AHOLE 16 - Sumi Naga CL (Re-edited) Bible (BSI)

¹ Timi no amlo lo kümsü akeu kiqi lono kughuphe cheni, ikemu khokichile ye Alhou launo ighi cheni.

² Khami ye pau no achipie pi pa lolo kümsü acheni, ikemu Ampeu no pa kükümsü huju cheni.

³ Ampeu lau o kümla eno o kukughu kulhuqhi tsülo eno Pa no tipaqo iqhikumto tsü nani.

⁴ Ampeu no mla püakeu kümtsü akimji ani, kixikilamiu ghi küghakütha tsala ghenguno qhipüani.

⁵ Amlo lono qhezalaki kemi Ampeu no aphimqhü cheni, panongu ye ghime moveni keu kumo kepi thebei ithilo.

⁶ Iqemokeu kikimiye ngo pükhükulu vecheo axine pevetsü cheni, eno Ampeu sükümsa vecheo alhoksa lono tsüghülu cheni.

⁷ Kughou milakhi no Ampeu lopu shini keno, Ampeu no pa ghümiu ghi pesü külashitsü cheni.

⁸ Amikucho lono kitila qelu keu no achipikumo lono kütsasa ithulu keu nguno akiviu ke.

⁹ Timi no amlo lono pa küxü laghi kughuphe cheni, ikemu Ampeu no pa pukhu nepa iqhikumto tsü cheni.

¹⁰ Akükau ye müzüküsü tsa piqhi cheni, pa kichi loye küghakütha tsa pive no axine shichemoe.

¹¹ AMPEUw ahu eno ahu tu ye achipi ke, akimghipu lo ahu tu akeqo ye kümtsü Pa kümla ke.

¹² Kükami no alhoksa mlakeu ye aphikümqhüpue, kughengu kükalakhü ye achipiu mikucho pesü puthuphe püani ke.

¹³ Amikucho mili ye akükau lopue, pa ye khunono achipi tsa pini keno pano kimiye cheni.

¹⁴ Akükau loghu ye akithi shepe kimihi kehu alokütsümi ye pa ghozüiza cheni.

¹⁵ Akükau gi küvü lo aküxüpu ani, pa mlokiqipu shilu keu ye tixilo tsütsüghu süghi chekeu khüngküsü toike.

¹⁶ Alokütsü ithulu keu no ameshoyi nguno kishi akiviu kela! Ghükayi nguno vethakulu kishelu keu pavibei ke.

¹⁷ Akümzümi laghi ye alhoksami launo putou acheni, khuu no pa laghi jukutoni keno aküxü pükhalu cheni.

¹⁸ Kütsakungo nike zülo aqheküza acheni, eno ikiqi mphi züu tsütsüngoju keu acheni.

¹⁹ Qhezalaki kemi sasü hakhokulu kini küsaje akepu ye aqhokigheu shi kumlhomi gholo akeu pavie.

²⁰ Kütsüshika kelo amlotsü qhiyi keu ye akivi phuphelu nani, khuu no Ampeu shou pükhüni keno akümghapue.

²¹ Alokütsümi vilo kimchikulupu kighithi akemi ipi cheni, atsapi lo jumghai keu no alau timi züizalu cheni.

²² Kümsükulu akemi ye aküxü züpuki ani ikemu mbomzümi kükütsütsa ye anikhae.

²³ Alokütsümi ye pa tsa kilhe mono pikepu likhi kishepe pive kelo timi züiza luve cheni.

²⁴ Küpüqhiyi keu tsa ye akhingozü toi angulho ghenguno ngonyi eno aphimpi ghenguno akumto ke.

²⁵ Khami müzülo alaghi khikhino achipi kepi kümsü ani keno ashekha loye tino akithipu laghi shi aghive cheni.

²⁶ Akümlakishiu ye chumasa kehu mlaitha akelo pa müzü-tüghü huno pa ghenguno mlatsü ake toive cheni.

²⁷ Amekükühami no alhoksa kuchughu acheni, eno pa tsapi ye ami no pitipüzaqhi akeshie.

²⁸ Küsaküghami no kuqhumo keu veküpha cheni eno xikishimi no aposhumi dolo küghüxave tsü cheni.

²⁹ Kütsakungo kemi no pa küsami müsü sawo alaghi alomo keu lo ilove cheni.

³⁰ Anhethi kütsüpe tsü chekemi ye achipikumo kuchughu ani, Khunono amtsü mikipe tsü cheni keno alhoksa shiniye ani.

³¹ Asa kümpa ye ajuküvüpu kütsükuqho ke, amikucho küxü no ti qelu cheni.

³² Asheshino amloide chekemi no aghütomi nguno akiviue, alikhi aghasülu keu no aphughi lelu keu nguno akiviue.

³³ Timi no asaqhi cheni kemu tipau xakütha ye kümtsü Ampeu launo ighi cheni.