AHOLE 2 - Sumi Naga CL (Re-edited) Bible (BSI)

Alokütsü Meküa

¹ I nu, nono I tsa ikhilu eno o küxü lo I zakütsüqo akughupushi pelu aye,

² tsaqütsalei o kini kughope alokütsü tsa ini eno o mlo pesü vethakulu kighithi lo mungu aye,

³ Iyei, nono kuthoküzü kighithi khu eno vethakulu ghenguno qhüiniju aye,

⁴ nono ghükayi momu küsü püakeu kinibo phuche keshi phuju aye,

⁵ tileno nono Ampeu sükümsa ye kiu keno vethalu nani eno Alhou kighithi phulu nani.

⁶ Kughengu Ampeu no alokütsü tsücheni; Pa kichi lono akighithi ngo vethakulu ipeghi cheni.

⁷ Pa no amikuchomi sala peitha kulupu lokütsü pükhatsü cheni; Pa ye akikhishi xüche kemi züto,

⁸ achipiu shiche kemi la Pa no süshope acheni eno Pa küpülümi laghi khekuto acheni.

⁹ Nono I tsa ini aye achipiu eno amikucho, aghibiu eno alaghi kivi kümtsü ithikuthulu nani;

¹⁰ kughengu alokütsü no o mlo lo iloghi nani, eno akighithi no o küxü lo alokiqipu tsü nani;

¹¹ kimchikulupu kighithi eno vethakulu no o khekuto nani,

¹² alhoksa laghi lono, momu atsa tuchighi chekemi launo o xaphelu nani,

¹³ aküzü lo xüniye müzüchoi keu laghi pheve kemi launo xalu nani,

¹⁴ alhoksa kümla lo azüküvü shi, akumou küsakügha shikeu lo aghakiqi shiche kemi launo,

¹⁵ aküxü ihoghülai kemi eno pishikiqhimi launo o xalu nani.

¹⁶ Alokütsü no ghaghulimi eno kikivi nishi züiza chekemi totimi launo o xaphelu nani,

¹⁷ li ye Alhou zülono puloshoqhi shikeu kümsümave no li lhothe lo kimi pheve cheni;

¹⁸ ikehu li ki laghi ye kithila ke, eno li kilo ilove aye kithimi yeghi lo iqivae,

¹⁹ li lau wu kemi khumu ideighilu chemo, pa ye khilemu aküxüpu laghi lo ideighi chemoe.

²⁰ Alokütsü tsa ini aye no ye akivimi laghi pülalu no amikuchomi lalo cheche nani.

²¹ Kughengu müzüchoi kemi eno akikhimi no ayeghi lo akütsashi xülu nani,

²² ikemu kixikilami ye Alhou no ayeghi lono ikhive nani, eno mqüqhi chekemi ye nhüve nani.