AHOLE 11 - Sumi Naga CL (Re-edited) Bible (BSI)

¹ Ahu kuchokumo ye Ampeu zülo aphikümqhüpue, ikemu aqhemi shikeu huno Pa lokiqipu ke.

² Kughou aqheküza ighini keno akukujopu ighive cheni, ikemu aqhokigheu shikeu lono alokütsü acheni.

³ Amikuchomi ye pano kikhi no sacheni ikemu timi mqüqhi chekemi ye panow pishikiqhi huno kütsave cheni.

⁴ Aloghu tsala lo küakini ye kiumu ala shimlae ikemu achipiu mikucho huno akithipu lono xaphelu nani.

⁵ Akikhimi ye amikucho pesü pano laghi shikümzü cheni, ikemu kixikilami ye paw kixikila vecheo ikiqive cheni.

⁶ Müzüchoi xüche kemi ye pano mikucho no xaphelu cheni, ikemu pükhü kümlami ye pano mqü lono meluve cheni.

⁷ Kixikilami no thive kelo paw lajupu ye hauve cheni, eno küakini shou lajube chekeu ghi hauve cheni.

⁸ Amikuchomi ye aküküpna lono xaphe luve cheni, ikemu kixikilami ye aküküpna lo ilove cheni.

⁹ Alhou kümthami no pa kichi pesü kütami kütsave nani, ikemu amikuchomi ye akighithi vecheo pokaluve cheni.

¹⁰ Amikuchomi no akivishi aye aphughi no alovi cheni, eno kixikilami no thive aye tile alokivi ghügha ipeghi cheni.

¹¹ Akümzümiw kükümgha lono aphughi ye akishe ithulu cheni ikemu kixikilami kichi no ti shipüsave tsü cheni.

¹² Khukhumu kütami jukuloti chekeu ye kümsükulu kühae ikemu vethakulumi ye inaqhoi acheni.

¹³ Khunono timi xishiwu cheni keno tuqhou zaleve cheni, ikemu aghungu lo pükhükulumi no tuqhou qhitsü cheni.

¹⁴ Khile kichekipiye küha keno timiqo ye veqhive cheni, ikemu lapiyemi kupukuno shi akelo süshokulu ani.

¹⁵ Tüsümi piagha lotsüni keu shi aghi aye ime nani pütsa, ikemu kiumu piqhi püaghimo aye süshokulu ani.

¹⁶ Küpüqhiyi keu totimi no agigihu ithulu cheni ikemu ngukangugha kiptimi ye küakini likhi ithulu cheni.

¹⁷ Timi khuu no ivünhei keno pa likhi pa la shilu cheni, ikemu ayiküsa shikeu ye pau ghüzave cheni.

¹⁸ Kixikilami ye pishikiqhi jume qelu cheni ikemu khuu no amikucho xusüni keno mtsüqhei no asaxü ithulu cheni.

¹⁹ Amikucho shiniye amlo iqemo kemi ye xülu nani, ikemu khunono alhoksa phuni keno thinani.

²⁰ Chighichilai kemi ye Ampeu zülo aphikümqhüpue, ikemu tukutiye küha kemi küxü ye Pa züküvüpu ke.

²¹ Alhoksami ye ghime movemla kepi thebei ithilo, ikemu amikuchomi tianuli ye xaphe luve nani.

²² Totimi lakhi no juvi aghi namu kimchikulupu kighithi küha aye awo nheghu lo ameshoyi nguthi tshüqhipu aketoie.

²³ Amikuchomi no mine chekeu ye akivi likhi shi aghi cheni; ikemu kixikilami ye aloghu shi aghive cheni.

²⁴ Khami ye kümsano tsüve namu alau kinimi shi, khamiu ye tsükepu shi akeu süchileve keghi aqüagha shi cheni.

²⁵ Kükümgha pesü tsü aye alau kighishelu nani, azü pesü kütami püxütsü aye pau püxütsü nani.

²⁶ Athi hekütsüpe qhive kemi ye timi no ghusho cheni, ikemu kükümgha tsa ye jetsü kemi shou ikughi cheni.

²⁷ Müamzü akivi phu chekemi no Alhou mlo chulu cheni, ikemu alhoksa phuche kemi ye alhoksau phulu cheni.

²⁸ Khunono aküakini pükhü cheni keno ikiqive nani, ikemu amikuchomi ye atsünipa küxü toi thuikulu nani.

²⁹ Akibo lo aküküpna xusü chekemi ye amülhü ighilu nani, mbomzümi ye alokütsümi qemi shi nani.

³⁰ Amikuchomi xathi ye aküxüpu sübo, eno alokütsümi no aküxü pükhalu cheni.

³¹ Ayeghi lono amikuchomi jume tsüchile cheghi keaye, kixikilami ngo axinemi ye khijeta ithulu nani kelae!