AHOLE 30 - Sumi Naga CL (Re-edited) Bible (BSI)

Agur Tsaqo

¹ Hi ye Jakeh nu Agur tsa, Alhouw müzüküsü tsa. Timi no pi, O Alhou, ni ye akulho shivae; ni ye akulho shivae, O Alhou, eno akumto kühavae.

² Mtsüqheino ni ye anikhami kehu timie pinike aküzüpu kumoe. Ni ye timi toi vethakulu kühae.

³ Ni ye alokütsü shikalu movae, Akimtheu ghili mu ithi movae.

⁴ Khuu no atsütsü lo iku no iqighi kea? Khuu no pa u lono amülhü küghaluve akea? Khuu no aphimini lono azüghizü ghokütsülu kea? Khuu no tsütsü yeghibo lughi sho püani kea? Pa je ye khuu, eno Pa nu je no khuu kea? No ye ithi ani pütsae!

⁵ Alhou tsa ye kümtsü achipi kepi phuphelu cheni; Pa sükusho phuighi kemi kümtsü lau Pa ye azüto lakhike.

⁶ Pa tsa nguno alau süküpha kevilo, tikumo aye Pa no o sakiyi nani eno no ye kimkimi shi phuluve nani.

⁷ I no thime kini o vilo khu ani; I xü lo tipau milivetsü kevilo:

⁸ I launo pishikiqhi eno akimki tsa ikhipe putosüve tsülo; aqüagha na kinikülü namu I tsü kevilo; I no avehupu shi akeu qhemi achuqupu I tsülo,

⁹ tikumo aye ni ye kutomo auve no O milive ghi, “Ampeu ye Khuu kea?” ipilu nosa, momu ni ye kumlhomi shive no püka püzü I Lhou je shikuchhubelu nosae.

¹⁰ Khilemu aqeu ghili pesü pa mpeu vilo pi kevilo, tikumo aye pau no o ghushove no akipimi o tsü nosake.

¹¹ Timi khami ye papu ghusho eno eno paza akishe tsü chemoe.

¹² Khami ye pano xine no kuchhube kütsüla shi akeghi mithemighei aketoi kümsü cheni.

¹³ Khami ye kishi aqheküza nhethi xapu acheni eno kiutoi tsütsüngoju acheni kepi lae!

¹⁴ Khami ye ahu no azütakikihi eno azütachi toi xijope ayeghi lono kumlhomi ngo aveküsami tsüchuve niye pükapütsa cheni.

¹⁵ Ayive ye anga ilimi kini ani: pama je ye Tsülo! ngo Tsülo! Khilemu aghaqi chemo keu thime küthüa bidia acheni, tipaqo ye khilemu “Lukümkhae” pichemo:

¹⁶ Kithigha, atianuli iqomo keu tita, pütsü cheyi mlakeu yeghi, eno “Lukümkhae” ipimo keu miküqü.

¹⁷ Apu jukünatha eno aza thaigha chekeu nhethi ye akhila lo aghaqo no mighijo pewuve tsünani eno küzüva lhuquqo no chuve nani.

¹⁸ I ghenguno thime küthüa bidia akümzapu eno vethamla keu ani:

¹⁹ atsütsü lo alhuqu ghili, atuqu shou apighi achekeu, azüghi kutho lo zükilu, eno kiptimi ngo totimi kimiye kile chekeu.

²⁰ Küsalhami küxü ye hitoi: li no chuve no akichi isüve no picheni, “Ni ye akumou shipüamoe.”

²¹ Thime küthüa bidia ghenguno ayeghi no msa eno tshalu chemo:

²² aqüaxeu no kükami shivekeu, mbomzümi no chukepu ililaive keu;

²³ akimthibo totimi no akimi ithuluve keu, eno aqelimi no li mpeu nipu-a lo ngoluve keu.

²⁴ Ayeghi lo lhoxüti bidi ani, ikemu tipaqo ye ighono alokütsü:

²⁵ Alhacheqo ye akumto kumoe, ikeghi panoqo no mütsü tusho lono achuqupu pekütsüve cheni;

²⁶ achighiqo ye mtotoi moe, ikeghi panongu no atuxu lo aki shicheni;

²⁷ tülhaquqo ye akükau küha kemu chokümtsape iqhoiqi cheni;

²⁸ aniza, nongu no au lono peche keu ye kükami kighiki lo acheni.

²⁹ Angualei shi ala cheche keu thime küthüa bidia ani:

³⁰ kiumu msamo eno athiu idewo chemo keu tüghashiqo dolo akumtou abongshuu;

³¹ koghelei keu wudu; anetsü; eno ghüshimi no bope akeu akükau.

³² Nono anikhashi no ampi sheqhe momu alhoksa kuchughu cheghi aye o u pesü akichi kujukhave lo.

³³ Kughengu akichhizü lono athachi ipeghi, anigi lono aji ipeghi keshi axukighide lono kuqhumo keu ipeghi cheni.