AHOLE 27 - Sumi Naga CL (Re-edited) Bible (BSI)

¹ Thoghiu ghili pesü qheza kevilo, kughengu no ye ado no kiu süghi nani keno mthake.

² O kichi lou no kumono kütami, tüsümi pelo o sheqhe pelo.

³ Atu ngo asaye ye mishishei, ikemu mbomzümi no alhoksa xukutho keu no tiküma nguno akimshiue.

⁴ Aloghu ye ayiküsa, eno amlo kighide ye kütsakungo keu, ikemu khuu no anhekushu zülo puthugho luni kea?

⁵ Pekipheshi sakiyi keu no küsüu no kimiye akeu nguno akiviue.

⁶ Shompami no akivilau no ghüza keu ye pükhükulupue, ikemu aghümi no müma keu ye pishikiqhi ke.

⁷ Apo chhitoi akelo akhingozü ye alole ikemu müzüthi akeloye khumtsai keu ghi ngonyi ke.

⁸ Timi lakhi no pa kibo qhive no khalau ghütsü likhive keu ye aghau no pa püsü lono itsü wuve keu toike.

⁹ Axokütsüngü ngo thazü kivi no amlo lokiqipu ikemu aküsamiw pulopinyi keu mijekütsü no ngonyi ke.

¹⁰ O küsami eno o pu küsami pheve kevilo, nono amhekiqi sholu kelo o thiküzüu kilo wu kevilo. O kisüghüu aphivilo akemi no o thiküzüu putou akeu nguno akiviu ke.

¹¹ Alotsü lo I nu, eno I lopiqi tsülo, tishianguno ni ye I pipüsa akemi khochilelu nanike.

¹² Lotsü-loghümi ye akümsapu chekeu ithulu no itshüve cheni ikemu itikütüpa kemi ye vejoi ilo imeve cheni.

¹³ Inaghami piagha lotsü nike piqhi püaghi aye pa phimini pesü sükusho shi qhive paghilo.

¹⁴ Khunono inaqhe itheno idathu asütsa vekipighi pa kisüghümi pütsa cheni keno ti ye ghusho aketoi kümsüve cheni.

¹⁵ Mtomshu keu nipu ye tsütsüghu tsala lo aki alou azü iloghi akeshi;

¹⁶ li ghasüni keu ye amülhü ghasü ake paphi momu au no thazü tsüqüju püha aketoi ke.

¹⁷ Ayi no ayi chighiphe cheni eno timi no timi chighiphe cheni.

¹⁸ Mububo tuchomjo chekemi ye tipau xathi chunani, khuu no pa mpeu khekutoni keno pa ye agigihu ithulu nani.

¹⁹ Azü lono agi yekibide ithulu cheke toi timi lakhi yekibide ye amlo lono ithulu cheni.

²⁰ Kithigha ngo Kithimi yeghi ye khilemu aghapiqilu chemo, timi nhethi no mine chekeu ghi aghapiqilu chemoe.

²¹ Ameshoyi ngo ghükayi ghukimthe kepu ami kümgha acheni, timi ye akishekütsü ithulu keu kiqi lono peju nani.

²² Mbomzümi ye apikhi lo süno akhumu no athi gholono shesü anamu pa nikha pa qhivemo nani.

²³ O tsüaquqo pasü ithilo, eno tsaqütsalei jukuto lo,

²⁴ kughengu kinikülü ye alholo achemo nani, imaye aküka kütsükuqho ghi tiqheli tiqheli pekishe cheni keshea?

²⁵ Kughou atsüni no ghailove no akithe mini ipeghini, eno naghuto lono atsaneghu ghapesü ighini keno,

²⁶ tileno o phimini gholu kepu ambeqo no tsünani, eno alu qhülu kepu pisa aneqo vecheo ithulu nani.

²⁷ O kibo ghenguno ane kichhizü lukümkhashi ithulu no achuqupu ililai pesü akibolomi ngo aqelimi lojilu nani.