AHOLE 24 - Sumi Naga CL (Re-edited) Bible (BSI)

¹ Alhoksami jumine kevi eno pano gholo kulojini keu kümsü kevilo,

² kughengu pano mlo ye shiküpsa kughu cheni, eno pano tsapi ye aküküpna xukuthoni keu likhike.

³ Akibo ye alokütsü lono shiqhe cheni eno vethakulu pesü puthuphelu cheni,

⁴ akighithi vecheo acheboqo lo amekusho eno jukivi thime jeli pesü shepichhi cheni.

⁵ Alokütsümi ye akumto no chhitoi, eno kighithimi no pa kumto alau heshelu cheni,

⁶ alokütsü shi mijekeu lono no ye aghü küpüghülu nani, eno mijekütsümi kutomo akeu vecheo tokulu shicheni.

⁷ Mbomzümi ghenguno alokütsü tsa ye chuqumghai ke; küghakütha-a lo pa ye akichi xükho move cheni.

⁸ Alhoksa shiniye kuchughu kemi pesü küsaküghau ipi kucheni.

⁹ Anikhami no kuchughu chekeu ye axine ke, thoküghami ye timi kümtsü kimthibo ke.

¹⁰ Aveküsa tsala lo nono qeinaive aye o kumto ye mikhelo ani.

¹¹ Khuana akumou lono pithiveni ye sawu cheghi aye xaphelo, pa sasü ghikiqhi-a lo sawu chekemi hakhalo.

¹² “Ningu ye hipa vehu mthae,” ipi nongu no pi aghi namu, amlo huju chekeu huye pimhelu anike kumo? O küxü jukuto chekeu no ithi ani eno Pa no timi lakhi kümla kiqi lono tsüchile nanike kumo?

¹³ I nu, akhingozü ye aloke chulo, eno akhi lha lono ijiqighi keu ye ngonyi michelu cheni.

¹⁴ O ngulho ghenguno alokütsü ye titoi kepi ithilo, nono ti phulu aye o ghenguno hithiu lajupu ani eno ow ti ye hauvemo nani.

¹⁵ Kixikilami no amikuchomi kilo püka niye miqe akeshi kevilo, pa kibo xüvetsü kevilo;

¹⁶ kughengu kuchomi ye ghuthu tsüni ikiqive namu ithuve nani ikemu kixikilami ye küsakusho lono ikiqive nani.

¹⁷ Kughou o ghümi no ikiqiveni keno alovi kevilo, eno pa no küpxalu kelo amloqi kevilo,

¹⁸ tikumo aye Ampeu no ithive no alomtshüve nosa, eno pa launo Pa mlokighide süchile luve nosae.

¹⁹ Alhoksami ghenguno o ghaide kevi eno kixikilami mine kevilo,

²⁰ kughengu alhoksami ye agizüu kiumu kühae; kixikilami kulu ye tsüqü pinheve tsü nani.

²¹ I nu, Ampeu ngo akükau msalo, eno tishimo kemi gholo kuloji kevilo,

²² kughengu tipaqo lau züleno amhekiqi ikughi nani eno ti ye Alhou ngo akükau launo ighini keu khuu no ithi ani kea?

Alokütsü Tsa Alau

²³ Hipaqo ghi alokütsümi kipitsa ke. Küghakütha lo agi jukeu ye alomoe.

²⁴ Kixikilami vilo, “No ye achipi,” ipi kemi ye ashiaye kümtsü no ghusho eno shiye kümtsü kimthibo shinani,

²⁵ ikemu kixikilami lomipi sakiyi kemi ye amloqi nani, eno kükümgha kivi pano shou ikughi nani.

²⁶ Kuchou khokichile tsü chekemi ye agimuchu müma tsü nani.

²⁷ Khalau kümla paghi shiqhilu lo; o lu hokide no apiti xusü luve kethiu no o ki shiqhelo.

²⁸ Akiqi küha kelo kütami nguku ghi thopi shi kevi eno o mili pesü pishiqhi kevilo.

²⁹ “Pa no I lau shike toi ni ghi pa lau shini, pa no I tsüke qhemi ni ghi pa tsüchileni” ipi kevilo.

³⁰ I no akipichimi luza ngo kümsükümlami tsailu vechewu,

³¹ ikelo asahubo no ghüsüpe aghi, alupi no ayeghi nhakhape aghi eno atupikiye ghi ileqive aghi.

³² I no ti ithulupe kümsüju kelaye tileno akükütsütsa lakhi ithulue.

³³ Kitila züveni, kitila inguveni, kitila au kumshope akulhoqhini,

³⁴ ipi akelo aqüagha no küpkami toi, athokha no aghünanu kupumi toi o lau ighive nani.