AHOLE 13 - Sumi Naga CL (Re-edited) Bible (BSI)

¹ Alokütsü nu ye papu kükütsütsa ini cheni, ikemu akuchhomami ye sakiyi keu initsü chemoe.

² Milakhi ye pa kichi lono akivi tsa pikeu xathi chucheni, ikemu mqümghami no khelho chekeu ye shiküpsa ke.

³ Khunono akichi kütsü kiyi keno aküxü msape qhi ani, akichi mkupe zale chekemi ye kütsave nani.

⁴ Akipichimi no minemighei anamu kiumu ithumla no akelo azükinimi ye kupukuno shi ithulu cheni.

⁵ Amikuchomi ye kichile mithi cheni ikemu kixikilami no akukujopu eno küthaküghapu süghi cheni.

⁶ Amikucho no tukutiye küha kemi laghi khekuto cheni, ikemu axine no kixikilami xakulu qhive cheni.

⁷ Khami ye kiumu kühamu kinimi ghili shicheni, khami ye kumlhomi ghilishi anamu küakini kütsasa acheni.

⁸ Milakhi xakipheme ye pa küakini ke, ikemu kumlhomi ye kichi kümsa keu chilu chemoe.

⁹ Amikuchomi küxü ye aküvü toi yevüqai alokiqipue, ikemu kixikilami kulu ye pai tsüqü pinheve tsü nani.

¹⁰ Aqheküza ye kuqhumo keu thono kiumu shimlae, ikemu alokütsü ye akükütsütsa lukemi gholo acheni.

¹¹ Akumou lono küakini pekikelu keu ye hauve nani, ikemu kititi no pekütsülu keu kughukolu nani.

¹² Lajupu süpushuve keu ye amlo hephove tsü ani, ikemu lakuju shikupulu keu huno aküxüpu süboke.

¹³ Akükütsütsa milive keu shou kütsakungo ikughi nani, ikemu azakütsü gihu chekeu ye asaxü tsü nani.

¹⁴ Alokütsümi shiküka ye aküxü züpuki, tipau vecheo akithipu lichhe lono pojolu nani.

¹⁵ Akükümsü kivi no akishekütsü qelu cheni ikemu pükhükümlami ye kütsakungo keu lalo sawuve cheni.

¹⁶ Lotsü-loghümi ye akighithi pesü mlaitha cheni, ikemu mbomzümi ye pa nikha pephe piye cheni.

¹⁷ Kixikila ghinimi ye aküküpna lo ikiqi ilove cheni, ikemu pükhükulumi no shikipivi süghi cheni.

¹⁸ Akükütsütsa milive kemi sala ye athokha eno akukujo, ikemu shikümzü keu ikhilu kemi ye agigihu tsücheni.

¹⁹ Akupulo shikupulu keu ye angulho lokiqipu ikemu mbomzümi ye alhoksa lono tsüghüve keu aphimqhü cheni.

²⁰ Alokütsümi gholo kuloji kemi ye alotsüve cheni, ikemu mbomzümi gholo kichemi ye aghime sholu nani.

²¹ Küsakusho no axinemi pape cheni, ikemu amikuchomi ye thime kivi pesü pa saxü shitsü cheni.

²² Timi kivimi ye pa tianuli tianuli kutolo amheghi qhitsü cheni, ikemu axinemi küakini ye amikuchomi sala qhivetsü cheni.

²³ Kumlhomiw chiphemo keu lulo achuqupu pofushi ani, ikemu achipikumomi no tishipe chemoe.

²⁴ Akihepusü peithamo keu ye pa nuli mithi cheni ikemu pa nuli kimiye chekemi ye müamzü shikümzü cheni.

²⁵ Amikuchomi ye ililai pano müzü-tüghü ghapiqilu cheni, ikemu kixikilami kive ye alhokuthu müzüthi acheni.