AHOLE 1 - Sumi Naga CL (Re-edited) Bible (BSI)

Akighithi Boqha

¹ David nu, Israelmi kükau Solomon holetsaqo:

² Alokütsü eno akükütsütsa ithi no kuthoküzü tsa vethalu penike,

³ alokütsü, amikucho, achipiu eno aghibiu shini keu kükütsütsa ithulu nike;

⁴ itikütüpa kemi loshipütsü tsüno akighithi eno kimchikulu pesü lhothemi tsünike—

⁵ Alokütsümi no chilu no akighithi kughuko lulo eno vethakulumi no aküxü laghi kichekütsü ithilulo,

⁶ tishianguno alokütsümi holetsa eno panow sülekuthoqo vethalu nani.

⁷ Ampeu sükümsa no akighithi hukuthu ke; mbomzümi no alokütsü ngo akükütsütsa jukünatha cheni.

Lhothemi Kükütsü

⁸ I nu, o pu kükütsütsa inilo, eno o zaw shiküka milive kevilo,

⁹ kughengu tipaqo ye o ghenguno aküzüqhiyi keu kütsükuqho eno o kuo lo jukivi chila toike.

¹⁰ I nu, axinemi no o müsü kelo khilemu aqo lo ilove kevilo.

¹¹ Panongu no o vilo, “Ighilo, ningu timi küxü luveni ke kheni; akiqi kühamu pimimo kemi la kheno heqhini nolo;

¹² Kithigha toi ningu aküxü no panoqo munoveni, eno aqolo ikiqi ilove kemi toi akupuju no munoveni;

¹³ akughupu thime kümtsü ningu no ithulu nani, eno süxakulu thime pesü ningu ki pichhini,

¹⁴ ni gholo shikepu shi asaqhi lo, ningu no kiu püka luni keno kümtsü aqü shini” ipi namu

¹⁵ I nu, panongu no chechekeu laghi lo wu kevilo; pano laghi lono O pukhu sünhe chile luvelo,

¹⁶ kughengu pano pukhu ye alhoksa lo pove cheni, eno aji peleni ke khelho acheni.

¹⁷ Kughengu aghau lakhi zülono alichhe piqe akeu ye adoue,

¹⁸ ikemu timi hipaqo ye pano ghenguu no alichhe shi acheni; eno pano ampi küxüu miqe khe acheni.

¹⁹ Achipikumo lono ala shinishi chekemi laghi ye hitoi ke; alakimne no pa küxü luvetsü cheni.

Alokütsü no Ghutu

²⁰ Alokütsü no alaghila lono ighamku ani, alhikishi-a lo li no asütsa süqhe ani;

²¹ mbumghu akeu laghila lo li no ighamku ani; aphughi khagho kulaghi lono li no asheshu ani:

²² “Itikütüpa chekeqo! Nongu ye khitohi itikütüpa anania? Alokütsü junu chekemi ye khitohi küthakügha tsapi lo alovi eno mbomzümi ye khitohi alokütsü jumithi anani kea?

²³ I no sakiyi kelo nongu no tsüghü ighilu aye, julo, I no nongu shou I ghungu lepuku tsünani; nongu pelo I tsa ithilupe nani.

²⁴ Ikemu I no nongu ku apülaghi nongu no ini tsümo, I u sükho kemu khunomu akhoto shitsümo,

²⁵ nongu no I kükütsütsa kümtsü jukümghaleve eno Iw shikithekütsü lakhimu lumoke ghenguno

²⁶ nongu mhekiqi tsala lo niu ghi nongu junu nani; akümsapu no nongu shou ikughi kelo I no nongu thaigha nani,

²⁷ aküighüpu no pasapagha toi nongu shou ikughi kelo, nongu mhekiqi no miyitsü toi ighi, amloksapu eno aghime no nongu shou ikughi kelo, ni ghi nongu toi shinani.

²⁸ Tishino panoqo no I ku nani, ikemu I no ini tsümo nani, panongu no müamzü I phu nani kemu phulumo nani.

²⁹ Kughengu panongu no akighithi mithi eno Ampeu sükümsa kishelumo,

³⁰ Iw mijekütsü lunishimo eno shikithekütsü kümtsü jukünatha ke,

³¹ tighenguno pano no xüchekeu kiqi lono axathi xolu nani, eno pano no kuchughu chekeu huno pano kive pichhitsü nani.

³² Kughengu mbomzümi ye alokütsü milive kelono thive cheni; eno pano kuchhoma no pano kütsave cheni,

³³ ikemu khunono I tsa chiluni keno aküxü lo sükusho anani eno küsakusho kümsapu kühano iqüghai nani.”