ji lo kiyighiu nu?

³ Totimi launo o kumto puwove kevilo, ow pisa pesü kükami kütsave chekemi launo puwove kevilo.

⁴ Kükami ye aji shokepu kumoe, O Lemuel, aji kümka ye yepemi ghenguno kumoe,

⁵ tikumo aye panongu no aji shove no xaküthaza tsüpüakeu kümsümave no aghimemi chipiu tuchighive tsü nosake.

⁶ Aji kümka pesü thiveni ye akemi pijelo eno aji pesü kukhukimji veküsa lo akeqo tsülo;

⁷ pano pelo shopusü aqüagha eno aghime kümsümave pelo.

⁸ Achipi tsa pimla kemi akukuphu küha kemi ghenguno pi tsülo.

⁹ O kichi xükhope amikucho shi küghatha tsülo; kumlhomi eno aveküsami chipiu süsho tsülo.

Ampeu Sükümsami Totimi

¹⁰ Khuu no anipu kighiche phulu nani kea? Li ye achiku nguno amekushou ke.

¹¹ Li kimi no li shou pükhübe cheni, eno pa ye mpive chemoe.

¹² Li küxü tivilo pa lau akivi mla cheni eno pa shipüsave chemoe.

¹³ Li no aye phi ngo amhi phi phuwu no li u lono pulopinyi mlaitha cheni.

¹⁴ Li ye kilhikishi zükilu toie; ala kushuo lono achuqupu süghi cheni.

¹⁵ Tsütho mphi lono li no akibolomi ghenguno ithu achuqupu kuto eno li qelimi kümlapu kughutsü cheni.

¹⁶ Li no chheju no ayeghi qhü cheni; li u ghülono ithulu keu pisa pesü atsailu chicheni.

¹⁷ Li ye akumtomi eno aka-aveshi mla chekemi ke.

¹⁸ Liw kilhikishi ye ala shi chenipi li no ithi ani. Putho lo ghi li kulu ye inhemo no ado kihi mla acheni.

¹⁹ Li no aye züpe azüngü lo pütsü puku no aphimini gho cheni.

²⁰ Li no shonu shimono kumlhomi eno aveküsami tsü-je acheni.

²¹ Li ye avü qiuve namu akibolomi ghenguno amlosa chemo, kughengu li kibolomi ye lüvüi keu phimini acheni ke.

²² Li no azüa küqhaphi ghocheni; li phimini ye phephei eno tsülabei.

²³ Li kimi no acheaxü lo sakiphemi gholo puthugho kelo timi kümtsü no li kimi ithi cheni.

²⁴ Li no phepheike phi mlape je cheni, heqhiphi pesü alhikishimi vilo kimje puwu cheni.

²⁵ Akumto eno agigihu no li nanu, li ye ighini keu do-ghuloki ghenguno ahumiyi chenie.

²⁶ Li no alokütsü lono atsa picheni, eno kimiyekini kükütsütsa huno li mütsü lo acheni.

²⁷ Li no tsaqüi akibolomi vehupu jukuto acheni eno khilemu imemo keu chuqupu chu chemoe.

²⁸ Li tianuli no li ye akümghau ipi cheni, li kimiu ghi li sheqhe cheni.

²⁹ Pa no picheni, “Totimi kutomo no akighiche shi mlaitha cheni ikemu nono tipaqo kümtsü shoqalu chenie.”

³⁰ Puyelei keu ye pishikiqhi, eno ajukivi ye amekühae ikemu totimi khuu no Ampeu sümsa cheni keno akishe tsüküzüe.

³¹ Li no kiu shikeno ti kümtsü ghenguno agigihu tsülo, li kümla ghenguno khagho lo aqha zülono akishe tsülo.