AHOLE 3 - Sumi Naga CL (Re-edited) Bible (BSI)

Ampeu Pükhükibe

¹ I nu, I kükütsü kümsüma kevilo, ikemu o mlo lo I zakütsüqo qhilo,

² kughengu tipaqo no o küxü lo atsala, ampe kutomo eno aloino keu küphatsü nani.

³ Iqemokeu kikimiye ngo pükhükulu no o qhivepe kevilo; o kuo veho tsüghapu lulo; o mlo tu lo tipaqo yepuku lo.

⁴ Tishiaye Alhou eno timi zülo no ye ajuaje kivi ithulu nani.

⁵ O mlo kuchopu pesü Ampeu pükhüni thono ow vethakulu shou mungube kevilo.

⁶ Nono mlaitha keu kümtsü lo Ampeu kümsülu lo, eno Pa no o laghi kümtsü shikümzü tsü nani.

⁷ O likhi nou no alokütsüu shi kevilo, Ampeu sümsalo eno alhoksa lono tsüghüve lo.

⁸ Tino o phimpi shipivilu nani eno o ghi-anhü ghenguno küsüvi shilu nani.

⁹ O küakini eno o u ghülo pekighi amsüu pesü Ampeu gihulo;

¹⁰ tishiaye pofushi o biale pichhitsü nani eno o tsaizü tughuko no yeli-qole nani.

¹¹ I nu, Ampeu no shikümzü keu thogha kevi momu Pa no sakiyi kelo azüzü kevilo,

¹² kughengu apu no pa kijivile chekeu nu lau shiche ketoi, Ampeu ye Pa no kimiye kemi sakiyi cheni.

Alokütsü Phulukeu Kümghapue

¹³ Khuu no alokütsü eno akighithi phuluni keno akümghapue,

¹⁴ kughengu ghükayi ngo ameshoyi kighishelu keu nguno alau li launo ala shilu keu pavie.

¹⁵ Li ye achiku nguno akughupue; eno nono mine chekeu kiunomu li sasü kimhe mlae.

¹⁶ Axükushu ye li u ajeu ani; eno kinikülü ngo agigihupu no li u piyiu ani.

¹⁷ Li laghi ye alokiqipu laghi eno li laghi kümtsü iqüghai ke likhie.

¹⁸ Li khamgholu kemi lau li ye aküxüpu sübo ke, panoqo ye akümghaue pi kucheni.

¹⁹ Ampeu no alokütsü lono ayeghi lhophe; eno vethakulu kighithi pesü atsütsü puthuphe tsü;

²⁰ Pa kighithi vecheo azüghizü no qoipeghi eno khüngküsü no atsüzü piqitsü.

²¹ I nu, alokütsü eno kimchikulupu kighithi püha kevino pelulo,

²² tino o ngulho ghenguno aküxüpu eno o kuo lo jukivi nanu ke.

²³ Tishiaye no ye kümsapu kühano o la lo chewu lunani, eno o pukhu ye küpxamo nani.

²⁴ Nono akulhoqhi anamu msamo, eno zü akelo aloinoqhiyi nani.

²⁵ Züleno shithüghüi keu momu kixikilami no kütsakungo ighi kelo khilemu msa kevilo,

²⁶ kughengu Ampeu no o mlo shikuloghi tsü nani eno alichhe lono o xaphetsü nani.

²⁷ Nono tolukivi thaqhü akukuphu avehupu shi aghi kemi kuphuni thono süchileve kevilo.

²⁸ O kisüghüu no kiuala khu kelo o u lo apülaghi, “Wuvelo, eno I no thoghiu no tsünike ighilo,” ipi kevilo.

²⁹ O kisüghüu khuu o pükhübe qhiyi o kighije lo xücheni keno, pa shou alhoksa kuchughu kevilo.

³⁰ Timi no o shou alhoksa shimo keghi akiqi kühakeu lono pa sasü kukho-kighe kevilo.

³¹ Ngukangugha shi xüche kemi jumine kevilo momu pano laghi pape kevilo,

³² kughengu Ampeu ye kühaküghami ju aphimqhü cheni, ikemu akümzümi pesü Pa mlokuchumi shicheni.

³³ Kixikilami kibo shou Ampeu ngusü ikughi cheni, ikemu Pa no amikuchomi kibo kümghatsü cheni.

³⁴ Thoküghami lau Ampeu no thoküghapu piye cheni, ikemu aqhokighemi ye Pa no saphu cheni.

³⁵ Alokütsümi no agigihupu ighilu nani ikemu mbomzümi ye atiche ithulu cheni.