AHOLE 12 - Sumi Naga CL (Re-edited) Bible (BSI)

¹ Shikithekütsü kimiye kemi no akighithi kimiye cheni, ikemu sakiyi keu mithi chekemi ye anikha ke.

² Timi kivimi ye Ampeu launo akishe ithulu cheni, ikemu alhoksa kuchughu kemi ye Pa no kileve cheni.

³ Timi khumu kixikila lono aküxü shiqhelu chemoe, ikemu amikuchomi kuhu aghü ye nhüve tsümo nani.

⁴ Anipu kighiche ye akimi kütsü kuqhoke, ikemu li no akukujo süghi aye akimi ghi anhü kütsave tsüke paphie.

⁵ Amikuchomi kükümsü ye achipiu ke ikemu kixikilamiw mijekütsü ye pishikiqhi likhie.

⁶ Kixikilami tsapi ye aji peleni keu likhi ikemu akümzümi tsa no timi xaphelu cheni.

⁷ Kixikilami ye xaqhi kuluve no asheamzü kühave cheni, ikemu amikuchomi kibo ye puthugho ache nani.

⁸ Milakhi no akükümsü kivi akeu vecheo akishe ithulu cheni, ikemu ihoghülai keu mlo xapu chekemi ye thogha cheni.

⁹ Kijemi ghili shino tüqütügha shi akepu ye akuchunimi shino alokughuno shi xüakeu pavie.

¹⁰ Akivimi ye paw pichepighi ghi küpü cheni ikemu kixikilamiw kimiyekini ye ayiküsae.

¹¹ Khuu no pa yeghi chipheni keno achuqupu pofushi cheni, ikemu ameküküha laghi phukeu ye kümsükulu kühae.

¹² Kixikilami no Alhoksamiw kicheqho mine cheni, ikemu amikuchomi kuhu aghü ye mtotoi acheni.

¹³ Küsaküghami ye atsa pikipimi lono meluve cheni, ikemu amikuchomi ye aküküpna lono pojo luve cheni.

¹⁴ Milakhi saxü ye pa kichi lono pikeu shou bepe ani, milakhi no mla püakeu ye pa lau ideighi cheni.

¹⁵ Mbomzümi ye pau no achipi kepi kümsü cheni, ikemu alokütsümi ye kichemije tsükeu ikhilu cheni.

¹⁶ Küghüzümi ghakighide ye paikhavi ithive cheni, ikemu lotsü-loghümi ye thogha keu juzüve cheni.

¹⁷ Kuchou tsa piche kemi ye atho shepe shicheni, ikemu akimki thopiu ye pishikiqhi tsa picheni.

¹⁸ Chokilhemi tsapi ye azütakikihi pesü chuxuqhi keshi, ikemu alokütsümi mili no shipivilu cheni.

¹⁹ Akimki mili ye anhekütsü khavi do likhi ikemu kuchou tsapi huno alholo xüache nani.

²⁰ Küsakügha kuchughumi mlo lo pishikiqhi acheni, ikemu iqüghai keu kughuphe kemi no alokivi acheni.

²¹ Amikuchomi shou anguküsa kiumu ikughi chemoe, ikemu kixikilami ye aküküpna no chhitoi acheni.

²² Akimki mili ye Ampeu zülo aphikümqhüpu ikemu pükhükulupu shiche kemi shou Pa mlokiqi acheni.

²³ Lotsü-loghümi ye pa kighithi pephepe qheza chemoe, ikemu mbomzümi no pano nikha pikülha cheni.

²⁴ Akipichimi küghape aghime kümla shipe akelo müamzü mla chekemi ye ayepeuve nani.

²⁵ Amlo lo kütakihi keu no timi qaqhive cheni ikemu atsa kivi no pa mlo vepiqitsü cheni.

²⁶ Amikuchomi ye pa küsau laghi kichekütsüu ke, ikemu kixikilami no panoqo saküghüzüve cheni.

²⁷ Qeinai kemi ye ashi hakelo kiumu ithumla nani, ikemu müamzü mlakemi no ameküa kini ithulu nani.

²⁸ Amikuchomi laghi ye aküxüpue, eno tipau la loye akithipu kühae.