AHOLE 20 - Sumi Naga CL (Re-edited) Bible (BSI)

¹ Aji ye akiphikumo, aküpütsü ji ye mtomshu chekeu, aji no saküghüzüve kemi ye alokütsümi kumoe.

² Akükau loghu ye abongshuu ghügha toie; khuu no pa xukutho puthuni keno aküxü pühave cheni.

³ Aküküpna lono putosü luve kemi ye agigihupu ke, ikemu mbomzümi thaqhü no mtomshu acheni.

⁴ Akipichimi ye atusho achipi lono alu hokide chemo kehu ghile ghuloki loye lukepu kiumu kühave cheni.

⁵ Milakhi lolo akimji akeu ye azü kutho toie, ikemu vethakulumi no ti shophelu nani.

⁶ Timi kutomo no iqemokeu kikimiye anie picheni, ikemu khuu no pükhükulupu timi phulu nani kea?

⁷ Amikuchomi khuu no akikhishi xücheni keno pa tianuli pa thiu chekemi ye akümghapue!

⁸ Akükau khuu no küghakütha-a lo iqa cheni keno pa no alhoksa ithulu kelo amuu toi kümtsü fuleve cheni.

⁹ “Ni ye I xine shikimthe luvae; I mlo ye tsüghükhüivae,” ipi khuu no pilu nani kea?

¹⁰ Ahu tu ngo ahu aqhemi shi peithamo keu kinikujo Ampeu zülo aphikümqhüpue.

¹¹ Itimiu ghi pa ghili-aye lono pa ye tsüghükhüi eno müzüchoi kemo keno piyeve cheni.

¹² Chikulu kini eno ithukulu nhethi kinikujo Ampeu no mla tsüke.

¹³ Züani keu mine kevilo, tikumo aye aqüaghami shive nosae; o nhethi xükholo, no ye chukepu kupukuno shi anani.

¹⁴ “Aloamoe, aloamoe,” aküqhümi no picheni ikemu pa no pewuve no aqheküza shi alhi saqhilu keu picheni.

¹⁵ Ameshoyi ngo akughupu tu pofushi acheni ikemu kighithimi mili huno achiku mekusho toike.

¹⁶ Inaghami piagha lotsü nike pi püaghi aye pa phimini pesü sükusho shi qhive paghilo.

¹⁷ Pishikiqhi lono ithulu keu ye jumghai ikemu kutou ye abaxa lo atusaye toi nani.

¹⁸ Mijekütsü lono akukughu huthu phelu cheni, alokütsü shi kichemije keu lono aghü küpüghülo.

¹⁹ Khunono timi xishi itsüwu cheni keno tuqhou zaleve cheni kehu titoi itikütüpa zale chekemi sasü kuloji kevilo.

²⁰ Apuaza ghusho aye o küxü ye akulu tsüqü pinheve tsü ketoi aküzü kutho lo ilove nani.

²¹ Abothu lono chokilhe amheghi ighiluve keu ye ashekha lo kükümgha ithumlave nani.

²² “I no alhoksau lochileni,” ipi kevilo, Ampeu huqhelo, eno Pa no o xaphelu nani.

²³ Ahu tu aqhemi shimo keu ye Ampeu zülo aphikümqhüpue, eno ahu kichile ye alomoe.

²⁴ Ampeu no timi ghenguno alaghi kutotsü cheni kethono timi ye kishino pa küxü laghi ithini kea?

²⁵ Chokilhe shi “Hi ye akimthe ke” ipive no ashoqhi kümsü kutoju akeu ye alichhe ke.

²⁶ Alokütsü kükau no kixikilami küghape amuu toi fuleve no munuqhi cheni.

²⁷ Timi nguagha ye Ampeu kulu, tino pa mlo alou akeu kümtsü phuju cheni.

²⁸ Kikimiye ngo pükhükulupu no akükau püxüpe qhicheni, eno pa kükalakhü ye iqemokeu kikimiye no choqhe cheni.

²⁹ Lhothemi kijivilepu ye pano kükakumto noke, ikemu layemiw jukivi ye pano sa kümpa noke.

³⁰ Khaniloye hebuve keu no alhoksa shikimthelu cheni; kitihe chukeu no amlo shikimtheve tsü cheni.