AHOLE 15 - Sumi Naga CL (Re-edited) Bible (BSI)

¹ Mtshaminhei khochile keu no aloghu ikhive tsücheni, ikemu atsa kümka no amlo kighide xukutho cheni.

² Alokütsümi mili no akighithi she petsü cheni, ikemu mbomzümi kichi lono aghüzü tsa puqule cheni.

³ Ampeu nhethi ye a-a kümtsü lo alhoksami ngo akivimi jukuto acheni.

⁴ Akümtsha mili ye aküxüpu sübo ikemu ti tuchighive keu no anguagha kütsave tsü cheni.

⁵ Mbomzümi no papu kükütsütsa jukünatha cheni, ikemu kümsükulumi no sakiyi keu ikhilu cheni.

⁶ Amikuchomi kilo akinikhuki kije ani ikemu kixikilami kini ilokighi lalo aküküpna acheni.

⁷ Alokütsümi kichi lono akighithi veküphalu cheni thono mbomzümi mlo lono kumoe.

⁸ Kixikilami ghakishi ye Ampeu zülo aphikümqhüpue, ikemu timi kivimi kighini no ikhikulupu shi cheni.

⁹ Kixikilami laghi ye Ampeu zülo aphikümqhüpue, ikemu Pa no achipiu mikucho phukemi kimiye cheni.

¹⁰ Achipiu laghi pheve kemi ghenguno aghime kije ani, khunono shikümzü keu mithi cheni keno thi nani.

¹¹ Kithigha ngo Kithimi yeghi ye Ampeu zülo khaqhi püani aye timi mlo ye kishi Pa zülo pekiphe shi acheni kelae!

¹² Thoküghami ye shikümzü tsü penishi chemoe, pa ye khilemu alokütsümi lau wuni chemoe.

¹³ Agi qhaqhilei keu huno aloviqhiyi akeu mlo piye cheni, ikemu amloksa vecheo anguagha thibuive tsü cheni.

¹⁴ Khunono alolo vethakulu ani keno akighithi phucheni, ikemu mbomzümi ye anikha ghili likhi mzachu cheni.

¹⁵ Anguküsami ye aküxü tivilo ado lhoksa likhie, ikemu amlo qhaqhilei kemi ye alokivishi chusho acheni.

¹⁶ Akini kütsasa apüzü aküküpna bolo akepu ye aghulo likhi püzü Ampeu sükümsa shi akeu pavie.

¹⁷ Atha pubeyi keu shi chuno kimthikile akepu ye kimiye kile kemi sasü ayetsüni ghulhu shi akeu pavie.

¹⁸ Aji kumqhomi no mtomshu keu huthuphe cheni, ikemu asheshino amloide kemi no küghüqü tsü cheni.

¹⁹ Akipichimi laghi ye asahuli toi, ikemu akümzümi laghi ye müdüniyi keu laghila toie.

²⁰ Alokütsü nu ye apu mlokiqipu, ikemu mbomzümi no paza thaigha cheni.

²¹ Kümsükümlami ye nikhanigha shikeu lo alovi cheni, ikemu vethakulumi ye müzüchoi agizüu xüwove cheni.

²² Mijekütsü küha kelo akukughu kümtsü tomove cheni, ikemu mijekütsümi kutomo akeu lono tolu cheni.

²³ Achipishi khochile keu ye timi lokivipue eno aghuloki kiqi lono atsa achipiu pilu keu ye kiutoi akivi kelae!

²⁴ Lotsü-loghümi ye aqhou Kithigha laghi lono tsüghüsü kunguu aküxüpu lalo wuve cheni.

²⁵ Ampeu no aqheküzami kibo kütsave cheni ikemu chimemi lughi süshotsü cheni.

²⁶ Kixikilami kükümsü ye Ampeu no aphimqhü cheni, ikemu küpüqhiyi keu tsa ye Pa lokiqipue.

²⁷ Achipikumo kini mine keu ye pa kibo lo aküküpna xusü ani ikemu külügho mithi kemi no xülu nani.

²⁸ Amikuchomi ye kishi khochile kepu keno kümsüju cheni, ikemu kixikilami kichi lono alhoksa tsa picheni.

²⁹ Ampeu ye kixikilami launo putosüu ani ikemu Pa no akivimi kighini chilutsü cheni.

³⁰ Agi küvü huno amlo lopiqitsü cheni eno asütsa kivi no aghi anhü shipüxü tsü cheni.

³¹ Aküxü kütsü shi shikümzü kelo chilu aye alokütsümi gholo xünani.

³² Akükütsütsa jukümghaleve keu ye pa ampi thogha ani, ikemu shikümzü kelo ikhilu keu ye alotsü kithe nani.

³³ Ampeu sükümsa ye alokütsü kükütsütsa ke, agigihu ithulu mphi züuno aqhokigheu shimasae.