AHOLE 19 - Sumi Naga CL (Re-edited) Bible (BSI)

¹ Kumlhomi shino akikhi shi akeu no anikha shino kimkimi shi akeu nguno akiviue.

² Akighithi kühano amlokütsü shikeu ye akivi kumoe, ngosü kümlami ye pa laghi vezüve cheni.

³ Kughou mbomzümi no pa nikha lono shiküpsapu sholuveni keno Ampeu ju axuide cheni.

⁴ Küakini no shompami kithe phulu cheni ikemu kumlhomi ye paw shompami ghi pa qhive cheni.

⁵ Kichile thopiu ye aghimepu lono pojoluni keu kumoe, eno alatsa piche kemi ghi povemlae.

⁶ Kümtsü no timi akhotomi lopu shiniye pükapütsa cheni; eno tsükinimi sasü küsapau shinike pükha cheni.

⁷ Kumlhomi ye pa thiküzümi no mithiuve cheni, imaye pa küsamiu ye kishita pa launo putosüve cheni kelae! Pa no qhüiniju pape chenamu panongu phulu chemoe.

⁸ Khunono kümsükulu ani keno pa likhi pa kimiye cheni, khuu no vethakulu ani keno akivi phuphelu cheni.

⁹ Kichile thopiu ye aghimepu lono pojoluni keu kumoe, alatsa kipimi ye pühave nani.

¹⁰ Mbomzümi ye tule-pele xükepu kumoe, tinguno alhoksau ye aqüaxemi no kijemi shou ayepeuve keue.

¹¹ Kümsükulu no timi pelo asheshi no amloidepe cheni, eno timi kipimi juzüve tsükeu no agigihupu ke.

¹² Akükau loghu ye abongshuu ghügha toi ikemu pa kivi huno atsüni shou atsüzü qipuku ake toike.

¹³ Mbomzü nu ye papu mhekiqi shitsü cheni eno mtomshu keu nipu ye aki alou tsütsüghu zü ijiqighi ake toike.

¹⁴ Aki ngo küakini ye apuaza launo ighilu cheni, ikemu lotsü-loghü nipu ye Ampeu launo ke.

¹⁵ Akipichi no timi pelo züchei ape cheni eno akipichimi ye akhüava shinani.

¹⁶ Azakütsü peche kemi ye aküxü püxülu ani, khuu no ti jukünathani keno thi nani.

¹⁷ Ililai kumlhomi tsü-je kemi ye Ampeu püna ani, Pa no tipau ghenguno lochile nani.

¹⁸ Lajupu anike ghenguno o tianuli shikümzü sakiyi lo; pa pelo akithipu lo ilove peni keu kümsü kevilo.

¹⁹ Aji kumqhomi ye pa xukighide lame lochile masa nani, nono pa xaphe aye no ye akiniu ghi tishi masa nani.

²⁰ Mijekütsü ini eno akükütsütsa ikhilu lo, tishikeu lono no ye hithiu alokütsü ithiküphalu nani.

²¹ Timi lolo akukughu kutomo shipeqhi cheni, ikemu ashekha loye Ampeu kimji likhino puthugholu nani.

²² Timi no laju chekeu ye iqemokeu kikimiye ke, kimkimi shi akepu ye kumlhomiu pavie.

²³ Ampeu sükümsa no aküxüpu lo sawu cheni, ti akemi ye aloqiqhiyi kiunomu shipüsamla no akulhoqhilu cheni.

²⁴ Akipichi aküpüghami no ana kulholi lo au chuxusüve no pichi kelauno ikhipe chuni keumu shimove cheni.

²⁵ Thoküghami kitihelo, itikütüpa kemi no alotsü luve nani, vethakulumi sakiyilo, pa ye alau akighithi ithuluve nani.

²⁶ Apu peitha püsa eno aza hapupo chekemi ye akukujopu eno küthaküghapu süghi cheni.

²⁷ I nu, akükütsütsa ini move aye no ye akighithi tsa vepimive niae.

²⁸ Ameküküha thopimi no achipiu xakütha thaigha cheni, eno kixikilami kichi no axine munove cheni.

²⁹ Thoküghami ghenguno aghime eno mbomzümi ghenguno akihepusü kuto püani.