AHOLE 28 - Sumi Naga CL (Re-edited) Bible (BSI)

¹ Kixikilami ye khunomu pa hamo keghi pove cheni, ikemu kuchomi ye abongshuu toi amlo kumto shicheni.

² Shiye lakhi no hebide thuve aye yepemi kutomo shive cheni, ikemu vethakulumi kighithimi no mtotoi ado kushuo ayepelu nani.

³ Kumlhomi no kumlhomi nedaqoda keu ye mqhumza tsüghu ighi kelo axabo kütsa khave tsüke toie.

⁴ Ayezah pemono qhive kemi no kixikilami sheqhe cheni, ikemu ayezah peche kemi ye kixikilami mjochile cheni.

⁵ Alhoksami ye kuchou xakütha vethalu chemoe, ikemu khunono Ampeu phucheni keno qhoi ithitoi ani.

⁶ Kumlhomi shino akikhishi xükeu no kinimi shino chighichilai xüche keu nguno akiviu ke.

⁷ Anu khuu no vethakulu kighithi ani keno Ayezah pelu cheni, ikemu mihemza kemi sasü kuloji kemi ye papu shikukujo ani.

⁸ Akighishe lono küakini kughuko chekemi ye kütami khuu no kumlhomi tsü-je cheni keno pa ghenguno pekike tsüani.

⁹ Ayezah tsa ini mono tsüghüve aye pa kighiniu ghi Ampeu zülo aphikümqhüpu ake.

¹⁰ Müzüchoi kemi saküghüzüsü alhoksa lalo wuve keu ye pa likhi pa qolou ikiqi ilove nani, ikemu tukutiye küha kemi ye Alhou launo amheghi ithulu nani.

¹¹ Kinimi ye pau no alokütsü kepi kümsü cheni, ikemu vethakulu akeu kumlhomiu no phuphe luve nani.

¹² Amikuchomi no ayepe kelo ahukülü kütsasa shicheni, ikemu kixikilami no ikughive aye timiqo ye itshüuve cheni.

¹³ Axine peküsü chekemi ye aküxü lo ikoishe lumo nani, ikemu ti piphe no qhive aye kimiyeqhiyi keu ithulu nani.

¹⁴ Alhokuthu Ampeu sümsa chekemi ye akümghapue, ikemu amlo kümkami ye küsakusho lo ikiqive nani.

¹⁵ Abongshuu yiküsa no igha momu ava no hache ketoi kixikila yepemi no kumlhomi shou qhasüpe cheni.

¹⁶ Yepemi vethakulu küha keu ye ayiküsa shi nedaqoda cheni, ikemu akumou lono ala shikeu mithi chekemi ye axüshu nani.

¹⁷ Timi küxü luvetsü keu kipimi xapu chekemi ye akithi kutolo poche nani, khunomu pa kuphu kevilo.

¹⁸ Akikhimi ye xaphe luve nani, ikemu chighichilai kemi ye züleno ikiqive nani.

¹⁹ Aka-aghashi mla chekemi ye chukepu kupukuno shinani, ikemu ameküküha laghi phuche kemi ye akhüava kije shinani.

²⁰ Pükhükulumi ye kükümgha no pofushi nani, ikemu chokilhe shi kinimi shinishi kemi ye aghimepu shinani.

²¹ Agikuju ye akivi kumoe ikemu ashopa lakhi ghengu ghi timi ye akumou shive cheni.

²² Shonutsümi ye aqüagha no pa shou ikughi nanie pi mthano paikhavi kinimi shini keu kümsü cheni.

²³ Akumou lono amili peitha kemi nguno alau timi shikümzü sakiyi chekemiu no ashekha lo akishekütsü ithulu cheni.

²⁴ Khuu no pa puaza launo püka luve no, “Hi ye axine kumoe” ipini keno pa ye kütsakungo kemi küsapaue.

²⁵ Alakimnemi no kuqhumo keu huthu cheni, ikemu Ampeu shou pükhübe kemi ye kinikülü heshetsü nani.

²⁶ Alikhi akükümsü shou pükhübe chekemi ye mbomzüe, ikemu alokütsü lono cheche kemi ye xaphe luve nani.

²⁷ Kumlhomi tsü chekemi ye püqüve mo nani ikemu anhethi miyi luve chekemi ye timi kutomo no ghusho nani.

²⁸ Kixikilami no ayepeuve aye timiqo no itshüuve cheni, ikemu tipaqo no ikiqive aye amikuchomi no ikowo cheni.