AHOLE 23 - Sumi Naga CL (Re-edited) Bible (BSI)

¹ Kughou nono timi yepemi sasü chuniye iqa keno tsaqüi o zülo kuto püakeu chhejulo,

² eno chunishi kütü aghi namu o müzü-tüghü ghasülo.

³ Pa no achuqupu kutope qhitsüke ghenguno mihemza kevilo, kughengu ti ye o miqe juniye shiaghi nani.

⁴ Küakini phuniye akumou shi o küxü pepuzüve no kulhokugho shimoni ke alotsülo.

⁵ Kughou o nhethi no küakini lo jupukuni keno ti ye pai achishibo ipeghive no alhuqu no kunguu yeikuve ketoi hauve nani.

⁶ Akimchhimi chuqupu chukevilo, pa no achuqupu kutope qhitsü keu minemighei kevilo,

⁷ kughengu pa ye alouno kihi ani. Pa no, “Chusholo!” ipi nani ikemu pa mlo ye o gholo kühae.

⁸ Nono chusüve keu na lothi kümtsü mughu pheve nani, eno nono kujukungo tsa pikeu kümtsü adou shive nani.

⁹ Anikhami vilo atsa pikilhe kevilo kughengu nono akükümsü kivi tsa piakeu pa ye jukünatha nanike.

¹⁰ Khaghilo lughi tusho pekiqe kevilo, momu mighimi ki-alu koluve tsü kevilo,

¹¹ kughengu pano Xachilekuluu ye akumto ke Pa no o kileve ghi pano she petsü nani.

¹² Akükütsütsa lo o mlo tsüqhiyi shilo eno o kini kughope akighithi tsa inilo.

¹³ Atianuli shikümzü sakiyini keu süchile kevilo, nono akihepusü pesü pa heve namu pa ye thimo nani.

¹⁴ Nono akihepusü pesü pa he aye, no ye mtsüqheino Kithigha lono pa küxü xaphelu ani.

¹⁵ I nu, o mlo no alokütsü shi aye, I mlou ghi alokivishi nani.

¹⁶ Kughou o kichi lono achipiu tsa pini keno I ngulho no alovi nani.

¹⁷ Axinemi jumine kevilo, ikemu aküxü tivilo tamono Ampeu sükümsa lono xülo.

¹⁸ Mtsüqheino hithiu akivi ani eno ow lajupu ye hauvemo nani.

¹⁹ Inilo I nu, alotsülo, eno o mlo pesü kuchou laghi küdau qhilo.

²⁰ Shokümzümi momu mihemza chuche kemi gholo kuloji kevilo,

²¹ kughengu pano ye aqüagha lo ilove nani eno ingufufui keu no aphimini küghüta pesü pano puu nani.

²² Aküxü pe o tsükeu o pu tsa inilo, eno o za no topumi shive kelo li thaigha kevilo.

²³ Kuchou qhülulo eno je kevilo, alokütsü, akükütsütsa eno vethakulu qhülulo.

²⁴ Amikuchomi papu ye shishe alovi nani, alokütsü nu papu ye pa nu jupe akijivile nani.

²⁵ O pu ngo o za pelo alovi pelo; o za o punuu pelo amloqi pelo.

²⁶ I nu, o mlo I tsülo, eno o nhethi no I no xüchekeu laghi chheju lo.

²⁷ Kütüqhalimi eno küsalhalimi ye pojo mlani keu qokutho ke.

²⁸ Panongu no küpkami toi alakhe no pükhükümlami kutomo kughukove tsü cheni.

²⁹ Khuu no ahasapu ani kea? Khuu no amlo ghime ani kea? Khuu no mtomshu ani kea? Khuu no muchho ani kea? Khuu no pimhi lono azaku ani kea? Khuu no anhethi huchuyi ani kea?

³⁰ Khunono aji vapesü ado kushuo ngocheni eno aji lekite keu sho cheni keno tipaqo noke.

³¹ Aji no ajukhu lo mlaghubei eno huchuyi shino mtshaminhei qoilo aghi namu tipau ju kevilo.

³² Ashekha lo tino tüghükupu pighi toi mighiqhi nani.

³³ O nhethi no kiumu kühamu ajeli ithulu nani eno o mlo no aveghüzü tsa piuve nani.

³⁴ No ye azüghi lo kichemi no ashukaki kulokuloi keu lo zühumla no chekeshi nani.

³⁵ Nono pi nani: “Timi no I heqhi kemu ni ye izamoe, ikemu ni ye kiumu ithi move. Ni ye kughou no atsüveshe lunani kea? Itaghi kümqa lakhi shomasa ani.”