AHOLE 14 - Sumi Naga CL (Re-edited) Bible (BSI)

¹ Totimi dolo alokütsüu no akibo puthuphe cheni, ikemu mbomzümi u no ti xaleqhive cheni.

² Khunono müzüchoi xücheni keno Ampeu sümsa cheni, ikemu mqümgha shiche kemi ye Pa jukünatha cheni.

³ Mbomzümi kichi lono pa kihepusü ipeghi cheni, ikemu alokütsümi kichi loye sükusho tsa likhi picheni.

⁴ Alu kümla mishitsü küha kelo abiale ye kümsa shive cheni, ikemu amshitsü küka lono athi pofushi acheni.

⁵ Pükhükulupu thopiu ye miki chemoe ikemu kichile thopiu ye atuthukishe kümtsü alatsa likhie.

⁶ Aqheküzami ye adou lono alokütsü phucheni ikemu vethakulumi ghenguno mlalei akighithi phulu cheni.

⁷ Mbomzümi launo putosüve lo, kughengu pano gholo ye akighithi ithulumo nani.

⁸ Lotsü-loghümi ye kimchilu kepu lokütsü acheni, ikemu mbomzümi ghüzü ye pishikiqhi ke.

⁹ Akipimi kümllagho tsü kelo anikhami no thaigha cheni, ikemu akümzümi ye axine peve tsükelo alovi cheni.

¹⁰ Alolo kukhukimji akeu ye amlo no ithi ani eno khunomu tipau pesü küsajelu chemoe.

¹¹ Kixikilami ki ye kütsave tsü nani ikemu akümzümi phiki ye ikowolu nani.

¹² Alaghi khikhino achipi kepi kümsü ani keno ashekha loye tino akithipu laghi shi aghive cheni.

¹³ Khaniloye nu anamu amloksa shipühalu chemo, eno alovi akeu ashekha loye amloghuju aghi nani.

¹⁴ Athiu idewove kemi ye pa kümla xathi xopipe nani, eno akivimi ghi pa kümla xathi xolu nani.

¹⁵ Itikütüpa kemi ye chikulu kümtsü pülü cheni ikemu kümsükulumi ye pa pukhune kümtsü chheju cheni.

¹⁶ Alokütsümi ye tsükhüi shi alhoksa lono tsüghüve cheni, ikemu mbomzümi ye lolhülo eno jukuto chemoe.

¹⁷ Amloide kalo kemi ye anikha kümla shiuve cheni, alhoksa kuchughu chekemi ye timi kimthibo ke.

¹⁸ Itikütüpa chekemi ye aghüzü nikha qelu cheni ikemu lotsü-loghümi ye akighithi kütsü kuqho qhopipe cheni.

¹⁹ Alhoksami no akivimi zülo itsaqi cheni, kixikilami no amikuchomiw khagho lo itsaqi cheni.

²⁰ Akisüghümiu ghi kumlhomi ju alo chemoe ikemu kinimi ye shompami kutomo acheni.

²¹ Akisüghümi jukünatha chekemi ye axinemie ikemu süchile mono kumlhomi tsülu keu ye akümghapue.

²² Alhoksa kuchughu kemi ye pimive chenike kumo? Akivi kughu kemi ye kikimiye ngo pükhükulu ithulu cheni.

²³ Aghimeshi mla kelo ala ani, ikemu atsa likhi pi akeu ye aqüagha lo ilove cheni.

²⁴ Alokütsümi saxü ye küakini, ikemu mbomzümi ghüzü no nikhanigha süghi cheni.

²⁵ Kuchou thopi tsa no aküxü xalu cheni ikemu kichile thopiu ye thekuchuu ke.

²⁶ Ampeu sükümsa lono amlo kumto shilu cheni, eno pa tianuli ye sükusho anani.

²⁷ Ampeu sükümsa ye aküxü züpuki, tipau vecheo akithi lichhe lono pojolu nani.

²⁸ Akükau jekipipu ye aqokitikhi vecheo ithi cheni, ikemu timi küha kelo sakiphemi akeu ye adou ke.

²⁹ Asheshi no amloide kemi ye vethakulu shishe ani, ikemu sü-i khavi amloide kemi ye anikha piye cheni.

³⁰ Iqünhei keu mlo ye aphimpi lo aküxüpu sütsü ani, ikemu anhekushu no aghi anhü pesü tsümavepe cheni.

³¹ Kumlhomi nedaqoda kemi ye pa Lhoküsüu thogha ani, ikemu aveküsami tsü-jelu keu ye Ampeu gihu ani.

³² Kixikilami ye pa lhoksa kümla no pa xakuluve cheni, ikemu timi kuchomi ye pa kithi lo ghi sükusho acheni.

³³ Alokütsü ye vethakulumi mlo lo acheni ikemu mbomzümi dolo ghi pephe piye cheni.

³⁴ Achipiu mikucho no shiye süqhe cheni ikemu timi khuno khuno laumu axine no akukujopu süghi cheni.

³⁵ Tsükhüi shi mlaitha keu qeu no akükau mlo chulu cheni, ikemu akukujo küha kemi shou akükau loghu ikughi cheni.