AHOLE 21 - Sumi Naga CL (Re-edited) Bible (BSI)

¹ Akükau mlo ye Ampeu u lo aghoki zü aketoi, khilekhile mu Pa gholau no sawu cheni.

² Kümtsü no pau no achipie pi kümsü cheni, ikemu Ampeu no amlo huju cheni.

³ Aghakishi nguno amikucho eno achipiu shikeu huno Ampeu zülo ikhikulupue.

⁴ Tsütsüngoju keu nhethi eno aqheküza mlo ye kixikilami kulu, ti ye axine ke.

⁵ Azükinimi kukughu ye kuchou no nibonilei keu lalo sawu cheni ikemu chokilhe chekemi ye aqüagha shive cheni.

⁶ Akimki mili pesü küakini ithulu keu ye amülhü no amchhi fupe wuve keshie, ti ye akithi lichhe ke.

⁷ Kixikilami ye pano yiküsa no kütsakungove nani, kughengu pano ye achipiu shini keu milive cheni.

⁸ Pimive kemi laghi ye ihoghülaie, ikemu amlo tsüghükhüi kemi küxü ye müzüchoi ke.

⁹ Mtomshu keu nipu sasü küghüna akepu ye aki kütsüqa cheku lo akeu pavie.

¹⁰ Kixikilami mlo ye alhoksa likhi mineqhiyi acheni; pano küsami ye pa launo küpükini ithulu chemoe.

¹¹ Thoküghami ghime aye itikütüpa kemi no alotsülu cheni, alokütsümi kütsüshika aye pa ye akighithi ala ithilu cheni.

¹² Amikuchou no kixikilami kibo chheju cheni; pa no kixikilami sünheqhipe kütsave cheni.

¹³ Khunono kumlhomi sütsa initsü moni keno kutou pa no ku kelo pa sütsau ghi khochile tsümo nani.

¹⁴ Tuqhou no agho chheve aye amlokighide ghaqhilu cheni, küsüuno asaxü tsükeu no aloghu küghüqülu cheni.

¹⁵ Kuchou xakütha ye amikuchomi lokivipue ikemu alhoksami ghengu ye kümsapue.

¹⁶ Kümsükulumi launo itsüsü wuve kemi ye kithimi gholo ngo nani.

¹⁷ Ashi ghakiqipu kimiye chekemi ye kumlhomi shinani; aji ngo thazü kimiye chekemi ye kinimi shimo nani.

¹⁸ Kixikilami no Amikuchomi ghenguno ghapheu shicheni, eno pishikiqhimi no akümzümi ghenguno ghapheu shicheni.

¹⁹ Mtomshu eno muchhomghoi keu nipu sasü akepu ye yenguyelei ke-a lo akeu pavie.

²⁰ Akughupu thime ngo thazü ye alokütsümi kilo acheni, ikemu mbomzümi ye tipaqo kishi chuve cheni.

²¹ Khunono achipiu mikucho eno kimiyeqhiyi keu phucheni keno aküxü kivi eno agigihupu phulu nani.

²² Alokütsümi no aghütomi phughi mghoiku pano no pükhü chekeu liwo kumto ghi xalevetsü cheni.

²³ Khunono akichi ngo amili kütsü kiyi cheni keno aküküpna lono pojolu cheni.

²⁴ Aqheküzami, tsütsüngoju kemi je “Thoküghami,” pa ye alhokuthu akülaki piye cheni.

²⁵ Akipichi no timi heqhive chekeu ye pa u pesü mlani shimo no a-a lono lajuke likhi keu lonoke.

²⁶ Puchopuju pa ye mineqhiyi keu likhi ikemu amikuchomi ye süchile mono tsü cheni.

²⁷ Kixikilami ghakishi ye aphikümqhüpue, imaye pa no alhoksa kimji lono mllani kelo kishita akimthipu kelae.

²⁸ Kichile thopiu ye pühave nani, ikemu pa tsa chiluve keu ye küghakibe wove nani.

²⁹ Akümzümi ye pa ghili kümsü kutoju cheni ikemu kixikilami ye ithi ake ghilishi teqhitelei acheni.

³⁰ Alokütsü, vethakulu, mijekütsü kiunomu Ampeu theqhimla nani.

³¹ Aghüshi tsala ghenguno khurshi kutope qhicheni, ikemu tokulu ye Ampeu u lo anie.