ACHINE 9 - Sumi Naga CL (Re-edited) Bible (BSI)

Aaron Kümllagho Ikhilutsü

¹ Atsala akütacheni Moses no Aaron ngo pa nuli eno kichimi ku,

² eno pa no Aaron vilo pi, “Axine kümllagho ghenguno amshitsü lhothe eno akipti kümllagho ghenguno anetsü lakhikhi tukutiye kühakeu pesü Ampeu mlla lo.

³ Eno Israelmi vilo pilo, ‘Axine kümllagho ghenguno anetsü lakhi, akipti kümllagho ghenguno amshiti ngo ambeti süghilo, kinikujo ampe lakhikhi eno tukutiye kühakeu,

⁴ külakishi kümllagho ghenguno amshitsü ngo anetsü Ampeu zülono aghashi lo, eno athi kümllagho thazü gholo kiteve keu süghilo, kughengu Ampeu ye ishi nongu lau ipeghini cheni.’”

⁵ Moses no kuposhukulu phiki zülono azah tsüke toi aqoaho kümtsü no tipaqo pesü Ampeu kupunu ighi.

⁶ Moses no pi, “Hi ye Ampeu no nongu vilo shilo pikeu ke, tishianguno Ampeu juküvü nongu lau ipeghi peniye ke.”

⁷ Pa no Aaron vilo pi, “Akiptia kupunu wuno o xine kümllagho ngo o kipti kümllagho shino no eno ow timi ghenguno lokichile shilo, eno Ampeu no azah tsüke toi timiqo kümllagho süghi no pano ghenguno lokichile shitsü lo.”

⁸ Ikehu Aaron no akiptia lo wuno pa ghenguno axine kümllagho mishiti heqhi.

⁹ Pa nuli no tipau ji pesü pa tsükelo pa no pa uloti aji lo chosü no pewo akiptia kiboqo lo lesü no itaghi akiptia bophi lo leqhi.

¹⁰ Ikemu axine kümllagho lo atha, amchi lothi eno apuloshi ye Ampeu no azah tsüke toi akiptia lono pitive.

¹¹ Pa no ashicho eno ayiko pesü aghazü khalau no ami lono pitive.

¹² Tithiu pa no akipti kümllagho lhoxü heqhi no pa nuli no aji pesü pa tsükelo pa no akiptia vehomxa leqhi.

¹³ Panoqo no ghekuchove keu shileqhi eno akütsü pa tsükelo pa no akiptia lono qhoi pitive.

¹⁴ Pa no azü no aboloshi eno apukhuqo qhuve no kuchopu akipti kümllagho gholono pitive.

¹⁵ Tithiu pa no timiqo xine kümllagho ghenguno ane heqhi no lhoxü atüghüu toi axine kümllagho shi ikhiphe tsü.

¹⁶ Pa no akipti kümllagho khuaye kiqi lono peitha tsü.

¹⁷ Inaqhe akipti kümllagho nguno alau pa no athi kümllagho peithatsü, akümllagho süghi keu lono pa u kichhi lakhi luve no akiptia lono pitive.

¹⁸ Tithiu timiqo ghenguno külakishi kümllagho mishitsü ngo anetsü pesü pa no aghashi. Aaron nuli no lhoxü ji pa tsükelo pa no akiptia vehomxa leqhive.

¹⁹ Ikemu lhoxü hi küma philo atha, ashomhi tha, amxu ngo amchi lothi küzüpe achekeu tha, eno apuloshi ye

²⁰ amlashi shou beve no pewo akiptia lono pa no atha thaqhü pitive,

²¹ ikemu amlashi eno aluko ajeu shi ye Moses no azah tsüke toi Aaron no Ampeu zülo akimchi gho lakhi shi qhitsü.

²² Aaron no timiqo küdau pa u peqhe no panoqo kümghatsü, pa no axine kümllagho, akipti kümllagho, eno külakishi kümllagho kümtsü shitave kethiu iqighive.

²³ Moses ngo Aaron pama kuposhukulu phiki lo ilove no ipeghi kelo timiqo kümghatsü, eno Ampeu juküvü timi kümtsü lau ipeghi.

²⁴ Ampeu zülono ami ipeghi no akipti kümllagho eno atha jeli akiptia lo akeqo pitive, ikehu kughou timi kümtsü no ti ithulu keno, panongu no ighau khave no ikiqi agi pishiqho luve.