ACHINE 5 - Sumi Naga CL (Re-edited) Bible (BSI)

¹ “Khuana no küqüve no thopi shi penike aqha zülono inijuni, eno timi lakhino pa ye ithulu püani momu ithi ani kehu thopi tsülu nani kemu pimove aye, timi hupau kipimi pa no xapuni;

² momu khuana no mithekumo thime, aghalo lhoxü na pichepighi kumo namu, momu iti-iza eno yekiche lhoxü kumo, ithimo keu lono buve no mithe move aghini, eno kutou no pa kipimi kümsü chilelu aye;

³ momu timi lakhi philo kiukiu mithekumo namu xapu aghi kelo khuana no buve no mithe moveni, eno ti vethalu no pa kipimi kümsü chilelu aye;

⁴ momu khuana no ithikuthu mono pa kichi lono lhelheshi alhoksa momu akivi kümla shini kepi timi no shoqhi-sholi shi chekeu gholau no tushoqhive no pa kipimi kümsüchilelu aye;

⁵ pa no hipaqo dolo lakhi lo likhimu küqüve aghi no pa kipimi kümsüchilelu aye, pa ye axine kümtsü pipheni,

⁶ eno küqüve keu xine ghenguno Ampeu lau lokichile shi ambe na ane namu aqu alhothe lakhi süghini. Tileno achineu no pa xine ghenguno lokichile shitsüni.

⁷ “Ikemu pa no khikhiu mu süghimla aye, pa xine lovetsü penike pa ye Ampeu lau lokichile shi aqhewo kini momu amiqhi lhothe kini, lakhino axine kümllagho eno lakhi no akipti kümllagho ghenguno süghini.

⁸ Atüghüshi achineu no ikhipe axine kümllagho shinike aghau lakhi kuo sütha mono tuchighive tsüni,

⁹ eno axine kümllagho ghau ji hami pesü akiptia vehomxa leqhi no achili ye akipti bophi lo leqhiveni; hi no axine kümllagho ke.

¹⁰ Tithiu achineu no pimheye kiqi lono aghau akiniu pesü piti mllaveni. Eno achineu no timi hupau xine ghenguno lokichile shitsü no pa kipimi qhive tsüni.

¹¹ “Ikemu timi huno aqhewo kini momu amiqhi kini tshamlave aye, pa xine ghenguno axine kümllagho shi ashomkhu akiviu ahu lakhi süghini. Hipau lo thazü na müsüghüta namu kitemoni, kughengu hi ye axine kümllagho ke.

¹² Pa no achineu lau süghi kelo achineu no kümsükulu saje au kichhi lakhi luve no Ampeu lau achuqupu kümllagho kiptia lono pitiveni; hi no axine kümllagho ke.

¹³ Timi tipau xine khikhiu shi aghimu achineu no Ampeu lau lokichile shitsüni, eno pa kipimi qhive tsüni.

Akipimi Kümllagho Yezah

¹⁴ Ampeu no Moses pütsa no pi,

¹⁵ “Khuana no ithikuthu mono Ampeu akimthe khuayeqo kubove no axine shive aye, pa ye Ampeu lau lokichile shi akipimi kümllagho tsünike anetsü tukutiye kühakeu lakhi süghini, ti ye ghükayi kiqilo kiu me qhemi shini keno achineki pisa kiqi lono kihini.

¹⁶ Hipau gholo pa no akimthe khuaye pape mlave keu ghengu ghi tsüchile masa nani, ame ye atüghüu lo puwove kepushi akeu lono saje pungu qhemi pesü achineu tsüni. Tileno achineu no akipimi kümllagho anetsü pesü timi tipau ghenguno lokichile shitsü no pa kipimi qhive tsüni.

¹⁷ “Khuana no Ampeu zakütsü lo shimo kepu lakhimu shive no axine shive aye, pa no mthano shive aghi namu kughou pa kipimi kümsüchile luni keno, pa ye pa xine xapu masae.

¹⁸ Pa kipimi kümllagho ghenguno pa ye achineu lau anetsü tukutiye kühakeu lakhi süghini, pa no mthano axine shiveke ghenguno achineu no lokichile shitsü no pa kipimi qhive tsüni.

¹⁹ Hi no akipimi kümllagho; kughengu pa ye mtsüqheino Ampeu zülo akipimi shive ke.”