AHOLE 18 - Sumi Naga CL (Re-edited) Bible (BSI)

¹ Timi gholo xukütshü mokeu ye pa pulou likhi phucheni, pa ye mtsümishei keu xakütha kümtsü hebide cheni.

² Mbomzümi ye pa kükümsü küsajelu kelo likhino thono vethakulupu kighithi lo azüküvü shi chemoe.

³ Kughou kixikila ighini keno thokügha ghi ighi cheni, eno akiphikumo gholono akukujopu ighi cheni.

⁴ Timi kichi lo tsa ye azükutho toi lheilo tomlae; ikemu alokütsü züpuki ye aghoki zü kuqo toike.

⁵ Agikujushi kixikilami saphuve no amikuchomi pelo kuchou xakütha ithumlavepe keu ye alomoe.

⁶ Mbomzümi mili no akikichighi lo sailove cheni eno pa tsapi no akihepusü kusü cheni.

⁷ Küghüzümi tsapi no pa kütsave cheni eno pa mütsü no pa meluve kepu lichhe ke.

⁸ Xikishimi tsapi ye jumghai, tino aphimpi alou kutolo ilove cheni.

⁹ Khunono pa kümlapu lo pichi cheni keno, pa ye shiküpsau thiküzüu ke.

¹⁰ Ampeu je ye aqoghe kumto ke, amikuchomi no tipau lo poilo sükusho ithulu cheni.

¹¹ Aphughi lakhi sükusho ye aliwo qhemghai keu shou kepi kümsü cheke toi küakini no kinimiw sükusho ke.

¹² Kütsakungo mphilo timi mlo ye tsütsüngoju cheni, ikemu agigihupu ighi nike züu aqhokigheu shicheni.

¹³ Khuana no chilu mphi züuno khochileve aye, ti ye pa nikha eno akukujopu ke.

¹⁴ Timi lolo xünishi keu kupulo no küsükini puqhelu cheni, ikemu anguagha chunudave aye khuu no puqhe luni kea?

¹⁵ Aqho-aji tsüghükhüi kemi mlo eno alokütsümi kini no akighithi ithi küphalu cheni.

¹⁶ Milakhi gho no pa ghenguno ala khaqhitsü no pa sasü akhotomi zülo ighilu chenipe.

¹⁷ Küghakütha-a lo khuu paghino pa sheamzü tsa pini keno pa külami tsa chilu moke kutolo pau no achipiu toi cheni.

¹⁸ Aküka kumto küami mqo kini dolo küthakile mlano kitighe auve aye asakiqhi lono achipiu kimchi luve cheni.

¹⁹ Athiküzüu loshipüsüpe akeu ye aliwo kumto phughi lenikeu nguno akushou, mtomshu keu ye adolo ayi khagho ake toike.

²⁰ Akichi lono piqhikeu tsa no milakhi ghapiqi tsü cheni, akivi na aküsa namu pa no tipau xathi xolu nani.

²¹ Akithi eno aküxü ye amili küka shou ani, ti peitha chekemi no kivi-küsa kiqi lono axathi xochu nani.

²² Khunono anipu phuluni keno pano küxü lo akivi phuluvae eno Ampeu no pa lau akivipu shive tsüae.

²³ Kumlhomi ye mlominyi shi qhüiniju cheni, ikemu kinimi ye akiphikumoshi khochile cheni.

²⁴ Shompami kutomo akemi ye kütsakungo süghive cheni, ikemu khami ye athiazü nguno punukhoi kemi acheni.