AHOLE 25 - Sumi Naga CL (Re-edited) Bible (BSI)

Solomon Holetsa Alau

¹ Hipaqo ghi Solomon holetsa, Judah kükau Hezekiah timi no yekide keqo ke.

² Alhou no küsü püakeu thimeqo ye Pa juküvüpu ghengunoe, ikemu tipaqo phuju keu no kükami jekipipue.

³ Atsütsü kuchuqu eno azüghi kutho toi akükau mlo ye lhemlae.

⁴ Ghükayi lono abaghu ikhivelo eno ayikiyiqiu ye jukivipu thime mlaphelu kepu auvae,

⁵ akükau zülono kixikilami ikhive lo eno pa kükalakhü ye achipiu-mikucho lono puthuphelu nani.

⁶ O likhi nou no akükau nhethe lo ngonike momu kijemi-a lo puthughoni keu shikevilo,

⁷ kughengu ghenimi zülono kuchunive pekepu ye “Hilau ikughilo,” ipikeu pavike. O nhethi no kiu ithuluve akeno

⁸ paikhavi no küghakütha-a lo süghi kevilo kughengu thopimi kütami no ighi no o shikujove aye no ye ashekha lo kishive nani kea?

⁹ O kisüghümi nokujo dolono akükümsü kütüqü aghikeu pekithiveni thono kütamiw tuqhou tsa pephe kevilo,

¹⁰ tikumo aye o tsa chilu keu huno o shou akukujopu süghi nani eno o juaje küsa ye küghakibe wove nani.

¹¹ Ado kiqi lono atsa achipiu pilu keu ye ameshoyi akiviu pesü ghükayi shou ananu shipuku püake toi nani.

¹² Pujushijuve kemi kükütsütsa no ini nishi akemi kini lo ilolu keu ye ameshoyi nguthi momu achila toike.

¹³ Ghile tsala külü lo azü kumko toi pükhükulupu ghinimi ye pa puwu keu mpeu ghüthi püxütsü chenie.

¹⁴ Agho tsünie pi atsa qhive no tsümove keu ye tsütsüghu süghimo keu khüngküsü ngo amülhü toike.

¹⁵ Kutuokutuu keu no yepemi züiza luve cheni, eno amili kümtsha no aghi kümka ghi hepholu nani.

¹⁶ Nono akhingozü ithulu kelo chukulupu qhemi thono kiyeve ghi chusüve keu ye mughuve nani.

¹⁷ O kisüghümi kilo chilo o pukhu nesü kevilo, tikumo aye pa no o jupe angave no o mithiuve nosae.

¹⁸ O kisüghümi küla ghi kichile thopi shikeu ye asüthalu, azütakikihi, momu apiji toike.

¹⁹ Aveküsa lo pükhükümlami mungube akeu ye ahu tsümave keu momu akhonhe khokhoshi keu mihike.

²⁰ Amlo ghimemi lau ale phepiye akeu ye süsü tsala lo aphimini xave aketoi, eno azaku lo amti nuda aketoie.

²¹ O ghümi no müzüthi aghi aye pa kughulhu lo, pa no tüghüthi aghi aye azü piyelo,

²² kughengu tino pa kütsü lo ami hipuku tsü aketoi nani, eno Ampeu no asaxü o tsü nani.

²³ Ahuu mülhü no tsütsüghu süghi cheke toi xikishi mili no amlo kighide süghi cheni.

²⁴ Mtomshu keu nipu sasü küghüna akepu ye aki kütsüqa cheku lo akeu pavie.

²⁵ Aghakhu kütau lono asütsa-ale kivi süghi keu ye azü kumko pesü tüghüthi akeu kughoki pütsülu ketoie.

²⁶ Timi kivimi no kixikilami qhou shive keu ye azüpuki momu azükikhe shipuqove keu toike.

²⁷ Akhingozü chilo chukeu ye alomo ketoi alikhi asala ajekipi phukeu ye alomoe.

²⁸ Alikhi aghasümla kemi ye aliwo hepho ilo aphughi leluveke toike.