AHOLE 29 - Sumi Naga CL (Re-edited) Bible (BSI)

¹ Anguno anguno sakiyi anamu mkamghai auve aye paikhavi no shipivimla kepushi mukhumuno shive nani.

² Amikuchomi no alau ikowo aye timi no alokivishi cheni, ikemu kixikilami no ayepe aye timi no muchho thuve cheni.

³ Alokütsü kimiye kemi no papu lopiqi tsücheni ikemu küsalhami sasü kuloji kemi ye papu kini kilheve tsücheni.

⁴ Akükau no kuchou xakütha pesü pa shiaye shiqhe cheni, ikemu pa no külügho luuve aye tino xaleqhive cheni.

⁵ Khuu no alatsa pesü pa küsau sheqhe cheni keno pa likhi pa lichhe shipeqhi anie.

⁶ Alhoksami ye pa xine lono meve cheni ikemu kivimi ye ale phe eno alokivishi cheni.

⁷ Amikuchomi no kumlhomi chipiu ithi cheni, ikemu kixikilami ye titoi keu kighithi vethalu chemoe.

⁸ Thoküghami no aphughi kümtsü xukübave tsücheni, ikemu alokütsümi no aloghu satsüghüve tsücheni.

⁹ Alokütsümi no mbomzümi sasü atsakügha kelo mbomzümi ye axuide no nuuve cheni, eno xakütha shimlave cheni.

¹⁰ Ajiküxümi ye tukutiye küha kemi jumithi cheni eno müzüchoi kemi küxü phucheni.

¹¹ Mbomzümi no pano mlokighide kümtsü ashou pephe cheni ikemu alokütsümi ye inaqhoi süchileve cheni.

¹² Ayekipemi no kichile tsa iniuve aye pa qholo hiyampemi kümtsü no kixikilami shiuve niae.

¹³ Kumlhomi ngo nedaqoda kemi dolo kimshilu chekeu ye hike: Ampeu no pama kinikujo anhethi tsü püani.

¹⁴ Kükami no kumlhomi chipiu süshotsü aye pa yekipe ye alholo iqhikumto tsünani.

¹⁵ Akihepusü ngo shikümzü keu no alokütsü tsücheni, ikemu atianuli kighileve aye akukujo pesü paza tsüani.

¹⁶ Kixikilami no ayepeuve aye küsakügha ikowove cheni, ikemu amikuchomi ye tipaqo no ikiqi keu xüwo ithulu nani.

¹⁷ O tianuli shikümzülo, panongu no o kijivile tsü nani, o mlo lo alokiqipu süghitsü nani.

¹⁸ Khile tungkupu nhetsü küha keno shiye lakhi ye ghaküsü kühave cheni, ikemu Ayezah pelu chekemi ye akümghapue.

¹⁹ Aqemi lakhi ye atsa likhi no shikümzülu chemoe, kughengu pa ye vethalu anamu khochilemo nani.

²⁰ Nongu ye khuana chokilhe shi atsa piqhive chekemi ithi anio? Mbomzümiu no pa nguno alau lajupu auvae.

²¹ Aqeu no itimi shiaphi lono pa no lunishi ke thaqhü tsü püaghi aye ashekha lo pa ye amheghi ighilu niae.

²² Aloghu kighidemi ye kuqhumo keu huthu cheni, amloide kalo kemi ye axine kutomo shicheni.

²³ Milakhi qheküza no pa sünheqhi pe kuchunive cheni, ikemu amlo lo mtshaivü kemi ye agigihupu ithulu nani.

²⁴ Küpkami küsami shikeu ye pa likhi pa ghümi, timi no pa ghusho keu chilu apülaghi pa ye kiumu pichemoe.

²⁵ Timi jupe msa chekemi ye pa sala alichhe mla ani, ikemu Ampeu shou pükhübe kemi ye sükusho ani.

²⁶ Timi kümtsü no yepeu mlo chuni ke pükapütsa cheni, ikemu Ampeu launo kuchou xakütha ithulu cheni.

²⁷ Kixikilami ye amikuchomi zülo aphikümqhüpue eno müzüchoi kemi ye kixikilami no ju aphimqhü cheni.