AHOLE 22 - Sumi Naga CL (Re-edited) Bible (BSI)

¹ Kinikülü kütsasa nguno alau ajuaje kivi kishe kepue, agigihu no ameshoyi momu ghükayi nguno akiviue.

² Kinimi ngo kumlhomi dolo kimshilu chekeu ye hike: Ampeu no pama kinikujo lhoke.

³ Lotsü-loghümi ye akümsapu chekeu ithulu no itshüve cheni, ikemu itikütüpa kemi ye vejoi ilo imeve cheni.

⁴ Aqhokigheu eno Ampeu sükümsa saxü ye küakini, agigihu eno axükushu.

⁵ Chighichilai kemi laghi lo asahu eno alichhe acheni, aküxü jukuto xüche kemi ye tipau lono putosülu nani.

⁶ Achipiu laghi lono atianuli qophe puthulo, pa ye kichimi shive namu tipau lono tsüghüsü wuvemo nani.

⁷ Kinimi no kumlhomi qhasü cheni, eno akünami ye pünatsü akemi qüaxemi ke.

⁸ Khunono achipikumo yisü keno kütsakungo xolu nani, eno pa loghu küsü ye icheve nani.

⁹ Tsü-jekini mlo ache kemi ye kumlhomi sasü achuqupu kijechu chenike ghenguno kümghatsü nani.

¹⁰ Thoküghami hapheve lo, eno kuqhumo keu ye ipeve nani, eno mtomshu keu ngo thaigha kilekeu ye kühave nani.

¹¹ Khunono amlo kimthe eno küpükini tsapi kimiye cheni keno pano ye akükau sasü shompami shilu nani.

¹² Ampeu nhethi ye akighithi shou jupuku acheni, ikemu Pa ye kimkimi tsa hasüve tsü cheni.

¹³ Akipichimi no aki lo ngo niye picheni: “Khalacheu abongshuu anike alaghila lono I tsüchuve nosae.”

¹⁴ Küsalhalimi kichi ye aqokuthoe; Ampeu no khuu jupe amloide ani keno pa no tile ikiqi ilove cheni.

¹⁵ Itimi mlo loye alhoaye lono mbomzü shikeu acheni, ikemu sakiyi keu küsü huno tipau hapheve tsü cheni.

¹⁶ Küakini kughuko niye kumlhomi nedaqoda, momu tughotili pesü kinimi tsü chekemi ye kumlhomiu shi nani.

Alokütsümi Tsa

¹⁷ O kini kughope alokütsümi tsa inilo eno I kighithi tsa lo o mlo tsüqhiyi shilo,

¹⁸ kughengu nono tipaqo pesü o lolo qhilu, ti kümtsü o kichi lo kutope qhilu aye, o lokiqipu shi nani.

¹⁹ Tishianguno o küpkhü kümtsü pesü Ampeu shou belu nani, I no hipaqo pesü ishi ghi o vilo pive ani.

²⁰ Ni ye o ghenguno mijekütsü eno akighithi kipitsa shighi yepe

²¹ o pelo kiu no kuchou eno achipi keno ithi püzü kuchou khokichile pesü o puwu kemi tsü peniye shike kumo?

²² Kumlhomi ke shiaghi kehu paw süxa luve tsü kevilo, küghakütha-a lo shilusa akeqo chunudaqhi kevilo,

²³ kughengu Ampeu no panongu she petsüni aphi eno pano pükaqhi püakemi küxü luve tsüni aphike.

²⁴ Timi khunono amloide kalo momu axuide cheni keno tipaqo sasü shompami shikevilo,

²⁵ tikumo aye pa lhoaye shika luve no alichhe lono meluve nosae.

²⁶ Tüsümi piagha ghenguno amakho putsü nike piqhi kevilo.

²⁷ Nono lovetsü kepu thime kiumu aghimo aye kushiye o lüpa kutolo lipusü wuvetsü apeni kea?

²⁸ Khaghilo no puasüqo no shokeu lughi tusho pekiqe kevilo.

²⁹ Kütshakügha kümlami ithi anima? Pa ye timi no ithimo kemi zülo kumono kükami zülou puthugho nani.