ACHINE 8 - Sumi Naga CL (Re-edited) Bible (BSI)

Aaron ngo Pa Nuli Kishekimthe

¹ Ampeu no Moses pütsa no pi,

² “Aaron ngo pa nuli saghi no achinemi phimini ngo nukikishe thazü, axine kümllagho mishitsü, anetsü kini, eno kholaqhi sümokeu sho ashoghi lakhi süghilo.

³ Eno aqoaho kümtsü kukumqo pe kuposhukulu phiki kulaghi lo ighilo.”

⁴ Ampeu no azah tsüke toi Moses no aqoaho sasü kuposhukulu phiki kulaghi lo kumqo.

⁵ Moses no aqoaho vilo pi, “Hi shipenike Ampeu no azah tsü ani.”

⁶ Moses no Aaron ngo pa nuli saghi no azü pesü panoqo qhukimthe.

⁷ Pa no aphiküzü Aaron puuve, apokha tsüghave tsü, chijeboike phi puuve, achinemi phi pipe eno tipau lo kütshakügha shi pili püakeu she pesü pa vehomxa khavetsü.

⁸ Pa no amla küküzü süvetsü no tipau lo Urim ngo Thummim süvetsü.

⁹ Ampeu no azah tsüke toi Moses no akütsü shonhaphi pesü Aaron pipe, tipau gizüu pa no ameshoyi yipa davetsü, eno akimthe kütsükükha süvetsü.

¹⁰ Tishino Moses no nukikishe thazü pesü aphiki lo thime kümtsü nuve no kishekimthe pe qhive.

¹¹ Thazü hami pesü akiptia lo ghuthu tsüni küzüte no akiptia, tile akhu-ajukhu jeli, chithakhu eno akibepu kümtsü nuve no kishekimtheve.

¹² Pa no thazü pesü Aaron kütsü lo sütsü no kishekimtheve.

¹³ Ampeu no azah tsüke toi Moses no Aaron nuli saghi no aphiküzü puuve, aphi pesü panoqo pokha shitsü eno aphi kütsükuqho pipeve.

¹⁴ Tithiu Moses no axine kümllagho mishitsü saghi, eno Aaron ngo pa nuli no au pesü amishi kütsü lo inape.

¹⁵ Pa no amishi heqhipe aji pesü akiptia kiboqo lo lesü no akiptia shikimthe, eno aji achili ye akiptia bophi lo leqhive no kishekimthe tsü.

¹⁶ Pa no amxu, apuloshi, eno amchi lothi kini, tipau gholo atha kuchopu luve no akiptia lono pitive.

¹⁷ Ikemu ayiko ngo ashicho eno tübatüzü kümtsü Ampeu no azah tsüke toi aghazü khalau pewo ami no pitive.

¹⁸ Tithiu pa no akipti kümllagho shinike anetsü saghi, eno Aaron ngo pa nuli no au pesü anetsü kütsü lo inape.

¹⁹ Pa no ti heqhive no aji pewo akiptia vehomxa leqhive.

²⁰ Pa no anetsü shi ghekucho pe aleqhi shive, eno ane kütsü ngo aleqhiqo eno atha kuchopu pitive.

²¹ Ampeu no azah tsüke toi Moses no aboloshi eno apukhuqo azü no qhuve no ane kupuju akiptia lono pitive. Tino mülüi keu xo kipti kümllagho, achuqupu kümllagho Ampeu lopu ke.

²² Tishino Moses no anetsü lakhiu akimthepu lo ikhiphe tsükeu kümllagho saghi, eno Aaron ngo pa nuli no au pesü anetsü kütsü lo inape.

²³ Pa no tipau heqhipe aji hami pewo Aaron kini aniqe lo, pa uloqu ajeu, eno pa pukhu loqu ajeu süvetsü.

²⁴ Pa no Aaron nuli ikhiphe tsü, aji pesü panoqo kini aniqe lo, auloqu ajeu eno apukhuloqu ajeu süvetsü. Pa no aji pewo akiptia vehomxa leqhive.

²⁵ Tishino pa no atha eno ashomhi tha, amxu, eno apuloshi ngo amchi lothi kini, tipau gholo atha eno aluko ajeu,

²⁶ eno kholaqhi sümokeu sho Ampeu zülo akeu ashoghi lono pa no thazü pesü mlakeu shopa lakhi eno zümzümüi keu shopa pewo atha ngo aluko ajeu beve.

²⁷ Pa no hi kümtsü pesü Aaron eno pa nuli u lo süvetsü no Ampeu zülo akimchi kümllagho shitsü.

²⁸ Tishino Moses no panoqo u lono ikhipe akipti kümllagho gholono pitive. Hino mülüi keu xo akimthepu lo ikhiphe tsükeu kümllagho, achuqupu kümllagho Ampeu lau tsükeu ke.

²⁹ Ampeu no azah tsüke toi Moses no amlashi luve no Ampeu zülo akimchi kümllagho tsü. Tino akimthepu lo ikhiphetsü keu kümllagho lo Moses saje ke.

³⁰ Moses no nukikishe thazü eno akiptia lo akeu ji luve no Aaron ngo pa nuli phimini lo küzüte puku. Hitoi pa no Aaron eno pa phimini eno pa nuli ngo panoqo phimini shikimthe tsü.

³¹ Moses no Aaron ngo pa nuliqo vilo pi, “I no, ‘Aaron ngo pa nuli no tipau chuni,’ ipi azah tsüke toi kuposhukulu phiki kulaghi lono ashi lhove no tileno chuni, eno asho khikhi akimthepu lo ikhiphetsü keu shoghi lo ani keno, ti ikhipe chuni.

³² Ashi eno asho achili ye pewo ami lono pitiveni.

³³ Akimthepu lo ikhiphe tsükeu tsala tsüni kupu moke kutolo nongu ye kuposhukulu phiki kulaghi hechesü khalau ipe moni, kughengu akimthepu lo nongu ikhiphe tsüni keu ye atsala tsüni lunani.

³⁴ Ishi kiu shive akeno, Ampeu no nongu ghenguno lokichile shitsü penike azah tsüke.

³⁵ Ampeu no hakite keu kiqi lono nongu ye kuposhukulu phiki kulaghi lo putho pucho atsala tsüni ngono shilopi keqo mlaithani, tishikeu lono nongu ye thimo nani, azah I tsü püakeu ye hipau ghenguno ke.”

³⁶ Ampeu no azah tsüke toi Aaron ngo pa nuli no kümtsü shive.