AHOLE 26 - Sumi Naga CL (Re-edited) Bible (BSI)

¹ Mütsü tusho lono avütsa qike toi, ghile lono tsüghu ighike toi mbomzümi ghenguno agigihu ye aküzüqhiyi moe.

² Tüghashoqhi momu akhalu no a-a shimono yeche ketoi akiqi kühano ghusho keu ye aphi lo ikughimo nani.

³ Khurshi ngo khurha ghenguno akighikipili eno mbomzümi ghenguno akihepusü acheni.

⁴ Mbomzümi khochile kelo pa ghüzü gholau no pütsa kevilo, tikumo aye nou ghi pa mihive nosake.

⁵ Mbomzümi khochile kelo pa ghüzü gholau no pütsalo, tikumo aye pau no pa ye alokütsümi ipiuve niae.

⁶ Mbomzümi launo asütsa kiye puwu keu ye pa likhi pa pukhu micheve no kütsakungo keu jukhu sho auvae.

⁷ Mbomzümi no aholetsa piakeu ye kinitave keu pukhu no ayeghi nemla no heqhipe aketoie.

⁸ Agigihu pesü mbomzümi tsü chekemi ye apiji pesü asüzü lo tsüghadave ke paphie.

⁹ Mbomzümi no aholetsa piakeu ye shokümzümi no au lo asahu pecheke toike.

¹⁰ Mbomzümi momu shokümzümi piqepe akümla shikeu ye asüzü kipemi no timi kümtsü ghüza aketoi ke.

¹¹ Atsü no idewo pa no mughuve keu chuche ketoi mbomzümi ye anguno anikha kümla shi-ide acheni.

¹² Nongu ye timi khuana pa likhi pau no alokütsüue piche kemi ithi anio? Mbomzümi no pa nguno alau lajupu anie.

¹³ “Alaghila lo abongshuu anie,” ipi akipichimi no picheni.

¹⁴ Ayipa vecheo ahukikha no a-a lono tsüghü keshi akipichimi no pa lüpa lono tsüghü ide züacheni.

¹⁵ Akipichi aküpüghami no ana kulholi lo au chuxusüve no pichi kelauno ikhipe chuni keumu shimove cheni.

¹⁶ Akipichimi no pa likhi pa ye tsükhüi shi khochile chekemi timi tsüni nguno alokütsüu kepi kümsü cheni.

¹⁷ Timi no mtomshu akelo pa tsa kühamu chhosü keu ye alaghi lo atsü cheghi keu kini sünhetsü akeshie.

^18-19 Kütami saküghüzüve no, “I no züghashi ani kelaye” ipi chekemi ye küghüzümi no amiküqü piji, azütakikihi eno akithipu vepuwu akeshie.

²⁰ Asü küha aye ami hailove cheke toi xikishimi kühave aye mtomshu keu ghi tave cheni.

²¹ Amiyi no amibalu chuchighei eno asü no ami küiqü ketoi mtomshu chekemi no kuqhumo keu küiqü cheni.

²² Xikishimi tsapi ye jumghai tino aphimpi alou kutolo ilove cheni.

²³ Alhoksa mlo xapu akichi loye jumghai keu tsa piche kemi ye ayeghi li lo ayizü phuphushi nuda püake toike.

²⁴ Timi mithi chekemi ye tipau küsü niye atsapi lono jonha cheni eno pano mlo lo pishikiqhi kike acheni;

²⁵ kughou pa no küpüqhiyi keu tsa pini keno pa pülü kevilo, kughengu pa mlo lo aphikümqhüpu tsüni ani;

²⁶ pa no pishikiqhi lono akimthipu küsü püaghi namu, mishi zülono paw kixikila pephe piye nani.

²⁷ Timi kitimeni ke aqo chhukemi ye pau no ikiqi ilove nani, khunono atu tukuluqhini keno pau shou ilu ikughi nani.

²⁸ Akimki mili ye pa no ghüzave kemi mithi cheni, eno pishikiqhi kichi ye shiküpsapu süghi cheni.