AHOLE 10 - Sumi Naga CL (Re-edited) Bible (BSI)

Solomon Holetsa

¹ Solomon holetsaqo. Alokütsü nuli ye apu mlokiqipu, ikemu mbomzü nuli ye aza mloghimepue.

² Küsakügha laghi lono akini ithulu keu ye ala kühae, ikemu achipiu mikucho no akithi lono xaphelu cheni.

³ Ampeu ye amikuchomi pelo müzüthivepe chemo, ikemu Pa no kixikilami kimne süchile luvetsü cheni.

⁴ Akipichi u no tüqütügha süghi cheni ikemu aka-aghashi mlakeu u huno kinikülü shilu cheni.

⁵ Kümsükulumi ye mütsü tusho lono pekütsü luve cheni, ikemu ghile lono zü auve keu ye akukujopu süghi cheni.

⁶ Kükümgha ye amikuchomi kütsü lo acheni ikemu kixikilami milibo qholo heqhi buqhi keu küsüpüa cheni.

⁷ Amikuchomi no kümsükulu akeu ye kükümgha ke, ikemu kixikilami je ye pai hauve cheni.

⁸ Akükümsü kivi puche kemi ye azakütsü ikhilu cheni, ikemu anikha tsa piche kemi ye shiküpsapu sholuve nani.

⁹ Akikhishi xükemi ye sükusho acheni, ikemu khuu no pa küxü la tuchighive akeno phuphe luve nani.

¹⁰ Anhethi kütsüpe timi tsükeu ye aküküpna xukutho ani, ikemu anikha tsapimi ye shiküpsapu sholuve cheni.

¹¹ Amikuchomi kichi ye aküxü züpuki, ikemu kixikilami milibo qholo kütsakungo keu küsüpüa cheni.

¹² Kimthi-kimxi keu no mtomshu keu xukutho cheni, ikemu kikimiye no akipimi kümtsü jonhavetsü cheni.

¹³ Alokütsü tsa ye vethakulumi kichi lo acheni, ikemu kümsükulu küha kemi ghenguno aqheküsü ani.

¹⁴ Alokütsümi ye akighithi pekütsü cheni, ikemu mbomzümi tsapi no shiküpsapu aphivilo süghive cheni.

¹⁵ Kinimi lakhiw sükusho ye pa küakini no ke; ikemu kumlhomi kütsave chekeu ye aqüagha no ke.

¹⁶ Amikuchomi jume ye aküxüpu lalo sawu cheni ikemu kixikilami no ala shilu keu huno axine lo sawuve cheni.

¹⁷ Akükütsütsa ikhilu keu ye aküxüpu lalo checheni, ikemu shikithekütsü lumo keu huno kütami saküghüzü cheni.

¹⁸ Kimthi kimxi keu küsüve aye pa ye akimki mili xapu ani, khukhumu xikishi tsa pichekeu ye anikhae.

¹⁹ Kughou no chilo atsa piuva keno, axine ye kupukunoae, ikemu lotsü-loghümi no amili kütsü ithi cheni.

²⁰ Timi kuchomi mili ye ghükayi kighiche toi; ikemu kixikilami mlo ye ame kühae.

²¹ Amikuchomi tsapi no timi kutomo lojilu cheni, ikemu mbomzümi ye kümsükulu küha kehu thive cheni.

²² AMPEUw kükümgha no kinikülü tsü cheni; eno Pa ye tipau lo amlo ghime küphatsü chemoe.

²³ Mbomzümi ghenguno alhoksa kümla ye zügha paphi, ikemu vethakulumi ghengu ye alokütsü no azüküvüpue.

²⁴ Kixikilami no kiu msa cheni keno pano shou ighi nani, ikemu amikuchomi ye pano no laju chekeu ithulu nani.

²⁵ Kixikilami ye pasapagha ighi kelo fupe wuve aghi nani, ikemu amikuchomi ye alholo iqhikumtope qhinani.

²⁶ Akipichimi sawo akümla shipe keu ye akiqhi zü yepusü ahumqü keshi eno amchhi no anhethi phoqhi akeshie.

²⁷ Ampeu sükümsa no axüpushu tsü cheni, ikemu kixikilami küxü ye ghitha kughukhove tsü cheni.

²⁸ Amikuchomiw lajupu ye alokivipu süghitsü cheni, ikemu kixikilami no laju chekeu ye hauve nani.

²⁹ Tukutiye küha kemi müzülo Ampeu ye aliwo kumtoe, ikemu küsaküghami ye kütsapinyive cheni.

³⁰ Amikuchomi ye khilemu nhüve monani ikemu kixikilami ye ayeghi lo xümla nani.

³¹ Amikuchomi kichi lono alokütsü tsa ipeghi cheni, ikemu atsa tuchighive chekeu mili ye kütsave tsü nani.

³² Amikuchomi tsapi ye kiu no ikhikulupu keno ithi ani, ikemu kixikilami no ithi chekeu ye tuchighive keu tsa likhie.