AHOLE 17 - Sumi Naga CL (Re-edited) Bible (BSI)

¹ Kuqhumo keu kilo tule-pele ilhu akepu ye qümüi ana lothi kichechu akeu pavie.

² Alokütsü qeu huno akukujopu süghi chekeu nu shou ayepeuve no athiküzümi gholo amheghi ighiuve cheni.

³ Ameshoyi ngo ghükayi ghukimthe kepu ami kümgha acheni, ikemu timi mlo ye Ampeu no peju cheni.

⁴ Alhoksami no kixikilami tsa ini cheni eno kimkimi no pishikiqhi tsa ini cheni.

⁵ Kumlhomi shikujo kemi ye pa Lhoküsüu thaigha ani, amhekiqi sholu kelo alovi keu ye ghime moveni keu kumoe.

⁶ Kitemi kütsükuqho ye pa tilimiqo ke, eno atianuliqo kijivilepu no panongu papuqo ke.

⁷ Mbomzümi ghenguno atsapi kivi ye amekühae, titoi gihuküzümi ghengu ghi akimki tsapi ye ameküha ke.

⁸ Khuu no külügho tsücheni keno pa ye aghatu kipighimi no kinikülü shilu nanie pi kümsü chekeu paphie.

⁹ Kikimiye lono xünishi chekemi ye akipimi pevetsü cheni, ikemu tipau pi-ide chekemi ye aposhumi pühave cheni.

¹⁰ Anikhami philo ghuthu aqhe piqi hepuku akeu nguno alau vethakulumi ye ghuthu khavi sakiyi kelono ithive cheni.

¹¹ Alhoksami ye hekibide likhi phucheni kehu pa mjo peniye ayiküsa ghinimi puwu nani.

¹² Mbomzümi ghüzü sasü kusholu akepu ye ati pühave keu avaqu mu sholuveke pavie.

¹³ Khuana no alhoksa pesü akivi lochile aghi aye alhoksa ye khilemu pa ki lono ipemae.

¹⁴ Mtomshu thuve aye azü khetha püakeu poleve ake toi, tighenguno mtomshu mphi lono ti lakha luvelo.

¹⁵ Kixikilami pesü achipiu shivetsü keu ngo amikuchomi kileve keu pamagha Ampeu zülo aphikümqhüpue.

¹⁶ Kushiye mbomzümi lakhi ye kümsükulu küha keghi pa u lo pisa pesü alokütsü qhüniye shicheni kea?

¹⁷ Shompami ye ado kümtsü lo kimiye kile cheni eno athiküzümi ye aveküsa tüqhüdo ghenguno punu püani.

¹⁸ Kümsükümlami no kütami piagha ghenguno amakho putsü nike pa küsami zülono piqhi cheni.

¹⁹ Khunono axine kimiyeni keno aküküpna kimiye cheni; ahukikha khaqhipe tsütsüngoju kemi ye kütsakungo phu ani.

²⁰ Amlo chighichilai kemi ye akivi pephelu chemo eno pighizü mili kupumi ye küsakusho lo ikiqive cheni.

²¹ Anu mbomzümi aghikeu ye apu mlo ghimepue, mbomzümi papu ye alokivi kühae.

²² Aloqhaqhilei keu ye küsüvi kivi, ikemu anguagha thibui keu ye aghi-anhü pithive tsücheni.

²³ Kixikilami no achipiu xakütha tuchighive tsüniye tuqho-tughou no külügho luve cheni.

²⁴ Kimchikulumi ye alokütsü küdau jupuku cheni ikemu mbomzümi nhethi no aqha kümtsü lo jupuwo acheni.

²⁵ Mbomzü nu ye papu mlo ghimepu eno pa punuu aza ghenguno kukhukimjipue.

²⁶ Pimimo kemi shou asüchu keu, momu amikucho shike ghenguno gihuküzümi heqhi keu ye alomoe.

²⁷ Khunono akighithi ani keno atsa süchile ithi cheni, eno vethakulumi no alikhi aghasülu cheni.

²⁸ Mbomzümiu ghi inaqhoive aye alokütsümie pi kihi cheni, pa mütsü kujukha luve aye kighithimie pi kihi cheni.